Македонија
Професор Лабовиќ добитник на престижна светска награда од областа на владеење на правото
Професорот на д-р Миодраг Лабовиќ, од Факултетот за безбедност Скопје, е победник во конкуренција за престижната научна награда на светско ниво, во областа на владеењето на правото и борбата против корупцијата
Минатиот петок во кралската дворец „Хофбург“ во австриската престолнина Виена, во организација на Центарот за владеење на правото и анти-корупција при владата на Катар, под покровителство на агнецијата на Обединетите нации – UNODC, беа доделени награди во четири категории за борба против корупцијата. Во една од најреспектабилните категории за врвни научни достигнувања во областа на владеење на правото и анти-корупцијата – добитник на оваа високо престижна награда на светско ниво во конкуренција на научни истражувачи од многу земји во светот е проф. д-р Миодраг Лабовиќ.
Големата конкуренција на врвни професори од најреномираните светски универзитети, како што се Сорбона од Париз, Универзитетот во Монтреал, Универзитетот во Торонто, Универзитот во Сиднеј- Австралија, Школата за право во Лондон, В. Британија и многу други универзитети од цел свет, беше оценувана и споредувана на две нивоа.
Првото ниво, Advisory Assesment Board, составен од седум члена инаку високо реномирани научници и експерти од различни континенти и региони во светот, ги оценуваа научните достигнувања на кандидатите, меѓу кои што освен индивидуални научници имаше и конзорциуми на научни институции.
Второто ниво на оценување го вршеше High Level Committee, исто така, составен од седум члена на високо реномирани академици и експерти.
Научната награда на победниците лично им ги доделија досегашниот генерален секретар на ООН, Бан Ки-мун, како и емирот на државата Катар, Шеик Тамим бин Хамад ал-Тани.
Ова признание кое во научниците се смета за своевиден еквивалент на нобеловите награди, покрај признанието повлекува и паричен износ од 250.000 американски долари./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Тошковски ќе го унапредува Центарот за обука во модерен центар за полициска обука
Министерот за внатрешни работи Панче Тошковски вчера заедно со директорот на Бирото за јавна безбедност Александар Јанев и дел од раководството на МВР го посетија Центарот за обука на МВР. Тошковски, како што информираат од неговиот кабинет, потенцирал дека континуираната обука на вработените во МВР ќе донесе поголема безбедност за граѓаните.
Информираше дека во моментот се реконструираат дел од објектите на Центарот кои се во сопственост на Министерството за внатрешни работи, а во кои престојуваат и следат настава кандидатите за полициски службеници.
„Наша амбиција е да го унапредиме Центарот за обука во модерен центар за полициска обука, кој ќе прерасне во регионален центар за обука на кадри од областа на безбедноста. Во минатото не бил ставен доволен акцент на континуираноста на обуките и на тој дел посветено ќе се работи“, посочил Тошковски за време на посетата.
Тој нагласил дека ќе изградат систем на континуирана обука на полициските службеници и вработените во Министерството за внатрешни работи, со што ќе се зајакне стручноста и професионализмот на целата институција која е надлежна за безбедноста, како основа за подобар квалитет на живот на сите граѓани
Македонија
Сообраќајот на државните патишта се одвива непречено, по суви коловози
Сообраќајот на државните патишта се одвива непречено, по суви коловози. Интензитетот на сообраќај на патните правци надвор од градските средини е зголемен. На граничните премини од македонска страна, нема подолги задржувања за влез и излез од државата, информираат од АМСМ.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
СДСМ денеска на вонредни внатрепартиски избори ќе избира нов лидер на партијата
СДСМ денеска на вонредни внатрепартиски избори ќе избира нов лидер на партијата. Гласањето ќе се одвива на 77 избирачки места ширум земјава, а своето право на глас ќе можат да го остварат околу 23 илјади акредитирани партиски членови.
Во трката за нов лидер на СДСМ остануваат поранешниот министер за здравство и актуелен пратеник Венко Филипче, директорот на ТИРЗ Јован Деспотовски, како и поранешниот заменик министер во МИОА Александар Бајдевски, откако поранешната министерка за одбрана и актуелна пратеничка Славјанка Петровска, вчера, на еден ден пред изборите ја повлече кандидатурата.
Преку официјално писмо до Централната изборна комисија за претседателските избори во СДСМ, Петровска побара нејзиното име да не стои на избирачкото ливче, иако во изјава за медиумите рече дека таа сепак ќе се најде на избирачкото ливче, бидејќи материјалите биле веќе отпечатени.
Таа ги повика останатите тројца кандидати да се откажат од внатрепартиското гласање за избор на претседател на партијата, бидејќи, како што рече, изборниот процес бил нефер, односно еден од противкандидатите имал пристап до базата на податоци и ги злоупотребувал личните податоци на членовите на партијата. Посочи дека до неа стигнале информации дека во определени општински организации се појавиле одреден број гласачи, кои не побарале да бидат регистрирани, односно, како што рече, некој користејќи ги алатките во нивно име ги регистрирал.
Четворицата кандидати месецов водеа предизборна кампања, најавувајќи реформи во партијата, како и обединување на членството.
Претседателката на Централната изборна комисија за избор на претседател на СДСМ, Викторија Аврамовска-Мадиќ, рече дека Комисијата работела напорно за да спроведе транспарентен и демократски процес, затоа внатрепаритското гласање в недела ќе се одржи.
Во врска со вчерашните забелешки на Петровска, Мадиќ рече дека тоа е нејзино право. Нагласи дека дел од доставените приговори од страна на некои општински организации биле прифатени, дел не.
Избирачкиот список ќе брои вкупно 23.373 акредитирани членови на СДСМ.
Досега, на чело на партијата беа Бранко Црвенковски, Владо Бучковски, Радмила Шекеринска, Зоран Заев и Димитар Ковачевски.