Тwitter Inc во вторникот соопшти дека трајно го блокира профилот на боливудската актерка Кангана Ранаут, позната по нејзината ревносна поддршка за индискиот премиер Нарендра Моди. Технолошкиот гигант наведува дека таа ги прекршува правилата на компанијата кога станува збор за говор на омраза и повици за насилство.

Ранаут во понеделникот објави твит во кој го повика премиерот Моди да прибегне кон гангстерски тактики „за да го скроти“ главниот министер за Западен Бенгал, Мамата Банерџи, чија партија ги победи хинду- националистите на Моди на изборите минатиот викенд, за да ја задржи контролата врз државната влада во Калкута.

По изборите, партијата на Банерџи беше обвинета за насилни напади врз нејзините поразени противници, што таа ги негира.

Потврдувајќи дека профилот на Ранаут е суспендиран, Твитер ја објасни својата политика.

„Бевме јасни дека ќе преземеме силна акција за однесување што има потенцијал да доведе до штета надвор од социјалната мрежа.“

„Наведениот акаунт е трајно суспендиран за повеќекратно кршење на правилата на Твитер, конкретно на нашата политика за говор на омраза и злоупотребливо однесување.“

Меган, британската војвотка од Сасекс, следниот месец ќе објави детска книга под наслов The Bench (Клупа) за односот помеѓу татко и син, базирана на нејзиниот сопруг принцот Хари и детето на двојката, Арчи, објави во вторникот издавачот.

Книгата е најнов потфат на Меган и Хари, внукот на кралицата Елизабета, откако тие се повлекоа од кралските должности и се преселија во Лос Анџелес минатата година со Арчи, кој го слави својот втор роденден подоцна оваа недела.

Илустрирана од уметникот Кристијан Робинсон, „Клупата“ ќе биде објавена на 8 јуни, а Меган ќе раскажува верзија за аудиокнига, соопшти издавачот Random House Children’s Books.

„The Bench започна како песна што ја напишав за мојот сопруг на Денот на таткото, еден месец по раѓањето на Арчи. Таа песна се претвори во оваа приказна“, изјави војвотката.

„Се надевам дека оваа книга ќе одекне во секое семејство, исто како и во моето.“

Поп-пејачката Бритни Спирс во вторникот се осврна на неодамнешните документарни филмови за нејзиниот живот и кариера, нарекувајќи ги лицемерни затоа што ги повторуваат нејзините лични проблеми додека ги критикуваат медиумите кои првпат известувале за нив.

„Еф-икс“ мрежата на Волт Дизни и „Њујорк тајмс“ во февруари го објавија Framing Britney Spears. Документарецот го истражува метеорскиот подем на слава на Бритни како тинејџерка, медиумскиот надзор кој следеше потоа, како и нашироко објавуваниот и коментиран нервен слом.

И овој месец британската радиодифузна корпорација (Би-би-си) го објави новиот документарец „Битката за Бритни“ со оригинален наслов The Battle for Britney: Fans, Cash and Conservatorship. Во Велика Британија е веќе прикажан, а во САД и Канада ќе дебитира на 11 мај преку стриминг-услугата BBC Select.

Во објава на Инстаграм, Спирс директно не посочи кој документарец го коментира, но напиша „толку многу документарни филмови за мене оваа година со туѓи погледи на мојот живот“.

„Овие документарни филмови се толку лицемерни … ги критикуваат медиумите и потоа го прават истото“, додаде таа.

Во март, Спирс рече дека плачела две недели откако го гледала Framing Britney Spears.