Утрово најстудено било во Берово каде што се измерени -6 степени, -5 било во Скопје-Петровец, -4 во Скопје-Зајчев Рид и Тетово, -3 во Крива Паланка, Штип и Струмица, -2 во Велес, Битола и Демир Капија, -1 во Кавадарци, Прилеп и Виница, 0 во Попова Шапка, Претор и Охрид, 1 во Крушево и Маврови Анови, 2 во Гевгелија.

Висината на снежната покривка во 7 часот утрово изнесувала 48 сантиметри во Попова Шапка и 42 во Маврови Анови.

Времето во текот на ноќта и изутринава
Малку до умерено облачно, а утрово по одделни котлини има појава на слаба магла и ниска облачност. Во западните делови, дуваше умерен, на планините повремено засилен ветер од југозападен правец.

Времето денеска
Претпладне студено со појава на слаба магла и ниска облачност по одделни котлини. Преку денот сончево со мала до умерена локална облачност. Ќе дува слаб, наместа умерен ветер од јужен правец. Максималната температура ќе достигне од 6 до 12 степени.

Во Скопје претпладне во делови од котлината со појава на слаба магла, преку денот сончево и претежно тивко со мала до умерена облачност. Максималната температура ќе достигне до 7 степени.

Православните христијански верници во Македонија денеска го слават Бадник, ден пред големиот празник Рождество Христово – Божиќ. Овој празник ја носи радоста на Христовото раѓање и се одбележува со традиционални обичаи.

Одбележувањето на Бадник во Скопје ќе започне пред Соборниот храм „Свети Климент Охридски“ и ќе биде организирано од Здружението на граѓани „Одбор за традиционална прослава на Бадник“. Кум на оваа годинашна прослава е Радомир Макеларски, кој ќе го понесе ќупот за Бадник 2025, а здравичар е Атанас Петров, кој на платото пред Соборниот храм ќе ја изрече традиционалната здравица во пресрет на Божиќ.

Во текот на денот, свештениците од Соборниот храм ќе ги осветат нафората и чајот, како и бадникарските гранчиња, кои ќе им се делат бесплатно на присутните. Овие гранчиња, кои годинашните кумови и здравичарот традиционално ги набраа на падините на Водно, се симбол на среќата и здравјето на семејството. Со мотото „Пренеси ја Божиќната радост до секое срце!“, децата на Бадник ќе организираат поворки во Скопје и други градови низ земјата, пејќи ја песната „Вечниот Бог“.

Еден од најзначајните настани во Скопје ќе биде формирањето на најдолгата бадникова поворка, која ќе тргне пред Музејот на Град Скопје и ќе се движи низ улицата „Македонија“. Поворката ќе заврши на Плоштадот во Скопје, каде што ќе се одржи голем Божиќен концерт и креативни работилници за децата, на кои секое дете ќе може да изработи своја ѕвезда, што ќе ја зачува за следната година. За сите деца ќе бидат подготвени повеќе од 3.500 коледарски пакетчиња.

Во текот на Бадниковата вечер, семејствата го почитуваат обичајот на заедничка вечера. Трпезата е богата со посни јадења, а домаќинот ја благословува пред да почне вечерата.

Обичајот бара дел од храна да се остави за Бога и куќата. За здравје на семејството, во огнот се става бадниково гранче, што се смета за најздраво дрво. Гранчињата се украсуваат во домовите, како симбол на среќата, љубовта и светлината, кои треба да ја исполнат нивната празнична атмосфера.

Овие обичаи го носат духот на Божик и ја потврдуваат радоста и заедништвото кои се основа на празнувањето на Христовото раѓање.

Непотпишувањето на Указот за воведување на двојазични лиценци во градинките од страна на претседателката Сиљановска, Левица смета дека е во рамките на уставно-правните норми и заштитата на македонскиот јазик како кохезивен фактор во Републиката, се вели во соопштението на партијата.

„Потсетуваме дека измените на овој Закон, власта на ДПМНЕ-ЗНАМ-ВРЕДИ ги донесе со флагрантно кршење на собраниските процедури, преку скандалозен шверц на ненадлежната Комисија за енергетика. Пратениците на Левица уште на комисиската расправа реагираа дека Законот за двојазични лиценци мора да биде повлечен, но самоволието на владејачкото мнозинство, сепак, го усвои ваквото срамно законско решение.

Намерата за воведување двојазични лиценци е излегување вон границите на Рамковниот договор и од уставните норми со кои се гарантира употребата на македонскиот јазик како единствен службен јазик на ниво на целата територија на Република Македонија!

Политичко лицемерие е власта на Мицкоски да носи закони кои се темелат врз неуставниот Закон за двојазичност, донесен од режимот на Заев и Ахмети – Закон за кој Уставниот суд закажа и подготвителна седница за оценување на уставноста.

Левица бара од актуелната власт на ДПМНЕ целосно да го повлече од постапка овој предлог-закон, затоа што токму партијата на Мицкоски во опозиција тврдеше дека со ваквите постапки се воведува неуставна двојазичност на територијата на целата држава, додека македонскиот јазик од службен јазик се дерогира на јазик кој го говорат заедниците“, соопшти Левица.