За трагедијата во која 71 бегалец најверојатно се задушил во камион напуштен на автопатот во Австрија тамошната полиција ја сомничи бугарско-унгарска криумчарска група, а во водите кај Либија се стравува дека во бродската хаварија се удавиле 200 мигранти.

„Во камионот е откриено 71 тело, 59 мажи, осум жени и четири деца, од кои едно тело е на девојче на возраст меѓу една и две години, како и на три момченца на 8, 9 и 10 години. Документите коишто ги пронајдовме упатуваат на тоа дека потекнуваат од Сирија“, изјави на прес-конференцијата Ханс Петер Доскозил, началник на полицијата во покраината Градишче, каде што во четвртокот утрото беше пронајден камионот.

Напуштениот камион е пронајден на помошната лена на автопатот во источна Австрија, во близина на унгарската граница. Првата процена беше за 20 до 50 тела објавена во четвртокот, а броењето на телата било отежнато поради тоа што биле во поодмината фаза на распаѓање.

Камионот од 7,5 тони бил регистриран во Унгарија, а судејќи според рекламното лого на каросеријата ѝ припаѓал на словачка фирма за продажба на живина. Според сознанијата на австриската полиција, несреќниците биле просто натрупани во приколката на камионот, а возачот и покрај барањата на бегалците не го сопрел воопшто возилото од српската граница сé до Австрија.

Австриската полиција се сомнева дека зад оваа трагедија стои некоја бугарско-унгарска криумчарска група. Доскозил рече дека три лица се уапсени во Унгарија поради поврзаност со овој настан. „Мислиме дека пронајдовме трага“, истакна.

Еден од тројцата е бугарски државјанин со либанско потекло, и е наводно сопственик на камионот. Другите двајца, Бугарин и маж со унгарски пасош, „речиси сигурно се возачите“ на камионот, додаде Доскозил,

Во петокот претставник на либиската Црвена полумесечина објави дека се пронајдени телата на 82 луѓе кои морето ги исфрлило на брегот, откако пренатрупаниот брод со бегалци потона набрзо по испловувањето од градот Зувара. „Повеќе од сто се сметаат за исчезнати“, изјави Ибрахим ал-Атуши, додавајќи дека 198 луѓе се спасени.

Бродот потонал набрзо по испловувањето од Зувара, главниот центар во Либија од каде што криумчарите на луѓе ги транспортираат бегалците од субсахарска Африка кон Италија. Наспроти првичните процени од четвртокот дека на бродот имало околу 200 бегалци, во петокот властите објавија дека со него до европскиот брег се обиделе да стигнат двојно повеќе луѓе, од кои многумина останале заробени под палубата кога пловилото се превртело и почнало да тоне.

Италијанската крајбрежна стража соопшти во петокот дека 1.430 луѓе се спасени од морето во четвртокот во неколку операции на спасување пред либискиот брег./крај/мф/сн

Извор: Макфакс