Економија
Димитар Ковачевски е назначен за нов извршен директор во оне.Вип

Димитар Ковачевски е назначен за нов извршен директор на телекомуникациската компанија оне.Вип.
Обврските на новата функција ќе ги преземе кон крајот на декември 2016 и ќе го наследи Никола Љушев кој од функцијата извршен директор се повлекува од лични причини и одлучи да прифати нови предизвици надвор од оне.Вип и Кластерот.
Никола Љушев беше предводник на крупните структурни промени кои настанаа во телекомуникацискиот бизнис во Република Македонија и одговорен за процесот на спојување и интеграција на трите компании. Тој беше дел од Телеком Австрија Групацијата од 2007 година како Главен Извршен Директор на ново лансираниот Вип.оператор, позиционирајќи ја компанијата како еден од најуспешните и најбрзорастечки мобилни оператори во Македонија. За огромното искуство на Никола во телеком индустријата кое го стекна уште во Македонски Телеком и Космофон, му беше оддадено признание два пати од страна на престижниот меѓународен магазин Глобален Телеком Бизнис во 2010 и 2011 година како еден од 40-те врвни и најуспешни светски менаџери под 40 години.
Оне.Вип ја искажува огромната благодарност до Никола за неговата работа во компанијата и му посакува многу успех во неговата идна кариера.
Никола ќе биде наследен од Димитар Ковачевски кој има успешна кариера од 18 години во различни области од телекомуникациската индустрија. Тој ја започна неговата кариера во Македонски Телеком каде што го продолжува својот развој на менаџерски позиции вклучувајќи ја позицијата Директор на Секторот за комерцијални корисници, одговорен за малопродажната мрежа и на проактивните продажни канали, Директор на Центарот за Маркетинг Комуникации и Односи со Јавност, Директор на Центарот за Маркетинг и Продажен Менаџмент, во исто време како дел од многу стратегиски корпоративни проекти. Неговата професионална кариера вклучува членство во интернационални бренд и комуникациски комитети и управни одбори.
Ковачевски е дипломиран економист во полето на корпоративниот менаџмент, информациски системи и бизнис процес интеграција. Исто така ја има завршено Извршната Образовна Програма во полето на маркетингот на Универзитетот Харвард. Бил дел од академски и извршни програми на Минхенскиот Технички Универзитет и на Холандскиот Еразмус Универзитет на полето на претприемништвото и стратешко менаџирање.
Тој има титула доцент на Универзитетот Американ Колеџ во Скопје во полето на маркетингот и организациски науки каде што предава Стратешки Бренд Менаџмент на МБА студиите.
„Сигурни сме дека со своето големо искуство во телекомуникациската бизнис индустрија ќе ја направи компанијата уште посилен играч на пазарот“, велат од оне.Вип./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
„Соработка за економски напредок“: средба меѓу гувернерот на Народната банка и претседателот на Стопанската комора

Во духот на заедничката определба за поттикнување на економскиот развој и за зајакнување на институционалната соработка, во Народната банка денес се одржа средба меѓу гувернерот Трајко Славески и претседателот на Стопанската комора на Северна Македонија, Бранко Азески.
На средбата беше нагласена важноста на постојаниот дијалог помеѓу носителите на економската политика и бизнис-заедницата, особено во контекст на актуелните светски и регионални економски предизвици. Претседателот Азески истакна дека Комората е подготвена за понатамошна активна соработка со Народната банка, изразувајќи поддршка за професионалноста и кредибилитетот што гувернерот Славески ги носи на оваа позиција, известува Народната банка.
Во разговорот беа отворени теми поврзани со монетарната политика, финансиската стабилност, пристапот до финансии за стопанството, како и улогата на Народната банка во создавањето поволно деловно опкружување. Двете страни се согласија дека со заемна отвореност и координација може да се придонесе за поефикасно исполнување на стратегиските економски цели на земјата.
Гувернерот Славески ја истакна заложбата на Народната банка за транспарентност, предвидливост и поддршка на стабилноста, како предуслов за одржлив раст. Тој упати благодарност за поддршката и изрази задоволство од иницијативите на Комората за продлабочување на комуникацијата со институциите од финансискиот сектор.
Средбата заврши во конструктивен дух, со договор за засилување на соработката преку редовни консултации и размена на анализи и мислења од заеднички интерес, се наведува во соопштението од Народната банка.
Економија
Се зголемува цената на дизелот

Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе Одлука со која се врши зголемување на малопродажните цени на нафтените деривати во просек за 0,93 % во однос на одлуката од 2.06.2025 година.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините за 1,833%, кај дизелот за 3,057%, кај екстра лесното масло за 3,388% и кај мазутот зголемувањето е за 3,088%.
Курсот на денарот во однос на доларот во изминатиот период по кој беа формирани цените со претходната пресметка е понизок за 0,5243%.
Малопродажните цени на бензините ЕУРОСУПЕР БС-95 и ЕУРОСУПЕР БС-98 не се менуваат.
Малопродажните цени на ЕУРОДИЗЕЛ (Д-Е V) и на Екстра лесното масло за домаќинство на (ЕЛ-1) се зголемуваат за 1,00 ден/лит.
Малопродажната цена на Мазутот М-1 НС се зголемува за 0,624 ден/кг и сега ќе изнесува 38,486 ден/кг.
„Напоменуваме дека ова се максималните цени на нафтените деривати од 00:01 часот на 10.6.2025 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени“, велат од РКЕ.
Економија
Објавени повици за самовработување, за млади до 29 години грант до 10.000 евра, а за невработени над 29 години грант до 7.000 евра

Министерот за економија и труд, Бесар Дурмиши, заедно со директорот на Агенцијата за вработување на Република Северна Македонија, Селајдин Белули, денеска официјално го објавија отворањето на јавниот повик за Мерка 1.1 и Мерката 1.2 во рамки на Оперативниот план за вработување за 2025 година, кои имаат за цел поддршка на самовработувањето на невработените граѓани регистрирани во Агенцијата за вработување.
Мерката 1.1 е наменета за лица над 29 години и обезбедува финансиска поддршка од 430.500 денари односно 7.000 евра за основање на нов бизнис, а Мерката 1.2 се однесува за млади до 29 години, кои имаат можност да добијат поддршка до 615.000 денари или 10.000 евра за основање сопствен бизнис.
Двете мерки, исто така, вклучуваат обука за претприемништво, подготовка на бизнис план и менторство за 6-месечен период за целните групи, вклучувајќи ги и лицата со попреченост, припадниците на ромската заедница и жените од руралните средини.
„Овие мерки не се само финансиска помош, туку се директна инвестиција во потенцијалот на граѓаните и во развојот на локалната економија“, истакна министерот Дурмиши на прес-конференцијата.