Политика
Заев за РСЕ: Не кантонизација, туку конфискација на украденото
Федерализацијата е само во главата на Груевски. Кантонизацијата којашто ја споменува не знам од каде му паднала на памет. Веројатно мисли на конфискацијата, конфискацијата ќе ја има после овој грабеж што се случи, вели лидерот на СДСМ Зоран Заев во неделното интервју на Радио Слободна Европа.
На прашањето дали се основани стравувањата на пензионерите, јавната администрација и оние на коишто им е ветена работа во неа се главната гласачка база на ВМРО-ДПМНЕ, дека со промена на власта може да има негативни последици за нив, Заев вели дека тоа е веќе „апсолвирано прашање“ и не ја споделува таквата перцепција.
„Мислам дека тоа е веќе апсолвирано прашање, иако ВМРО-ДПМНЕ сè уште се обидува да се заканува, ќе дојде Заев, СДСМ ќе ве брка од работа, ќе нема за пензии и слично. Уште еднаш јавно потенцирам, влакно од главата на никого нема да му фали. Секако, ако некој не си ја врши работата, ако не доаѓа на работа како и секаде, но од политички причини некој да изгуби работно место, тоа никогаш повеќе во Македонија нема да се случи, затоа што видовме ваквите поделби или какви било поделби до каде нè донесоа. Ќе се трудиме да ја зголемиме ефикасноста и ефективноста од самото работење. Рационализација ќе правиме во делот на неопходните потреби, таму каде што недостига. На пример потребни се негувателки во градинките. Ќе ја воведеме втората смена, за да може и тој што работи во администрација да заврши некоја работа поручек. Во рамките на овие мерки и можности ќе се обидеме да ја сочуваме администрацијата, но да биде продуктивна, да дава придонес во БДП-то во Македонија“, вели Заев.
Тој додава дека од државната каса ќе бидат финансирани предизборните ветувања за просечна плата до 30 илјади денари, а минимална прво до 12, а потоа до 2020 година до 16 илјади денари, одговарајќи на прашањето од каде ќе се најдат пари за тоа, доколку, како што самиот тврди, македонското стопанството е изнемоштено.
„Се научивме на еден куп мерки од владата за коишто не кажуваа буџетски импликации. Од буџетот мора да има импликации ако сакате да ја завртите таа турбина. Еднаш ако заврти, понатаму сама ќе предизвикува движење. Ќе го објаснам тоа. Ако државата трансферира 9 илјади денари во една мала фирма за да може да и помогне да ја покачи платата од минимална од 9,5 илјади денари на 14 илјади со тенденција да стане 16 илјади. Тоа ја отвора спиралата на сите плати. Самата зголемена потрошувачка моќ кај граѓаните овозможува кај дуќанчето, наместо да оди со профит од 5 отсто, да оди со 15 отсто. Самото дуќанче веќе има акумулација да даде поголема плата и целото тоа го подигнува целиот праг на нивото на платите до нешто што претставува една аспирација близу до Хрватска. Секако, Хрватска има некои 770 евра просечна плата, но трендот може да биде тој, македонското стопанство тоа го може. Притоа конкурентноста може само да се засили и зголеми без да ја намалиме конкурентната моќ на секоја приватна фирма во Македонија и на домашниот и на меѓународниот пазар, но сум убеден дека резултатите од покачувањето на платите ќе бидат видливи во многу брз период. Еве да кажеме на половина на мандатот веќе ќе се знае, минималната плата ќе достигне 14-15 илјади денари, просечната плата да стигне до некаде 27-28 илјади денари до средината на мандатот. Ветувањата ни се за до крајот на мандатот“, појасни Заев.
Заев вели дека иако можеби дал причина за кампањата на владејачката партија со некоја изјава на тема јза употреба на службените јазици, нема воопшто дилема дека „и да не сум дал причина тие ќе одеа повторно со некоја националистичка реторика“ „Добро е тоа што тоа веќе не поминува никаде. Федерализацијата е само во главата на Груевски. Кантонизацијата којашто ја споменува не знам од каде му паднала на памет. Веројатно мисли на конфискацијата, конфискацијата ќе ја има во Македонија, и тоа како после овој грабеж што се случи, но унитарноста на државата се гарантира само со сплотеност, со рамноправност, со еднаквост. Со вакви национализми и поделби, таа се урнисува“, додава.
