Политика
Груевски од Вељуса најави нови 70.000 вработувања
Нови 70.000 вработувања, продолжување на субвенционирањето во земјоделството со вредност од 600 милиони евра во наредните четири години, како и проекти за младите предвидува Програмата „Реално“ на ВМРО-ДПМНЕ и коалицијата „За подобра Македонија“ која денеска пред жителите на струмичкото село Вељуса ги презентираше лидерот на партијата и носител на листата на кандидати за пратеници во ИЕ 4, Никола Груевски.
„Во 2006 година во Македонија беа вработени се на се 560.000 луѓе. Денес се вработени над 720.000. Планот ни е некаде до крајот на следниот четиригодишен мандат, до 2020 година, во Македонија да има приближно 800.000 вработени. Значи, да се отворат нови 70.000 работни места во Македонија“, рече Груевски.
Тој истакна дека покрај економијата и намалувањето на невработеноста, една од клучните области на која посветиле внимание и во изминативе години се извршиле големи промени е земјоделството бидејќи, како што истакна, тоа е еден од основните столбови на нашето општество. Подвлече дека во изминатите години распределени се над 62.000 хектари слободно земјоделско земјиште, а меѓу новите проекти го издвои „Рурални развојни зони“ со кој треба да се овозможи развој на руралните места и нови вработувања.
Со овој проект, кој ќе се спроведува во тек на пет години, секој кој ќе инвестира во производствен погон, хотел или слично, ќе биде ослободен од данок во наредните десет години, државата ќе покрие 10 проценти од неговата инвестиција, а за секое вработено лице ќе добие 2.000 евра, односно 4.000 евра за повторно вработен стечаец.
Со проектот „Рурални развојни зони“ може да биде опфатено и населеното место Вељуса.
Овој проект, истакна Груевски, е единствен во Европа кој нуди вакви субвенции. Меѓу проектите го издвои и реконструирањето на Домот на културата, а жителите ќе имаат корист и од изградбата на гасоводот Штип – Хамзали – Струмица – Гевгелија – грчка граница, кој треба да почне да се гради во почетокот на наредната година.
Во однос на поддршката за младите, Груевски најави дека покрај проектот „Купи куќа за млади до 35 години“ со кој досега станбеното прашање го решиле над стотина млади лица и кој се предвидува да продолжи, во наредниот четиригодишен период ќе се спроведува и проектот „Купи куќа за лица над 35 години“. Овој проект предвидува субвенционирање на ратите во износ од 65 проценти за првите седум години и 35 проценти субвенционирање за наредните три години.
Подвлече дека во Програмата „Реално“ се предвидуваат изградба на над 70 водоводни и канализациски мрежи во вредност од 60 милиони евра, изградба на три нови автопати, на шест експресни патишта, меѓу кои и патот Штип – Радовиш кој е од особено значење за жителите во струмичкиот регион.
Пред жителите на Вељуса Груевски говореше и за проекти што се спроведуваат во општина Струмица со цел подобрување на животниот стандард на околу 230.000 жители кои гравитираат кон овој регион.
Меѓу проектите ги посочи реконструкцијата на Општата болница, инвестиција вредна четири милиони евра, набавка на 125 апарати за здравствените установи во Струмица во вредност од околу еден милион евра, отворање на две градинки, изградба на затворен пливачки базен со олимписки ватерполо димензии, изградба на четири тениски терени, како и други спортски објекти. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски од Чаир: На Македонија ѝ треба обединување и единство, а не поделби, владата на ВМРО-ДПМНЕ ќе вложи 1 милијарда евра за проекти во сите општини
Се чувствува победничка атмосфера и енергија, тоа е важно за сите нас и ни дава мотив да продолжиме посилно да се бориме. Овие денови кои ни преостануваат треба максимално да се мобилизираме, а најновите анкети кои ги добив утрово велат дека ќе биде голема победата и на 24 април и на 8 мај, изјави претседателот на ВМРО-ДПМНЕ, Христијан Мицкоски на митингот во Чаир.
Мицкоски истакна дека сега во Македонија имаме политичка гарнитура која повеќе од две децении е на власт, тоа се ДУИ чија суштина се поделби и грабеж на народот.
– Кога ќе анализирате која е суштината на ДУИ, Али Ахмети и Артан Груби, Бујар Османи, Талат Џафери и останатите, кај нив нема ништо посебно тие само го делат народот по етничка основа и така опстојуваат. Дали некој може да се сети некоја добра работа која Али Ахмети и Артан Груби ја имаат направено, но можам да кажам десетици лоши работи, рече Мицкоски.
Мицкоски нагласи дека сега ДУИ сериозно ќе бидат изненадени на овие избори, а им се познава нервозата затоа што после 8 мај треба да одговараат за сето она што му го направија на народот, за целиот грабеж.
Мицкоски се осврна на проектите кои ги планира идната влада од ВМРО-ДПМНЕ и посочи дека се планира да се инвестира 250 милиони евра секоја година во општините, 1 милијарда во 4 годишен мандат.
