Британскиот магазин The Times, повикувајќи се на свои извори, пишува дека турските власти наводно ги отповикуваат од должноста прозападно ориентираните воени лица и дипломати во НАТО, и на нивно место назначуваат функционери кои се повеќе наклонети кон Русија, Кина или Иран.

Според податоците на весникот, овие информации имаат потврда во електронските писма кои дошле до Times како резултат на истекување на информации. Турските офицери кои неодамна биле отповикани од клучните позиции во НАТО, за што неодамна зборуваше американскиот генерал на чело на сојузничките сили во Европа, Кертис Скапароти, токму нему му напишале писмо во коешто го истакнале „значителниот раст на ултранационалистички и антизападно настроени“ личности во турската армија.

„Алармантно се забележува дека некои од новите турски претставници во НАТО имаат радикални станови. Некои од нив ги ставаат под прашање вредностите на НАТО и дури имаат омраза кон западните организации, притоа поддржувајќи ги Русија, Кина и Иран“, го цитира Times дел од електронското писмо напишано од турски офицер и еден од воените началници на НАТО адресирано до генералот Скапароти.

Според информациите на поранешен функционер на НАТО, соговорник на весникот, најмалку два високо рангирани турски офицери во амбасадата во Лондон биле отповикани во Турција по обидот за воен преврат во средината на јули годинава.

Околу 150 турски офицери ги напуштиле командните структури на НАТО по неуспешниот воен преврат од 15-ти јули за соборување на владата и турскиот претседател Реџеп Тајип Ердоган, изјави во средата американскиот генерал на чело на сојузничките сили во Европа, Кертис Скапароти.

„Голем број турски офицери се во затвор, некои се отповикани од Брисел, а некои заминаа во пензија“, изјави Скапароти во рамките на еден состанок на НАТО во Брисел. Скапароти појасни дека тие заминување, некои присилни а некои посакувани, се однесуваат на 50 отсто од турските офицери во Сојузничката команда за операции (ACO) и дека станува збор за 150 воени лица.

Местата од кои заминале се SHAPE, стратешкиот главен штаб на НАТО во Монс во Белгија, и двата друга главни штаба на ACO во Неапол во Италија и Брунсум во Холандија.

Генералниот секретар на НАТО, Јенс Столтенберг на 18-ти ноември откри дека неколку турски офицери побарале азил во земјите членки на НАТО по чистките кои се спроведуваат по неуспешниот државен удар, без да ги прецизира ниту нивниот број, ниту земјите во кој барале азил. Во една база во Рамстејн, во западна Германија, забележани се неколку истапувања на турски офицери, пишува германскиот печат.

Случајот кон најмногу го следат медиумите се однесува на осум турски офицери кои ноќта кон 16-ти јули со хеликоптер пребегаа во соседна Грција. Грчкото правосудство се согласи на Турција да ѝ предаде тројца офицери кои можат да бидат обвинети дека соработувале со пучистите, иако тие го негираат тоа. Ден претходно, пак, судот во Атина одби да ги екстрадира другите тројца офицери кои ги бара Анкара. Многу турски војници и офицери побегнаа во разни европски земји по обидот за државен удар и чистките кои се спроведуваат во војската.

По обидот за пуч од 15-ти јули, турските власти ги обвинија поддрживачите на исламскиот проповедник Фетулах Ѓулен за учество во пропаднатиот државен удар. Во рамките на чистите кои следеа во сите структури од државната управа и институции беа уапсени 32.000 лица, а околу 100.000 беа отпуштени или суспендирани од работа./крај/мф/сн