Агенцијата за млади и спорт го објави во четвртокот Повикот за избор на изведувач за изградба на отворен пливачки базен, односно комбиниран пливачки, ватерполо базен и базен за скокови во вода во скопската општина Шуто Оризари.

Согласно проектот, кој Агенцијата за млади и спорт најавува дека ќе го реализира по добивање на соодветната градежно-техничка документација, базенот ќе биде со олимписки димензии 50 на 25 метри и со максимална длабочина до 3,5 метри, каде ќе можат да се одржуваат и меѓународни натпревари според правилата и критериумите на меѓународната пливачка федерација ФИНА.

„Отворениот базен, пред сé, се гради поради задоволување на потребите на граѓаните на Шуто Оризари, потребите за изведување училишна настава и тренинг на пливачкичките школи како и за рекреативно спортување“, соопштија од Агенцијата за млади и спорт.

Базенот, според нив, ќе биде со две корита: едно големо базенско корито со максимала длабочина до 3,5 метри и едно мало базенско корито со длабочина до 1,2 метри кое ќе биде наменето за најмладите корисници и обука на непливачи. Ќе биде изградена, исто така, и скокалница за синхрони скокови. Ќе има поставен семафор со тајмер за следење на натпреварите.

Покрај базенскиот простор ќе се изгради и платформа за сoнчање која ќе се користи и како гледалиште за посетителите. Базенскиот простор ќе биде достапен и за лицата со посебни потреби и ќе има пет влезови за посетителите.

Пливачкиот спорт во Македонија е еден од најтрофејните спортови и секако е спорт кој ни дал голем број на олимписки спортисти.
Агенцијата за млади и спорт со последните потфати очекува да го врати пливањето на старите патеки и поради тоа со засилено темпо и посветеност вложува во развојот на спортско-пливачката инфраструктура./крај/мф/ст