Забава
Deeper underground festival од Охрид се сели во Скопје

Deeper underground festival, кој требаше да се одржи во Охрид, се сели во Скопје, соопштија од „Авалон продукција“.
Фестивалот ќе се одржи на 15 и 16 август на просторот на „А1 арената“ на отворено, а настапот на Meduza е откажан.
„Историски тешки времиња бараат историски напори, но се надеваме дека сето тоа ќе резултира со навистина историски успешен настан во ова неверојатно тешко време. Па, ве известуваме дека од логистички причини: избегнување метеж, паркинг и можност за 100 % спроведување на протоколите, ‘Авалон pродукција’ заедно со менаџментот и артистите на фестивалот одлучи Скопје да биде домаќин на првото издание на Deeper underground festival, кој ќе се одржи на просторот на ‘А1 арената’ на отворено“, соопштија од продукцијата.
Организаторите исто така соопштија дека наместо три, фестивалот ќе трае два дена.
„За жал, наместо тридневен фестивал, ќе имаме настан што ќе трае два дена од следнава причина. Имено, поради редуцираните авионски линии за Македонија и околината, како и моментната состојба со коронавирусот во нивната држава, Италија, не сме во можност да обезбедиме 100 % сигурен транспорт за него и поради тоа, доаѓањето на Meduza во Македонија ќе остане за некоја друга и подобра пригода“, велат од „Авалон продукција“.
Пионерите на dnb-сцената RONI SIZE & LTJ BUKEM со Dynamite MC ќе настапат на 15 август, а ARTBAT на 16 август.
Цената на дневните билети останува иста – 1.200 денари, а сега блок-влезницата за двата фестивалски дена изнесува 1.500 денари и може да ги набавите онлајн на avalon.mk, Avalon music & ticket store и преку продажната мрежа на „Авалон“ низ Македонија.
Оние што имаат купено влезници само за Meduza и не сакаат да присуствуваат на Deeper underground festival, средствата ќе може да ги рефундираат од оние продажни места од каде што ги имаат купено билетите.
Во продажба се само 3.000 влезници од вечер, а во согласност со протоколите за превенција од Ковид-19 капацитетот на просторот кај „А1 арената“ за овој настан ќе биде адаптиран на 20 % од вкупниот, кој е за 15.000 посетители.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Забава
Мел Би се омажи втор пат за истиот маж во Мароко

Поранешната членка на поранешната група „Спајс Грлс“, пејачката Мел Би, го кажа судбоносното „да“ по втор пат на Рори Мекфи.
Мел Би и нејзиниот партнер Рори Мекфи се венчаа првпат на почетокот на јули во Лондон, а двојката не можеше да одолее на желбата да се венчаат по втор пат во Мароко, во луксузниот хотел „Селман Маракеш“.
Поранешната Спајсица објави фотографии од уште една гламурозна прослава на Инстаграм со опис:
„Се венчавме! Повторно! Свадбата беше толку добра што моравме да ја продолжиме прославата со нашите најблиски на нашето омилено место“, напиша Мел.
Ова можеби е трета среќа за Мел Би. Таа беше во брак со Џими Гулзар (1998–2000) и Стивен Белафонте (2007–2018).
Таа е во врска со Рори од 2017 година, а се верија во 2022 година. Тој е фризер по професија, а пред тоа беше долгогодишен пријател на пејачката.
Забава
Тајната на долгиот живот? Три оброци, рутина и без драма – вели 114-годишна Јапонка

