Eден од најпознатите британски криминалци учесник во тан Големиот грабеж на возот од 1963 година, Рони Бигс починал во средата на 84-годишна возраст во старечки дом во северен Лондон, со многу нарушено здравје по серијата мозочни удари, објавија тамошните медиуми.

Рони Бигс беше дел од бандата којашто го ограбила поштенскиот воз на релација Глазгов – Лондон однесувајќи тогашни 2,6 милиони британски фунти, во денешна противвредност од 46 милиони фунти или 75 милиони американски долари.

Како и другите членови е брзо уапсен и осуден на 30 години затвор. Од затворот во Вандерсворт побегнал уште во 1965 година и од тогаш слободно и сосема јавно живеше во Шпанија, Австралија и Бразил, и како своевидна славна личност секогаш успеваше да го избегне прогонот на Скотланд јард.

Се врати во Велика Британија во 2001 година, веќе со нарушено здравје поради лечење, но веднаш е сместен во затвор од кој беше ослободен во 2009 година поради нагло влошување на неговата здравствена ситуација. Оваа одлука тогаш британските власти ја објаснија со хуманитарни причини, повикувајќи се на здравствената состојба и неговата возраст. Последен пат во јавноста Биг се појави во март 2013 година, на погребот на Брус Рејнолдс, друг учесник во големиот грабеж, коj го направил планот.

Иако улогата на Биг во грабежот не била особено значајна, тој стана најславниот учесник во него, поради спектакуларното бегство од затворот во кој одлежал само 15 месеци од 30-годишната казна, и речиси 40 години успеваше да биде недостапен за правдата.

Авторот на неговата биографија, Кристофер Пикард за BBC изјави дека Биг е запаметен како еден од наjинтересните ликови во Англија во последниот половина век. „Беше првиот производ на медиумската ера. Стекна слава бегајќи по светот“.

Вкупно 15 членови на бандата го запреле поштенскиот воз на еден моста во Англија, пореметувајќи ја железничката сигнализација. Носејќи скијачки маски, од возот земале вкупно 120 торби полни со пари.

Бигс во едно интервју изјави дека неговиот дел изнесувал 147 илјади фунти. „Ги спискав за три години. Од тогаш живеев само од славата“, рече. Даваше интервјуа, продаваше маици со неговиот лик, снимаше реклами, отворено пркосејќи им на британските власти. Никогаш не се покај за грабежот за кој се снимени неколку филма./крај/мф/сн