Милано е најзагрозениот европски град кога станува збор за сообраќајните метежи, покажа истражувањето на американското здружение Inrix кое се знимава со истражување на состојбата во сообраќајот користејќи ги податоците од европската агенција за статистика Eurostat.

Оваа северна италијанска метропола е права на листата од 25 сообраќајно најзадушени градови на Стариот континент. Веднаш зад Милано, се Брисел и уште еден белгиски град Антверпен, на четвртото место е Париз, а англиската метропола Манчестер е на петтото место. Eurostat, инаку, располага со податоци од тринаесет земји во Европа.

На врвот од земјите со најлоша состојба во сообраќајот е Белгија каде што возачите во текот на 2011 година при возење, односно во сообраќајните метежи губеле 55 часа, што е за два часа помалку отколку претходната година. Следува Холандија, каде што возачите во своите автомобили просечно минувале по 50 часа, што во однос на претходната 2010 година изнесува четири часа помалку, Потоа следуваат Франција и Германија со по 36 часа загубени во автомобил.

Сообраќајно „најпроточни“ земји се Луксембург, Унгарија и Ирска.

Интересно е што сообраќајните гужви во периодот меѓу 2010 и 2011 година најмногу се намалиле во земјите коишто воедно се и најпогодени од економската криза, за 49 отсто во Португалиај, за 25 отсто во Ирска, за 15 отсто во Шпанија и за 12 отсто во Италија.

Меѓутоа, финансиската криза којашто ја тресе до темели еврозоната, како што наведува Inrix, не ги поштедила ниту економски посилните европски земји. Сообраќајните метежи биле малку помали и во Германија, за околу 8 отсто, во Холандија за 7 отсто, како и во Белгија за 3 отсто.

„Сообраќајните гужви на патиштата и на автопатиштата се одличен економски идникатор кој, меѓу другото, ни покажува дали луѓето одат на работа, ги испорачуваат ли компаниите своите производи, дали луѓето трошат…“, смета директорот за комуникации и маркетинг во Inrix, Џим Бак.

Според Inrix во првите десет европскии земји со најголем сообраќаен метеж се: 1. Белгија, возачите губат 55 часа во сообраќајот – 2 часа помалку од 2010 година; 2. Холандија, возачите губат 50 часа – 4 часа помалку од 2010; 3. Италија, возачите губат 29 часа – 6 часа помалку од 2010; 4. Велика Британија, возачите губат 32 часа – 4 часа помалку од 2010; 5. Шпанија, возачите губат 34 часа – 6 часа помалку од 2010; 6. Франција, возачите губат 36 часа – нема промена од 2010; 7. Германија, возачите губат 36 часа – 3 часа помалку од 2010; 8. Австрија, возачите губат 27 часа – 2 часа помалку од 2010; 9. Португалија, возачите губат 23 часа – 2 часа помалку од 2010 и 10. Швајцарија, каде што возачите во сообраќајниот метеж губат 22 часа, односно 2 часа помалку отколку во 2010 година.

Доколку патувате низ Европа, и не сте подготвени да „се заглавувате“ во метежот, според ранг листата на Inrix треба особено да бидете внимателни кога престојувате во следните 25 европски градови: 1. Милано, Италија; 2. Брисел, Белгија; 3. Антверпен, Белгија; 4. Париз, Франција; 5. Манчестер, Велика Британија; 6. Ротердам, Холандија; 7. Рим, Италија; 8. Лондон, Велика Британија; 9. Утрехт, Холандија; 10. Фиренца, Италија; 11. Ливерпул, Велика Британија; 12. Барселона, Шпанија; 13. Мадрид, Шпанија; 14. Гент, Белгија; 15. Амстердам, Холандија; 16. Белфаст, Велика Британија; 17. Штутгарт, Германија; 18. Келн, Германија; 19. Лион, Франција; 20. Бордо, Франција; 21. Хамбург, Германија; 22. Њукасл, Велика Британија; 23. Нотингем, Велика Британија; 24. Севилја, Шпанија и 25.Гревенхаг, Холандија./крај/мф/сн