Македонија
Вонредната собраниска седница продолжи со меѓусебните обвинувања
Вонредната собраниска седница посветена на поплавите во скопскиот регион во кои на 6-ти август животите ги загубија 22 лица, продолжи во неделата во попладневните часови со меѓусебните обвинувања, при што опозицијата по чија инцијатива е свикана седницата, бара да се одложат сите владини непродуктивни трошоци и да се спречат сите градби во коритото на реката Вардар, вклучително и Панорамското тркало кое веќе почна да се гради и тие пари да се пренасочат во поплавените подрачја, предлага опозицијата, додека пратениците од владејачкото мнозинство велат дека сега е време кога треба да се дејствува наместо преку барање одговорност да се прават обиди за пропаганда.
Стефан Боговоев од опозициската СДСМ во продолжение од седница истакна дека институциите потфрлиле и затоа треба да има одговорност. Според него, институциите и законите не функционираат туку сето се одвивало по партиски наредби и затоа мора да има политичка, но и кривична одговорност.
За тврдењата дека имало големо невреме со дожд, посочи на сличното невреме лани во Речица кога исто така имаше жртви и штети. Според него, не е точно ниту тврдењето дека невремето на 6-ти август било појава што се случува еднаш на илјада години. Споредуваше со невремето што неодамна погоди Франција каде што наврнале 350 литри дожд за неколку часови, но надлежните се справиле со состојбата. Како одговорни институции за последиците од невремето во Скопско ги посочи УХМР, ДЗС и ЦУК.
„Не беа формира итни тимови за интервенција, не се обезбедени резерви со храна по 5.000 илјади оброци за период од 30 дена како што предвидува законот“, рече Богоев.
Му забележа на градоначалникот на Скопје, Коце Трајановски, дека се трошат огромни суми на проектот Скопје 2014, продолжува изградбата на Панорамското тркало, се најавува изградба на забавен парк, а не се прави канализациска инфраструктура.
„СДСМ предлага неколку итни мерки: да се донесе одлука за запирање на непродуктивните трошоци, да се стопираат изградбата на Панорамското тркало и владиното рекламирање, да се пренаменат средства за обесштетување и санација на штетите и за превенција, на настраданите да им се даде итна помош по 3.000 евра независно од помошта што ја обезбедува Владата, како и итна евакуација на населението за да се изврши дезинфекција и чистење на домовите. Активностите, според СДСМ, треба да ги водат експерти и професионалци стручни во својата област, а не политичари“, рече Богоев.
На неговите забелешки реплицираше пратеникот Драган Данев од владејачката ВМРО-ДПМНЕ кој истакна дека невремето е најголема катастрофа во Македонија по 1963 година. Ја посочи одлуката на Владата за 100-процентна отштета на настраданите и ги отфрли критиките за задоцнета реакција на институциите, особено на МВР и АРМ.
И Крсте Мукоски, од владејачкото мнозинство, рече дека очекувал на седницагта да нема меѓупартиски препукувања и печалење ситни политички поени, туку да се донесат заеднички заклучоци.
„На 6-ти август се случи катаклизма што не можел никој да ја предвиди или превенира, а наврнала вода колку две езера Матка. Надлежните, беа на терен уште истата вечер и им помагале на настраданите“, рече Мукоски.
Претходно Антонио Милошоски, исто така, од ВМРО-ДПМНЕ запраша дали оваа катастрофа „ќе ни ги отвори очите и ќе ни помогне да се зближиме и сплотиме“.
„Државата и институциите покажаа дека стојат зад граѓаните и дека не прават никаква селекција. Беше помогнато во секој дом, без разлика какво презиме носи сопственикот или која политичка опција му е поблиска. Некои се обидуваат да внесат раздор преку оваа временска непогода и да ја претворат во нова политичка криза. Но, овој пат важно е да не дискутираме премногу, туку да се солидаризираме со жителите кои се најзагрозени“, рече Милошоски.
Беким Фазлиу од опозициската партија на Албанците во Македонија ДПА ги обвини владејачките функционери дека прават, како што рече, „фотосесии во настраданите подрачја“.
„Вие сте платени од народот да помогнете и никому не му правите чест со тоа што ќе се појавите таму и ќе се сликате. ДУИ раководи со министерството за екологија, а еден канал не сте подготвени да исчистите. Секој споменик можеше да биде еден одводен канал. Дали можете еднаш да помогнете, а сликите да не ги споделите на социјалните мрежи“, рече Фазлиу, кој побара политичка, морална и кривична одговорност за институционалните пропусти.
Според Џевад Адеми од ДУИ, албанската партија која е во владината коалиција, има место за одговорност и за анализи зошто потфрлија институциите, но според него сега е клучно прашањето како да се надмине актуелната ситуација.
