Германската влада во вторникот, реагирајќи на рекордниот број бегалци и имигранти, по итна постапка донесе пакет законски промени во врска со односот кон лицата кои поднесуваат барање за азил, со коишто, меѓу другото, се предвидува и строг однос кон економските имигранти, како и за барателите на азил од западен Балкан.

„Германија со месеци е изложена на приливот бегалци кои бараат безбедност пред војната, прогоните. Бројот бегалци е без преседан и за соочување со предизвиците појавени во оваа ситуација, потребно е да се забрза постапката со носење на одлуката за право на азил на поединци. Неопходно е да се поедностави и постапката протерување на лицата на коишто им е одбиено барањето, но и да се отстранат факторите кои водат кон пораст на неоснованите барања за азил“, се вели во предлог законот кој го потпишал германскиот министер за внатрешни работи Томас де Мезиер од владејачката Христијанско-демократска унија CDU на канцеларката Ангела Меркел.

Предлог законот, кој по итна постапка би требало да мине низ парламентарна постапка, предвидува прогласување на други земји од западен Балкан за сигурни. Покрај Македонија, Босна и Херцеговина и Србија, во иднина и Албанија, Косово и Црна Гора, би биле дефинирани како земји со ткн сигурно потекло. Тоа овозможува забрзана постапка при решавањето на барањето за азил од лицата кои доаѓаат од споменатите земји, што по правило значи и побрзо одбивање и протерување.

Барателите на азил во Германија во иднина би биле сместени во примарни центри за прифаќање, каде што би ја чекале одлуката по нивното барање за добивање азил и каде што би требало да биде примана исклучиво материјална, а не парична помош како досега. Токму паричната помош се смета за еден од главните поттикнувања за имигрантите, особено од западен Балкан, за доаѓање во Германија.

Од друга страна, на лицата коишто имаат добри изгледи за стекнување право на политички азил би требало да им биде овозможен забрзан пристап до интеграциските курсеви и побрзо вклопување на германскиот пазар на трудот. За квалификуваната работна сила по три, а за неквалификуваната после 15 месеци.

За законот треба да се расправа веќе во четврток во Бундестагот, а се очекува дека на сила може да стапи кон крајот на октомври или почетокот на ноември.

Германската опозиција и хуманитарните организации го критикуваа новиот пакет мерки предложен од коалициската демохристијанско-социјалдемократска влада на Ангела Меркел како „бирократски и неефикасен“. Партијата Зелени на министерот за внатрешни работи Томас де Мезиер му префрла дека „на мала врата“ го заострил законот за азил.

Од друга страна, пак, некои демохристијански политичари барат дополнителни мерки со коишто би ги намалиле поттикнувањата коишто економските имигранти ги привлекуваат во Германија. Еден од предлозите е и бегалците без шанси да добијат право на азил да се одбиваат и да се протеруваат во нивните татковини уште на самата граница, како што тоа е веќе практика на аеродромите, што во вторникот го предложи и министерот де Мезиер./крај/мф/сн

Извор: Hina