Шигеко Кагава, 114-годишна пензионирана докторка од префектурата Нара, стана најстарата личност во Јапонија откако почина 114-годишната Мијоко Хиројасу, покажуваат податоците на јапонското Министерство за здравство, труд и социјална грижа, пишува „Асоушиејтед прес“.
Кагава, симбол на извонредна долговечност во Јапонија, дипломирала медицина пред Втората светска војна, работела во болница во Осака за време на војната, а подоцна ја водела семејната ординација како специјалист по гинекологија и акушерство. Во пензија заминала на 86-годишна возраст. Со 109 години, во пресрет на Олимписките игри во Токио во 2021 година, Кагава стана една од највозрасните носителки на олимпискиот оган во историјата.
Како што пренесе локалната телевизија „Ем-би-си њуз“, повикувајќи се на нејзиното семејство, таа не прави ништо посебно за да го одржи своето здравје. Се придржува до редовна рутина – легнува и станува во исто време, јаде мали порции, но секогаш има три оброка на ден.
Претходната најстара личност во Јапонија, Мијоко Хиројасу, исто така водела активен живот. Родена во 1911 година, таа студирала уметност во Токио, предавала во префектурата Хирошима и одгледала три деца. Починала во дом за стари лица во префектурата Оита, каде што деновите ги поминувала читајќи весници, цртајќи и играјќи карти.
И покрај општиот пад на бројот на жители, бројот на постари лица во Јапонија постојано расте. Заклучно со 1 септември 2024 година, рекордни 36 милиони луѓе – што е 29 отсто од населението – биле постари од 65 години, што е највисок процент на стари лица во светот. Лицата над 80 години сега сочинуваат 10 проценти од вкупното население, според податоците на Министерството за внатрешни работи и комуникации. Во цела Јапонија има 95.119 стогодишници.
Забава
Сара Џесика Паркер со емотивна објава се прости од Кери по 27 години

По три сезони, HBO-серијата „И едноставно така“, продолжение на култната „Сексот и градот“, официјално е откажана. Веста ја потврди главната актерка и продуцентка Сара Џесика Паркер, која преку трогателна објава се прости од ликот што ѝ ја одбележа кариерата – Кери Бредшо.
Паркер на Инстаграм објави емотивно писмо во кое им се заблагодари на сите што ја создаваа серијата заедно со неа, но и на гледачите кои низ децении ја сакаа и навиваа за Кери – иако понекогаш и ја осудуваа.
„Кери Бредшо доминираше во мојот професионален живот цели 27 години. Мислам дека јас ја сакав најмногу од сите. Знам дека и другите ја сакаа. Беа фрустрирани од неа, навиваа за неа. Таа симфонија на емоции беше мојот најважен сопатник. Засекогаш сум благодарна“, напиша Паркер, потврдувајќи дека „ова поглавје е завршено“.
Таа додаде дека заедно со креаторот на серијата, Мајкл Патрик Кинг, заеднички одлучиле „И едноставно така“ да не добие нова сезона. Серијата, потенцира, била радост, авантура и најубавиот вид на тежок труд, во соработка со неверојатна екипа и повеќе од 380 членови на продукцијата.
„Се предаде на шеширите, книгите, чевлите, пријателките и ветувањето на нов ден во нејзиниот сакан град и со луѓето кои најмногу ги ценеше. Го носеше срамот, гордоста, честа, оптимизмот и буквално безброј фустани и здолништа. Се држеше за раце, надеж и најдоброто од луѓето“, додаде актерката за својот лик.
„И едноставно така“ повторно ги обедини Кери, Миранда и Шарлот во современиот Њујорк, но без Саманта (Ким Катрал), која се појави само во кратка сцена на крајот од втората сезона. Серијата се обиде да го балансира носталгичното со современи општествени теми, но реакциите од публиката и критичарите беа поделени. Некои го пофалија освежениот пристап и новите ликови (Сима, LTW), додека други ја критикуваа принудената атмосфера, дијалозите и недостигот од јасна наративна линија.
Сепак, гледаноста беше солидна, а крајот на третата сезона остави можност за продолжение – што сепак нема да се случи.
Оригиналната серија „Сексот и градот“ се емитуваше на HBO од 1998 до 2004 година, низ 6 сезони и 94 епизоди. Освои 7 Еми награди, 8 Златни глобуси и милиони обожаватели низ светот. Следеа два филма (2008 и 2010), а потоа и продолжението „И едноставно така“, кое започна во 2021 година.
Серијата беше револуционерна за своето време – отворено зборуваше за женската сексуалност, пријателството, модата и модерните предизвици на животот во големиот град. Кери, Миранда, Шарлот и Саманта станаа икони на поп-културата, а Њујорк – петтиот главен лик.
26 години по првата епизода, целата приказна – барем засега – добива крај.