На барањето да прецуизира што ветува во сферата на употреба на јазиците на заедниците, челникот на СДСМ одговори дека „Законот во Македонија е јасен и нашиот Устав е европски и либерален и ги гарантира сите правата на граѓаните, само треба нивна примена. Ниту Устав ќе се менува, ниту има потреба од промена на некои законски решенија. Постојниот Устав и постојниот закон дава можност за практична реализација на потребите на граѓаните од овој аспект. Тие само тоа го бараат. Јас ги кажав примерите со детето со талент по музика. Буквално не може да се запише на основно музичко образование оти нема професор по теорија и солфеж. И Уставот и законот тоа го гарантира, зошто не се спроведува? Бабичката не може да добие нега за трето лице поради тоа што некому не му било ќеф да и одговори на албански јазик во општина во која постои двојазичност. Денеска имаме еклатантни примери. Шуто Оризари има по закон право да зборува на ромски, зашто има повеќе од 20 отсто Роми. Зошто не се применува законот? Покрај македонскиот, зборуваат и на албански јазик“.
Ништо надвор од Устав и на закон, само практична реализација, вели Заев во договорот на прашањето што предвидува за употреба на јазиците.
„Овие квазинационалисти од двете страни, јас така ги нарекувам, буквално тајно, под маса ги договараат законите за на крај ништо да не спроведат од самите закони. Затоа чувството на одредени наши граѓани од помалите етнички заедници дека оваа држава за некои е мајка, за некои маќеа. Не, државата мора да биде подеднакво мајка за сите, еднаква за сите за да може да си ја сакаме, да ја чуваме, да се бориме, тоа го зацврстува унитарниот карактер на Македонија“, заклучи Заев./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски: Очекувам ДУИ повторно да прави изборни нерегуларности, истураат и многу кеш во предизборието, затоа ја повикувам меѓународната заедница будно да го следи процесот
Ако ме прашувате за изборните нерегуларности кои што беа случај во првиот изборен круг, а за кои причина беше Демократската унија за интеграција, јас очекувам такво нешто да се случи и во вториот круг. Ние до претставниците на меѓународната заедница, до ОБСЕ и ОДИХР доставивме список на избирачки места каде што во определен временски интервал, гласањето е во просек помалку од една минута, што наведува на тоа дека таму имаме бројни нерегуларности. Односно, да бидам попрецизен, полнење на кутии и на тие избирачки места, чудно но вистинито, фингер принт, односно терминалите за отчитување на отисок од прстот, не работеле во тој период, рече претседателот на ВМРО-ДПМНЕ, Христијан Мицкоски запрашан дали очекува ДУИ повторно во вториот круг претседателски и прв парламентарни избори да прави изборни нерегуларности.
Додаде дека очекува нешто слично да се случува и во вториот круг, но и дека ВМРО-ДПМНЕ е подготвено и дека за тоа е информирано и министерството за внатрешни работи со цел на определените избирачки места да го зголеми бројот на безбедносните сили.
„Го информирав и министерството за внатрешни работи да ги засили своите сили таму, припадниците на МВР да вршат мониторинг на процесот на гласање во тие избирачки места. Генерално станува збор за избирачки места во скопски Сарај, Липково, Арачиново и така натаму. Треба македонската јавност и граѓаните на Македонија, дека ДУИ преку своите политики не ги освојува гласачите, туку таа буквално, под притисок и со мерки и средства кои што се недозволени во демократијата, ги добива гласовите. Така што, слободно можете оној резултат од првиот круг на Европеецот Османи да го поделите со два и ќе ја добиете реалната поддршка на Демократската унија за интеграција која што повеќе од 20 години на два начина добива гласови. Најпрвин со епската манипулација и повикување на 2001, а паралелно со тоа местење тендери и втората е преку притисок, закани, уцени и поткуп“, рече Мицкоски.
Мицкоски упати и повик до меѓународната заедница будно да го следи процесот и да не го факторизираат криминалот на ДУИ кои што истураат огромни количини на кеш пари, кои сакаат да бидат дел од власта за на исти начин да ги наплатат и повторно ги вратат тие количини на кеш.
