Европа
Западот го бојкотира Путин и парадата за победата над фашизмот
Пред 70 години сите заедно се бореа против нацистичка Германија, но Русија оваа година победата во Втората светска војна ќе ја одбележи без западните сојузници, пишува AFP.
Списокот на присутните, а посебно на отсутните на воената парада која ќе се одржи на 9-ти мај во Москва, сведочи за степенот на влошувањето на односите меѓу Русија и Западот, кои пред помалку од една година беа заедно на плажите на Нормандија, на одбележувањето на 70-годишнината од пристигнувањето на сојузничките сили во Втората светска војна.
Кремљ може да смета на кинескиот претседател Си Џинпинг и на лидерот на Северна Кореја, Ким Џонг-ун, на кого ова ќе му биде прва официјална посета во странство. На парадата се очекуваат и грчкиот премиер Алексис Ципрас, чешкиот претседател Милош Земан, како и претставници од Индија, Јужна Африка, Монголија, Виетнам, Куба и Србија.
Меѓутоа, францускиот претседател Франсоа Оланд, како и британскиот премиер Дејвид Камерон ставиле до знаење дека нема да дојдат на церемонијата. Нема да биде присутен нити американскиот претседател Барак Обама, бидејќи Белата куќа навела дека тој во мај не планира никакво патување во Русија.
Германската канцеларка Ангела Меркел исто така ја одбила поканата, но дипломатски навела дека ќе дојде во Москва еден ден подоцна, за да положи цвеќе. Полска пак сама ќе организира своја прослава. Од вкупно 68 поканети светски лидер, 26 досега потврдиле дека ќе присуствуваат на парадата.
„Доаѓањето на западните лидери на воената парада на 9-ти мај во Москва би значело и нивно признавање на политиките на Кремљ, низ сеќавањата на војната“, изјавила за AFP политичката аналитичарка Љиља Шевчова.
Традиционално, Кремљ смета дека 9-ти мај е денот кога е завршена Втората светска војна. Капитулацијата на Германија беше потпишана на 8-ми мај доцна вечерта 1945-та година во Берлин, односно по московско време на 9-ти мај.
Во Втората светска војна загинаа 27 милиони советски граѓани и победата во оваа војна преставува голема гордост за Русија.
Прашањето за победата во Втората светска војна останува доста чувствително прашање за Русите. Во јануари изби дипломатски инцидент на комеморацијата на ослободувањето на нацистичкиот концентрационен логор Аушвиц. Тогаш, полскиот министер за надворешни работи Гжегож Шетина изјави дека ослободителите на логорот во поголем број биле Украинци, а не припадници на Црвената армија.
Иако не присуствуваше на таа церемонија во Полска, рускиот претседател Владимир Путин тогаш изјави дека тоа е обид за намалување на улогата на Русија во Втората светска војна, нешто што е усмерено кон „рушењето на моќта и моралниот авторитет“ на Русија.
Кремљ од своја страна го намалува пак „отсуството“ на светските лидери на парадата на 9-ти мај, тврдејќи дека поголем број од земјите „ја сфаќаат значајната улога на Советскиот Сојуз во падот на нацизмот“.
Русија, која секоја година го слави овој ден, најавила дека оваа година церемонијата ќе биде уште пограндиозна. Околу 2,5 милиони ветерани ќе добијат медали, а воената парада ќе биде организирана ширум земјата и во повеќето поранешни советски републики.
Пред Кремљ, каде ќе парадираат војници од 10 земји, руските војници ќе носат советски униформи од Втората светска војна а покрај нив ќе биде најновата воена опрема на руската војска, која во последните неколку години, во голема мера е модернизирана.
Отсуството на западните претставници иритира многумина во Русија, кои тоа го сметаат за непочитување.
„Тие мислат дека ќе казнат Русија со негирањето на смртта на 27 милиони Совети“, оценил Владимир Јевсејев, директор на Центарот за политички науки во Москва.
„Тоа што Барак Обама нема да дојде, тоа е негов проблем. Светот не зависи од неговата добра волја“, изјавил Јевсејев за AFP.
Меѓутоа, некои имаат и поинаков став.
„Каква врска има сеќавањето на војната со сегашната состојба? Каква врска има подвигот на советскиот народ и милионите жртви за победа, со оние луѓе кои денес седат во Кремљ?“, запрашал рускиот политиколог Антон Орех./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Грузија сака да донесе закон за „странски агенти“, oфицијален претставник на ЕУ: Неприфатливо
Висок функционер на Европската унија денеска ја предупреди грузиската влада дека предложениот закон за „странски агенти“ е неприфатлив и ќе претставува пречка во напорите на земјата да се приклучи кон ЕУ, доколку биде усвоен во сегашната форма.
