Спорт
Гетџи: По мечот со Хабиб, мојата мајка конечно ќе може да се пензионира

Американската УФЦ-ѕвезда, Џастин Гетџи, вели дека мајка му ќе може да престане да оди на работа по неговиот саботен мегамеч против Хабиб Нурмагомедов на УФЦ 254 бидејќи тој ќе заработи доволно за да си ја осигури иднината.
Се очекува Гетџи да заработи над 3 милиони долари, без разлика дали ќе успее да го победи шампионот во лесна категорија, Нурмагомедов на Островот на борбите во Абу Даби. Неговата мајка Каролина, која по потекло е Мексиканка, работи во пошта.
„Моите родители никогаш не летале надвор од САД, а сега пристигнаа со бизнис-класа. Мојот татко Џон се пензионира пред неколку години откако 37 години работеше во рудник за бакар. А мојата мајка ќе оди во пензија по овој меч. Кога ќе почне мечот, тоа ѕвонче на почетокот ќе осигури таа да може да се пензионира по 35 години работа. Сите пари што ги заработуваа одеа кај мене и кај моите браќа и мојата сестра за да добиеме шанса“, вели Гетџи.
Американецот има скромно потекло од Сафорд, Аризона, каде што израсна со својата сестра и братот близнак и признава дека не било лесно.
„Живеевме на два часа од кој било град. Кога одевме да купуваме алишта за училиште, беше како празник за нас бидејќи возевме два-три часа. Знам колку финансиски им тежеше тоа и нема подобро чувство од тоа да си способен да го вратиш тоа“, вели Гетџи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Ѓоковиќ во елемент, го елиминира Зверев на Ролан Гарос

Новак Ѓоковиќ 12.пат во кариерата ќе игра во полуфиналето на Ролан Гарос. Во последното четвртфинале на вториот гренд слем во сезоната, Ѓоковиќ, по три часа и 17 минути, го победи третиот носител Александар Зверев со 3:1 (4:6, 6:3, 6:2, 6:4).
Српскиот тенисер го загуби првиот сет, но потоа влезе во својата „зона“ и целосно тактички го надигра германскиот тенисер. Клучниот удар што му ја донесе победата на Ѓоковиќ беше дроп-шот што го одигра речиси беспрекорно.
Како што одминуваше натпреварот, Зверев ја губеше енергијата. Најголемиот пад во играта на Германецот се виде од средишницата на третиот и раната фаза од четвртиот сет. Ѓоковиќ нанижа шест гема, вклучувајќи го и првиот во четвртиот сет со кој си го трасираше патот до победата.
Ѓоковиќ одржуваше континуитет во својата игра, доста високо ниво на тенис и го користеше секој удар на вистински начин.
Сепак, ќе мора да има нешто повеќе во следната рунда. Ѓоковиќ ќе игра против играчот број еден во светот, Јаник Синер.
Спорт
(Видео) Консеисао херој, Роналдо ја однесе Португалија во финалето на Лигата на нации

Португалија е првиот финалист на четвртото издание на Лигата на нации. Во првото полуфинале, Португалија го елиминираше домаќинот Германија со 2:1. Роналдо го постигна голот за победа, но играч на мечот беше Франсиско Консеисао.
Португалија по 25 години и пет порази во низа успеа да ја победи Германија. На ЕП во 2000 година Португалците славеа над Германија со 3:0 со хет-трикот на Серџо Консеисао, а вечерва неговиот син Франциско го иницираше пресвртот за победа.
Германците поведоа на стадионот во Минхен со голот на младата ѕвезда Флоријан Вирц во 48-та минута.
Португалците ја загубија топката во својата половина, а по елегантниот центаршут на капитенот Кимих, Вирц со глава ја испрати топката во мрежата.
Сепак, 15 минути подоцна, Португалија израмни со прекрасен гол на резервистот Франсиско Консеис.
Фудбалерот на Јувентус, само пет минути по влегувањето во игра, изведе одлична соло акција и со удар од околу 20 метри го совлада тер Штеген.
Пет минути подоцна Португалците го комплетираа пресвртот. Додавањето на Бруно кон Нуно Мендеш ја „пресече“ германската одбрана, левиот бек по земја го проигра Роналдо кој ја испрати топката во празната мрежа.
Роналдо, постигна гол за својата репрезентација по 137-ми пат.
Германија не успеа да се пласира во финалето на Лигата на нации ниту во четвртиот обид, додека Португалија ќе има можност да стане првата екипа со два трофеи во ова натпреварување.
Нивниот противник во финалето ќе биде победникот од дуелот меѓу Шпанија и Франција, кој ќе се игра во петок.
Спорт
Дончиќ од првиот ред го гледаше испаѓањето на Цибона од АБА лигата

Кошаркарскиот клуб Цибона прв пат во историјата испадна од елитаната дивизија на АБА лигата. Место во АБА лигата обезбеди Илирија.
По победата во првиот натпревар во Хрватска, словенечкиот тим оствари триумф во реваншот во Словенија со резултат 83:66, со што за прв пат обезбеди промоција во АБА лигата.
Во исто време, Цибона беше елиминирана од регионалното првенство за прв пат во историјата. Тимот од Загреб е еден од 12-те клуба што играа во првата сезона кога стигнаа до полуфиналето. Најголемиот успех го постигнаа во сезоната 2013/14 кога станаа шампиони со победата во финалето против Цедевита во Белград.
Винсен Голсон го предводеше домашниот тим со 22 поени и пет асистенции, Куреш додаде 20, а Микуш 14 поени и девет скока.
Кај Цибона, Иван Мајчуниќ се истакна со 22 поени и три скока и асистенции, но тоа не беше доволно. Ниту еден од неговите соиграчи немаше двоцифрен број на поени.
Натпреварот од трибините го гледаше Лука Дончиќ, кој пред повеќе од еден месец ја заврши сезоната во НБА лигата, откако ЛА Лејкерис испаднаа од Минесота во првото плеј оф коло во Западната конференција.
Таткото на Лука, Саша е генерален менаџер и советник на Илирија.