Македонија
(Видео) Сопрено уништувањето на Водно за гасоводот, работно тело ќе го преиспитува случајот
Владата, Акционерското друштво „Македонски енергетски ресурси“ (МЕР) и Град Скопје ќе го преиспитуваат последното уништување на зеленилото на Водно поради изградба на гасоводот. Од Град Скопје велат дека градежната механизација ангажирана од МЕР се искачила на Водно без најава и без одобрение отстранила дел од зеленилото. Градежните работи се стопирани.
„Градот Скопје не е поврзан со градежните активности што во изминатите денови беа забележани на сртот на планината Водно. Сакаме да нагласиме дека Град Скопје не беше запознаен со почетокот на градежните активности на посочената локација и апсолутно се спротивставува на уништувањето на зеленилото. По добивањето на информациите, Град Скопје веднаш реагира. Според процените, направена е минимална штета и во моментот градежните активности се целосно стопирани. Град Скопје, Владата на Република Македонија и МЕР ќе формираат работна група со цел надминување на ова недоразбирање и заедничко одлучување за натамошните чекори“, велат од Град Скопје.
Во вторникот минатата недела, в зори, четири багери се искачиле на Водно на местото кое шумарите го знаат како Бел Камен, над селото Чифлик, и почнале да го рамнат теренот. Уништено зеленило има по целиот пат што води до Бел Камен, каде што поминале багерите, а на местото каде што почнала подготовката на теренот за гасоводот, пак, откорнати се неколку борови. Израмнет е простор со должина од речиси 200 метри и ширина од 25 метри.
За изградба на магистралниот гасовод Скопје-Тетово-Гостивар е ангажирано друштвото „Рапид билд“ ДОО Куманово. Според објавата на Бирото за јавни набавки, оваа фирма треба за 28 милиони евра да ја изгради делницата од Скопје до Гостивар. Договорот со оваа фирма бил склучен во октомври 2010 година, но од МЕР не одговорија на прашањата дали механизацијата на Водно е на оваа градежна компанија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ДУИ откако е во опозиција ја смени песната, вели ВМРО-ДПМНЕ
„ДУИ треба да сфати дека мора да прекине со манипулациите. Едно зборуваа кога беа на власт, сега во опозиција друго. Да ги потсетиме ДУИ, кога беа на власт усвоија Стратегија за реформи во администрација за 2023-2030 година. Во истата констатираат дека балансерот како алатка се злоупотребува и треба да се укине. И Брисел порача и тоа јасно дека балансерот треба да се укине“, велат од ВМРО-ДПМНЕ.
„Како за ДУИ во 2023 година балансерот се злоупотребувал, а сега е неопходен?! ДУИ додека беше на власт беше преоптоварена со местење тендери, бизниси во четири очи, а наоѓаа време во државни институции да играат фудбал.
ДУИ додека беше на власт не ја интересираше што стотина илјади млади заминаа, што граѓаните лошо живееја.
Сега ја сменија песната затоа што се опозиција имаат слободно време и гледаат само како да напаѓаат.
Сега од ДУИ гледаат само како да направат незадоволство, да дестабилизираат, односно како да го одвлечат вниманието од главната тема, а тоа е дека нивните функционери треба да одговараат.
ДУИ има една цел нивните функционери да не одговараат на ниеден начин и тоа се спремни да го попречат по секоја основа.
На ДУИ им порачуваме дека нивните обиди за замајување на јавноста не поминуваат!“, соопшти ВМРО-ДПМНЕ.
Македонија
Продолжува работната посета на претседателот на Владата, Мицкоски во Берлин
Денес продолжува посетата која претседателот на Владата, Христијан Мицкоски, заедно со министерот за надворешни работи и трговија Тимчо Муцунски, министерот за внатрешни работи Панче Тошковски и министерот за европски прашања, Орхан Муртезани, ја имаат на Берлин, Сојузна Република Германија која е дел од таканаречениот Берлински процес.
Премиерот Мицкоски ќе има излагање во Стопанската комора на Германија (OA-Ost-Ausschuss der Deutschen Wirtschaft) каде ќе ги презентира економските планови и плановите за инвестиции во енергетиката и инфраструктурата и можностите за соработка и инвестиции на германските компании кои веќе се присутни на македонскиот пазар.
Министерот за надворешни работи и надворешна трговија ќе оствари средба со Аналена Бербок, сојузен министер за надворешни работи при што ќе одржат и заедничка изјава за медиуми.
Воедно ќе се оствари средба и со претставници од раководството на германската фондација Конрад Аденауер Штифтун. Ова е втор ден од посетата на Германија откако вчера премиерот Мицкоски оствари бројни средби со премиери на Влади и политички лидери вклучени во Берлинскиот процес. Тој оствари средба и со Германскиот канцелар Олаф Шолц при што беше потврдена германската поддршка за европските интеграции на државата.
Македонија
Здружението „Палиум“ реализираше настан за поддршка на палијативните пациенти
Здружението за поддршка на палијативните пациенти и нивните семејства ПАЛИУМ организираше донаторски настан „Со помагала да помогнеме“ како дел од Проектот на УСАИД „Партнерства за донирање“ кој го спроведува Здружението КОНЕКТ.
Целта на овој настан е да се соберат средства за отворање на првата изнајмувачница во државата на ортопедски помагала за палијативни пациенти. Оваа можност во огромна мера ќе им ја олесни грижата и третманот во домашни услови на семејствата со член кој е палијативен пациент.
Палијативната нега е медицински пристап кој има за цел да го подобри квалитетот на животот на пациентите кои страдаат од неизлечиви и терминални болести. Оваа нега се поврзува најчесто со онколошки дијагнози, но исто така се користи во напредна и терминална фаза на многу други болести. Огромниот број на палијативни пациенти во државата ја наметна потребата од оваа иницијатива.
На донаторскиот настан присуствуваше директорот на Фондот за здравство Г-н Сашо Клековски, претставници од Министерството за Здравство, Министерството за социјална политика, демографија и млади, Невладиниот сектор и вработени во здравството кои придонесоа да се отвори дијалог за важноста од подобрување на условите и можностите за оваа ранлива категорија на пациенти.
Како најургентни мерки за кои се дискутираше на настанот се издвоија: подобри можности за палијативна нега во домот и достапност на ортопедски помагала, советодавна линија за поддршка на палијативните пациенти и нивните семејства, а на Македонија час поскоро и е потребно усвојување на Национална стратегија за Палијативна грижа со оглед на нагорниот тренд на раст на случаите со малигни неоплазми.