– Во Чаир ќе има висока сума, еден од проектите е проширување на булеварското решение на влезот од Бит Пазар кон Чаир и тоа мора да се направи и го повикувам градоначалникот да се пријави со повеќе проекти. Тоа ќе додаде вредност во квалитетот на живеење. На Македонија и треба обединување и единство не поделба, потенцираше Мицкоски.
Мицкоски додаде дека идната влада на ВМРО-ДПМНЕ планира да отвори нови 55.000 работни места, да функционира со владеење на правото на целата територија и нема да има територии каде ќе владејат шерифи.
Да обезбедиме пристојни услови за поголем инвестициски бран и од странство и од домашни инвеститори за да може децата да останат тука. Мораме и тие кои си отидоа да ги вратиме назад. Да обезбедиме надеж. Ве повикувам на 24 април сите да се обединиме околу број 2 и да гласаме за Гордана Силјановска Давкова, а потоа да се обединиме и заедно на 8 мај да испишеме историја за коалицијата Твоја Македонија предводена од ВМРО-ДПМНЕ, изјави Мицкоски.
Македонија
Доц. д-р Бобан Карапејовски: Ќе обезбедиме вработување на најдобрите 200 студенти, како и стипендии од 500 евра месечно
Носителот на листата на кандидати за пратеници во ИЕ 1, Бобан Карапејовски на денешната прес конференција рече дека во програмата на Движењето ЗНАМ – За наша Македонија за парламентарните избори, наречена „Проглас за достоинствена Македонија“ еден од приоритетите се образованието и науката, кои се суштински за градењето силна и просперитетна држава.
„Во Прогласот за достоинствена Македонија на Движењето ЗНАМ – За наша Македонија, предвидовме два сегменти: зголемување на достоинството на вработените во образованието и во науката и поставување нов систем, со кој овој сектор ќе се врати во фокусот и ќе помогне во создавањето функционално писмен и високообучен кадар, како и продлабочување на
научните истражувања“, рече Карапејовски и додаде: „Во однос на првиот постулат, достоинството на вработените во образовниот сектор, е предвидено платите на наставниците и на професорите да се зголемат до 100 % од актуелните. И, тоа е најмалку што можеме да направиме за да му го вратиме угледот на учителот и да ги привлечеме најдобрите да бидат
даскали на нашите деца“.
Тој потенцира дека за најдобрите студенти ќе се обезбедат стипендии во износ од 500 евра месечно, а за најдобрите двесте студенти вработување во научните и во институциите на системот.
„Партиските вработувања мора да запрат! Не смее партиската книшка да биде услов за вработување. На универзитетите и во државните институции треба да работат најдобрите за најдоброто за сите нас. Ни треба научен подмладок веднаш, како и
ревизија на условите и зголемување на квалитетот на акредитираните универзитети, кои се множат на секој чекор, а не даваат квалитет“, рече тој.
Карапејовски рече дека наставните програми и планови ќе се усогласат со модерните технологии и достигнувања и појасни дека ќе се изгради систем што ќе поттикнува креативно, аналитичко и логичко размислување кај учениците, но и ќе поттикнува креативност во областа на бизнисот и на финансиската едукација. Учебниците ќе бидат усогласени со новите наставни планови и програми и напишани од најдобрите автори, навреме доставени до учениците.
Тој исто така рече дека издвојувањата од буџетот за науката ќе се зголемат, а ќе има и посебни стимулации за оние што успеваат да објавуваат во најпрестижните списанија и да соработуваат со колегите од најдобрите светски универзитети, како и посебни субвенции за таканаречните национални дисциплини.
Македонија
Пендаровски: Ги знам нивните лажни анкети, ги знам и реалните анкети и реално ви кажувам дека на 8 мај победуваме!
На само неколку дена пред првиот круг на гласање, од Скопје кандидатот за претседател Стево Пендаровски искажа верување дека по повеќе од три децении независност, македонските граѓани многу добро знаат да препознаат чија програма е реална, а која е во расчекор со времето во кое живееме.
„Овој претседател и оваа политичка гарнитура никогаш не давале лажни надежи и ветувања за брза реализација на стратешките цели на државата. И денес пред вас, не велам дека Македонија за само неколку години ќе биде најразвиената држава во Европа, не ветувам дека целиот тој процес ќе трае само неколку месеци, но, говорам и повторувам секаде дека најголемиот ризик е ако на изборите им дадеме шанса на оние за кои претходно веќе видовме како владеат со луѓето цели 11 години“, истакна Пендаровски.
Пендаровски денеска повика на масовна излезност на 24 април и на 8 мај, за како што рече, да не се враќаме во режим.
„Ги знам нивните лажни анкети, ги знам и реалните анкети и реално ви кажувам дека победуваме на 8 мај. Со заокружување на бројот 1 продолжуваме кон Европа и кон развиениот свет и дефинитивно не се враќаме назад во режим и заробена држава“, рече Пендаровски.