„За санација на последиците неопходни се две нешта: раката на државата и манифестација на солидарноста. Не сум адвокат на Владата. Тие си ја вршат работата и за она што ќе го направат добро можеби ќе бидат пофалени, а за пропустите можеби ќе бидат казнети. Но, што правиме ние? Ангажирани се стотици млади доброволци кои им помагаат на семејствата. За тие семејства ќе значеше многу повеќе една лопата во рацете на секој пратеник отколку десетминутна дискусија, колку и да е таа паметна. Пропагандистичкиот ефект на оваа седница е нула, бидејќи настраданите немаат време да гледаат телевизија“, порача Адеми.
Предложи во заклучоците од седницата да влезе и одредба според која сите пратеници ќе одвојат по една месечна плата за помош на настраданите.
Пред почетокот на претресот, зборуваа и министрите за одбрана, за внатрешни работи, за транспорт и врски и за екологија – Зоран Јолевски, Митко Чавков, Владо Мисајловски, додека министерот за труд и социјална политика Диме Спасов не беше присутен во салата во моментот кога требаше да има обраќање.
Седницата треба да заврши со усвојување соодветни заклучоци за помош во кризните подрачја, што потоа ќе треба да ги спроведат Владата и надлежните институции./крај/мф/бс
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
МВР: Во Чашка приведени две лица поради сомнеж за изборен поткуп – фатени се со пиштоли, списоци и пари
Денеска во 15.20 часот полициски службеници од Одделението за криминалистичка полиција при СВР Велес го приведоа И.И.(52) од село Мелница, општина Чашка.
При претрес во неговиот дом, извршен со наредба од Основен суд Велес поради основи на сомнение за кривично дело ” поткуп при избори и гласање” по член 162 од КЗ биле пронајдени и одземени еден пиштол „Застава” со две рамки, 58 куршуми и 4 зрна-испукани проектили кои ги поседувал без дозвола, како и копија од преглед на гласачи за изборно место во Чашка.
И.И. бил приведен во полициска станица, известен бил јавен обвинител и по документирање на случајот против него ќе биде поднесена соодветна пријава.
Исто така денеска, во 17.00 часот, полициски службеници од Одделението за криминалистичка полиција при СВР Велес го лишиле од слобода А.Ч.(50) од село Мелница, општина Чашка.
При претрес во неговиот дом извршен со наредба од Основен суд Велес поради основи на сомнение за кривично дело “поткуп при избори и гласање” по член 162 од КЗ биле пронајдени и одземени еден пиштол ,,Валтер” со една рамка, еден пиштол „Црвена застава”, еден пиштол „Бул” со една рамка, 139 куршуми, мобилен телефон, 986 670 денари во разни апоени и 2 325 евра во разни апоени.
А.Ч. бил задржан во полициска станица, известен бил јавен обвинител и по документирање на случајот против него ќе биде поднесена соодветна пријава.
Македонија
Ковачевски: Ние сме вистинските социјалдемократи, ЗНАМ се лажни и измислени во Белата палата
Со испраќање на порака за здружување на силите на патот кон Европската Унија, Социјалдемократскиот Сојуз на Македонија вечерва го одржа завршниот митинг во Скопје, непосредно пред изборите закажани за среда.
Претседателот на СДСМ, Димитар Ковачевски, на присутните граѓани им порача дека двојните избори на 8-ми се последниот повик за Европа и од тоа, нема да се откажат.
„Исто како што не се откажавме изминативе седум години кога се соочивме со многу предизвици. Кога се боревме со сите кризи, со пандемијата, со инфлацијата, со енергетските проблеми! Знаете и самите дека имавме многу подеми и многу падови. Но, во ниту еден момент, ниту се откажавме, ниту се предадовме, ниту се повлековме. Бевме рамо до рамо со граѓаните“, изјави на митингот претседателот Ковачевски.
Ковачевски додава дека во време на СДСМ платите се золемиле за 120 отсто, а пензиите за 55 отсто, со антикризни мерки во висина од над 2,6 милијарди евра и 2,5 повеќе странски директни инвестиции со подобри платени работни места.
„И ова, не е мала работа. Многу поголеми и поразвиени земји од Македонија едвај излегуваа на крај со кризите, а ние единствени од цела Источна европа успеавме да го зголемиме животниот стандард на граѓаните. Тоа го потврди и реномиран виенски економски институт. И горди да бидете сите на тоа, затоа што сите вие дававте поддршка на тие политики кои ги водеше СДСМ, и коалиционите партнери од коалицијата з аевропска иднина. И бидете горди што покажавме на дело дека социјалдемократијата и СДСМ, беа оние кои ги заштитија граѓаните, кои буквално ја спасија земјата од колапс“, посочи Ковачевски на вечерашниот митинг.
Солидарноста, заедништвото, социјалната држава и правдата, потенцира претседателот Ковачевски, се оние кои помогнаа да се извлечеме од хаосот кои го носеа кризите, но и ни овозможија да одиме напред и да постигнеме одлични резултати.