„Тука ја повикувам и меѓународната заедница да не го факторизира криминалот на ДУИ, бидејќи тие сега истураат огромни количини кеш, ги знаеме и менувачниците каде се истураат тие огромни количини кеш, а потоа на тој начин сакаат да бидат дел од владата за да се наплатат и повторно ги вратат тие количини на кеш. Така што, уште еднаш апелирам и до меѓународната заедница будно да го следи процесот, бидејќи ова што се случува изминативе денови и ова што очекуваме да се случува во следниве денови, ги поминува, би рекол, условите во определени места да одржување избори во многу по неискусни демократии од македонската. И навистина ова што се случува е катастрофално за демократијата, во определени средини. Можам да кажам дека високи функционери, дури и членови на владата го прават ова придружувани од припадници на министерството за внатрешни работи кои што се легитимираат кога ќе бидат фатени еклатантно, односно во процесот кога се случуваат овие притисоци и поткупи“, истакна Мицкоски.
Македонија
Николоски: Во четврта изборна единица ВМРО-ДПМНЕ предвидува инфраструктурно поврзување, поддршка на земјоделието и воспоставување на ред во државата
„Во четвртата изборна единица предвидуваме како и на државно ниво враќање на редот во државата и воспоставување на функционална правна држава“, истакна Александар Николоски, потпретседател на ВМРО-ДПМНЕ и носител на изборна единица 4 во јавување во емисијата „Стадион“ на Канал 77.
„Во четворката предвидуваме и инфраструктурно поврзување тука е пред експресниот пат Прилеп – Градско кој што седум години актуелната власт не успеа да го заврши. Понатака автопатско решение на Прилеп до Битола и граница со „Меџитлија“, значи нешто плус од ова што се предлага имајќи в предвид дека ние нема да бараме како Артан Груби провизии од 20% и од прилика е толку разликата. Ние не планираме да бараме провизии значи ќе има простор за повеќе да се изгради“, појасни Николоски.
Николоски додаде дека третиот фокус во изборната единица 4 е земјоделието. Најголем дел од земјоделското производство во Македонија е токму во изборната единица 4. За тука се предвидени значајни работи кои што сака идната Влада предводена од ВМРО-ДПМНЕ да ги направи, и во делот на производството на тутун, и во делот на производство на грозје и вино, во делот на раноградинарски култури, праски итн.
„Во однос на помалите политички партии кои што имаа свои претседателски кандидати очекувам нивните гласачи затоа што беа проопозициски кандидати да гласаат за Гордана Силјановска Давкова во вториот круг. И на тој начин да имаме успешни претседателски избори и Гордана да стане претседател“, повика Николоски.
Тој посочи дека со идната Влада предводена од ВМРО-ДПМНЕ започнуваат промените во Македонија, време е за проекти кои ќе се од корист за граѓаните и државата.
Македонија
Мојсоска: Усеини уништува антифашистичко наследство додека СДС и ДПМНЕ молчат
Од локацијата кај познатата Бела куќа на ул. ,,Димитар Влахов” бр. 9 во Охрид, од каде бескруполозно беше тргната плочата од НОБ, Носителот на ИЕ5 и Генерален секретар на Левица, Јована Мојсоска истакна:
,,Овој културен објект беше уништен од страна на локалниот шериф, Нефи Усеини. Плочата на АСНОМ каде пишува за осудените антифашисти од страна на бугарскиот окупатор, беше тргната пред месец дена. Од градоначалникот Пецаков нема никаква реакција додека се уништува антифашистичкото наследство од страна на поранешниот функционер на ДУИ”.
Мојсоска се наврати кон 2019 година кога беа силни обвинувањата на ВМРО – ДПМНЕ кон Усеини. Според Мојсоска, наспроти тоа, се испоставува дека коалицијата ДПМНЕ – ДУИ сега е уште посилна, благодарение на заедничките бизнис – интереси.
,,Ќе потсетам дека во 2019 година, токму ВМРО-ДПМНЕ обвинуваше дека Усеини го тероризира Охрид. За жал, Охрид го губи својот автентичен изглед, иако за овој објект има Решение за уривање. Институциите молчат, молчи и Министерството за култура кое е раководено од социјал-демократите”, додава Мојсоска за криминалот на поединците и молкот на институциите.
Јована Мојсоска како Носителот на ИЕ5 и Генерален секретар на Левица, порачува:
,,Затоа на 8 мај, да заокружиме број 5, за да ставиме ред во безредието и закон во беззаконието!”