Грузискиот парламент вчера го усвои законот во второто читање, за кој опозицијата вели дека е инспириран од Кремљ, додека полицијата употреби солзавец и шок-бомби за да ги растера толпата демонстранти.
Владата смета дека законот е неопходен за да се гарантира транспарентно странско финансирање на невладините организации.
Секоја вечер, речиси еден месец, се поголем број демонстранти излегуваат на улиците. Вчера десет илјади демонстранти го блокираа центарот на Тбилиси на најголемиот антивладин митинг организиран досега.
Герт Јан Купман, директор на Управата за проширување на Европската комисија, за новинарите во главниот град на Грузија изјави дека Брисел ја следи ситуацијата и е загрижен за тоа што се случува.
„Гледаме загрижувачки случувања кога станува збор за законодавството. Законот за транспарентност, кој беше усвоен во второ читање, е неприфатлив во сегашната форма и ќе создаде сериозни пречки на патот кон пристапување во ЕУ“, рече Купман.
„Но, има уште време. Во септември ќе излеземе со препораки дали да ги започнеме пристапните преговори со Грузија и да објавиме извештај во октомври и ноември, така што има уште време. Но, сега топката кај владата“, додаде тој.
Грузискиот парламент се очекува да го разгледа законот во третото читање за околу две недели.
Европа
Русија: Не ја гледаме поентата на мировната конференција во Швајцарија
Русија објави дека не ја гледа поентата на конференцијата за прекин на огнот во Украина што Швајцарија ја планира за средината на јуни и на која Москва не беше поканета. Швајцарската влада соопшти дека Русија „во овој момент“ не е меѓу десетиците поканети земји, додавајќи дека е отворена за нејзино учество, но дека Москва не е заинтересирана. Берн го најави собирот во јануари, велејќи дека го организирал на барање на украинскиот претседател Володимир Зеленски.
Портпаролот на Кремљ, Дмитриј Песков, нагласи дека Москва не ја смета за веродостојна иницијатива.
„Не разбираме каква пресвртница би била таа мировна конференција“, им рече тој на новинарите. „За каква конференција зборуваме, за каква сериозна конференција со сериозни очекувања дека ќе има некакви резултати, без учество на Русија?
„Тоа е целосно невозможно и јасно е дека тоа е некаква иницијатива која не е фокусирана на резултати“, заклучи тој.
Швајцарската влада соопшти дека „мировниот процес не е можен без Русија. Украина, од друга страна, ги доведува во прашање придобивките од руското учество на состанокот што ќе се одржи во близина на градот Луцерн.
„Знаеме дека нема смисла да ја имаме Русија на маса ако не можете да се осигурате дека таа ќе дејствува со добра волја“, рече шефот на украинската дипломатија Дмитро Кулеба минатата недела во интервју за магазинот „Форин полиси“.
Кулеба смета дека создавањето дополнителен притисок врз Русија на бојното поле и обединувањето на земјите „кои ги делат принципите“ ќе помогнат Русија да биде подготвена да учествува во дијалогот.
Европа
Макрон не ја исклучува можноста за испраќање војници во Украина доколку Русија „ја пробие линијата на фронтот“
Францускиот претседател Емануел Макрон во интервју за Економист изјави дека не ја исклучува можноста за испраќање војници во Украина доколку Русија „ја пробие линијата на фронтот“ и ако Киев тоа го побара од Париз, пренесува BFMTV.
„Доколку Русите ги пробија првите линии на фронтот и ако има украинско барање – што не е случај денес – би било легитимно да се постави тоа прашање“, рече Макрон.
Веќе во февруари, Макрон ја покрена можноста за испраќање западни трупи на украинска територија, потсетува БФМ.
„Како што кажав, не исклучувам ништо бидејќи има некој од другата страна кој не исклучува ништо. Без сомнение, бевме премногу сомнителни кога ги дефиниравме границите на нашата акција”, рече францускиот претседател.
Макрон рече дека „априори отфрлањето“ на можноста за испраќање војници би значело дека „не се научени лекциите од последните две години“, бидејќи во летото 2022 година биле против испраќање тенкови, ракети со долг дострел и авиони. и сега сето ова го испорачуваат во Украина.
„Имам јасна стратешка задача: Русија не смее да победи во Украина. Ако Русија победи во Украина, нема да има безбедност во Европа“, додаде тој.
„Кој може да тврди дека Русија ќе застане таму? Каква безбедност има за другите соседни земји, Молдавија, Романија, Полска, Литванија и толку многу други? И тогаш, каков кредибилитет има за Европејците кои би потрошиле милијарди, велејќи дека тоа е опстанокот на континентот и не би обезбедиле средства за запирање на Русија. Така да, не треба ништо да исклучуваме“, истакна Макрон.