„Бидете горди што покажавме јасно дека социјалдемократијата не е само идеологија на хартија, туку е единствен начин како општеството и државата да се подобрат и да обезбедат прогрес и просперитет.
И денес имам уште една можност да порачам дека вистинските социјалдемократи се овде, тука на овој плоштад. Во моментов се и на плоштадот во Битола, не се вистински социјалдемократи оние лажните кои се ујдисаа со наследниците на Ванчо Михајлов и кои заедно со него планираат да им зададат удар на вистинските социјалдемократи. Ама овие социјалдемократи се направени и настанале 1943 година, а оние социјалдемократи оние кои лажно се претставуваат дека знаат што е социјалдемократија па затоа се крстиле веројтно и ЗНАМ тоа се лажни и измислени 2021 година, во Белата палата на 200 метри од тука. Бидете горди затоа и што СДСМ е единствената социјалдемократска опција, граѓанска партија, партија со традиција, партија која е длабоко вкоренета во историјата на Македонија.
Бидете горди и затоа што ние никогаш не сме се откажале кога требало да се донесат тешки одлуки за државата да оди напред. “, им порача Ковачевски на скопјани.
Тој ги наведе зачленувањето во Обединетите Нации, добивањето на кандидатски статус на Македонија за влез во Европската Унија и зачленувањето во НАТО како тешки, но исправни одлуки што се донесени во време кога СДСМ била на власт и порача дека исто така СДСМ заедно со граѓаните, ќе ја внесе земјата и во ЕУ.
Македонија
Пендаровски: Граѓаните да размислат кому ќе ја дадат довербата в среда, ако ВМРО-ДПМНЕ се дограба до власт последиците може да се непоправливи
Кандидатот за претседател Стево Пендаровски вечерва во Скопје го одржа завршниот митинг во рамки на претседателската кампања и притоа истакна дека е сигурен дека на 8 мај, ќе се извојува двојна победа, како што рече: „не за нас, за сите вас“.
Тој ги повика скопјани, но и сите граѓани на Македонија да размислат кому ќе ја дадат довербата в среда бидејќи ако се дограба ВМРО-ДПМНЕ до власт, последиците можат да бидат непоправливи и на среден и на долг рок, бидејќи според него тоа се луѓе без искуство, без политичко искуство да водат држава, да водат град или општина.
„Кога ќе ги прашате што ќе правиме со нашето членство во НАТО, кое самите во својата програма го ставија како најголема вредност и најголема контрибуција за безбедноста на Македонија, тие велат ќе го почитуваме Преспанскиот одговор, но никогаш нема да изговориме Северна. Да го кажува ова дете од претшколска возраст па и ќе се насмеете. Кога го кажува возрасен човек, професор на факултет, кандидат за највисоката политичка функција, а тоа го повтори и денеска на последниот дуел кој го имавме, единствено ви останува да ја жалите госпоѓата“, додаде Пендаровски.
Тие, продолжи Пендаровски, немаат ниту еден конкретен одговор за нашите најголеми стратешки проблеми и дилеми.
„Велат немало да ја менуваат Европската преговарачка рамка, таа ќе останела како што е. Меѓутоа ќе барале за возврат од Бугарија да исполнува одлуки на судот во Стразбур. Кога ќе и предочите на госпоѓата дека не е можно од 1957 кога е направена ЕУ, до ден денешен земја која е кандидат, која не е членка, да условува земја која е членка на ЕУ, што е азбука во сите меѓународни организации и кога ќе и кажете дека солидарноста меѓу земјите членки е примарна, не кон оние кои не се членки, таа само превртува со очи и буквално ништо не ви одговара“, рече Пендаровски.
Осврнувајќи се на изјавите на неговата противкандидатка дека Рамковниот договор го надминал времето, Пендаровски истакна дека Македонија ќе опстои исклучиво како заедница на потполно рамноправни граѓани.
„Кога имате работа со луѓе кои за, а сите знаеме колку мртви колку повредени, колку инвалиди, колку деструкција имавме во таа 2001 и дека тие рани ден денеска не можеме да ги залечиме, тоа значи дек тие луѓе немаат осет во каква држава живеат, каква е популационата структура. Ако можело да функционира 23 години, не гледам причини да одиме по овие забегани теории, заговори и личности кои тврдат дека имале подобри решенија“, подвлече тој.
Истакнувајќи дека граѓаните на Центар имаат голем креативен, демократски потенцијал, тој ги повика на 8 мај масовно да се мобилизираат и да покажат дека знаат да се грижат за себе и за иднината на своите деца.
„За да ја зацементираме иднината на Македонија на магистралата која води кон Европа и развиениот свет, со заокружување на бројот 1, во масовна бројка да им покажеме на ова кои ја замислуваат Македонија само како нивна, приватна држава дека нема да успеат. Нема да успеат! За број 1, на 8 мај, на двата избора“, заклучи Пендаровски.