Како што минува времето, мистеријата за гробницата во Амфиполис останува нерешена, а се појавуваат нови прашања и теории на заговори, пишува Greek Reporter.

Прашањето „кој е закопан таму“ сега се претвори во прашањето „зошто сега а не порано“, а јавноста е бомбардирана од секаков вид на теории и лични мислења.

„Обратниот оптимизам“ на грчкиот премиер Андонис Самарас се интепретира на многу начини. Всушност, ова звучи и сомнително, имајќи го предвид тонот на неговите изјави по првичната посета на гробницата. Како што ископувањата и откритијата стануваа се понејасни, така и тој тон се намали, а претходниот оптимизам се замени со непријатна тишина, стои во текстот на Greek Reporter.

Сепак, откривањето на големиот споменик може да има политичко и историско значење, особено во поглед на тајмингот и на локацијата. Додека се повеќе археолози се сигурни во тоа дека во гробницата лежи член од фамилијата на Александар Велики, нашите северни соседи ПЈРМ брзаат да постават восочни фигури од Александар Велики и Филип Втори во скопскиот Археолошки музеј. И воопшто не доаѓа како изненадување тоа што Скопје бараше да учествува во ископувањата, бидејќи Амфиполис е дел од Македонија, но Атина го одби ова, потсетува Greek Reporter.

Последните очајни напори на Скопје да ја направи Македонија своја „татковина“ и да го направи Александар Велики нивен предок, се совпаѓа со нивните напори да го добијат спорот со Грција. Посредникот на ОН, Метју Нимиц во моментов ги притиска двете земји да дојдат до заедничко прифатливо решение за името. Грција веќе ја загуби битката околу терминот „Македонија“ во името, а грчките политичари сега се мачат за да му додадат географска одредница на терминот „Македонија“, пишува Greek Reporter.

Нимиц наводно му го предложил името „Горна Македонија“ на премиерот Никола Груевски по октомвриската посета на земјата, а посредникот на ОН наскоро ќе има состанок со двете страни во Њујорк, во обид уште еднаш да го реши овој спор, стои во текстот.

Замислете што би се случило доколку гробот во Амфиполис му припаѓа на некој важен член од фамилијата на Александар Велики. Заедно со гробот на Филип Втори во Вергина, гробницата во Амфиполис ќе биде понатамошен доказ дека Македонија 100 процентно им припаѓа на Грците, а Грција ќе влезе во преговорите со уште еден преговарачки аргумент, смета Greek Reporter.

Нажалост, нашите НАТО и ЕУ сојузници отворено го поддржуваат членството на ПЈРМ во евроатланските институции. Поранешниот грчки премиер, Костас Караманлис наводно беше „избркан“ од грчката премиерска функција откако и кажа „не“ на ПЈРМ за членството во НАТО во 2008 година. Исто така, германската канцеларка Ангела Меркел сака да ја прифати ПЈРМ во ЕУ, а исто така имаше тврдења дека грчкиот амбасадор во Германија токму поради ова прашање си поднел оставка, пишува Greek Reporter.

Според ова, не би било погрешно доколку постојат сомневања оти НАТО и ЕУ вршат притисок врз Владата на Самарас да ги одложи ископувањата додека траат преговорите меѓу Атина и Скопје. Сомнително е и тоа што археолозите знаеле со децении за оваа гробница, но не пристапиле порано кон ископување на истата. Фактот што работите досега чинеа само 590 илјади евра (од кои 250 илјади се донации) е исто така сомнително, а Грција досега била далеку подарежлива за помалку значајни откритија.

Одредени анализи велат дека гробницата во Амфиполис се користи за да не дојде до ескалација на испадите на грчките националисти уште од раните 90-ти, кога за прв пат се појави проблемот со Скопје. Се вели дека и владите на ПАСОК, а потоа и на Нова Демократија го намалиле финансирањето за ископувањата во таа област. Дури и за време на големиот просперитет на Грција, многу малку средства се одвојувале за ископувањата во Амфиполис, а Костас Симитис, кој беше премиер од 1996 до 2004-та година, целосно ги сопре ископувањаа во оваа област, кои потоа повторно започнаа во 2009-та година, по голем притисок од археолозите, коментира Greek Reporter.

Што се однесува до првичниот ентузијазам на грчката Влада, тоа беше соодветно одвлекување на вниманието на грчкиот народ во време кога беше воведен новиот данок на имот, и кога Нова Демократија спроведуваше изборни анкети, заклучува Greek Reporter./крај/мф/бс