Европа
Четворицата челници го осудија кршењето на примирјето во Украина
Челниците на Франција, Германија, Украина и Русија го осудија во четвртокот во телефонски разговор постојаното кршење на примирјето коешто се случува последните денови, соопшти кабинетот на францускиот претседател Франсоа Оланд.
Телефонската конференција на четворицата челници потписници на мировниот договор за Украина од 12-ти февруари постигнат во белоруската престолнина Минск, е одржана ден откако рускоајзичните бунтовници целосно го зазедоа стратешки важниот град Дебалцево длабоко на територијата којашто тие ја контролираат а во кој околу осум илјади украински војници речиси цел месец беа во опкружување, и откако украинските сили во средата целосно организирано се повлекоа од него по дводневните жестоки борби кога бунтовниците навлегоа во градот.
Еден од портпаролите на украинската армија Анатолиј Стелмах изјави во четвртокот дека повеќе од 90 отсто од украинските војници се повлекле од Дебалцево и околината, кој е важен железнички транспортен центар во источниот дел на Украина, но има важност и од воен аспект, бидејќи се наоѓа меѓу двата одметнати региона Донецк и Луганск и овозможува напади на нивните територии.
Рускиот претседател Владимир Путин, германската канцеларка Ангела Меркел, украинскиот претседател Петро Порошенко и францускиот претседател Франос Оланд го осудија кршењето на прекинот на огнот последните денови и се согласија дека пакетот мерки договорен во главниот град на Белорусија Минск треба да се спроведува стриктни и целосно, објави кабинетот на францускиот претседател.
„Претставниците на Организацијата за безбедност и соработка во Европа (ОБСЕ) би требало да се сретнат со конфронтираните страни на лице место поради итно спроведување на тие мерки“, се одава во соопштението на Елисејската палата во коешто се истакнува и дека министрите на четирите земји подоцна во четврток ќе разговараат за деталите од овој план, пренесува AFP.
На официјалната интернет страница на украинското претседателство, се наведува, пак, дека претседателот Петро Порошенко во телефонскиот разговор барал ослободување на сите заробени Уркаинци, вклучително и оние кои се заробени или се предале во Дебалцево. Како што пренесува Reuters, тој на другите челници им порачал дека „не треба да се преправаат оти она што се случи во Дебалоцево е во согласност со договорот од Минск“.
И во соопштението на Кремљ се истакнува дека челниците се согласиле околу „неопходноста од строгото почитување на договорите постигнати во Минск“. „Истакнато беше дека почетокот на исполнувањето на одобрениот од страна на Контактната група во Минск (претставниците на Киев и на самопрогласените републики во Донецк и Луганск, со посредување на претставници од Украина, Русија и ОБСЕ – з.р.) Комплекс мерки овозможило намалување на интензитетот на борбените дејствија во Донбас, и придонело за намалување на жртвите меѓу цивилното население“, пренесува агенцијата ТАСС.
Се одбележува, исто така, дека четворицата лидери ја потцртале „неопходноста од обезбедување одржлив прекин на огнот, спроведување на практичните чекори за повлекување на тешкото вооружување на двете спротиставени страни, како и брзо ослободување на заробените“.
„Подвлечена беше подготвеноста активно да се поддржи работата на набљудувачката мисија на ОБСЕ во оваа важна фаза од спроведувањето на договорот“, се вели во изјавата од кабинетот на рускиот претседател. /крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Полскиот премиер: Европа мора да ја зголеми одбраната
Полскиот премиер Доналд Туск денеска изјави дека Европа ќе мора да ги зголеми своите одбранбени капацитети за да избегне конфликти и да биде побезбедна и повторно повика на развој на заеднички европски систем за противвоздушна одбрана.
Минатата година Полска одвои речиси четири отсто од својот бруто домашен производ (БДП) за одбраната со цел да ги зајакне сопствените воени капацитети.
На Европскиот економски конгрес на југот на Полска, Туск ги повика земјите од ЕУ да ги зголемат трошоците за одбрана за најмалку 100 милијарди евра.
„Европа мора да биде подготвена во следните десет месеци и следните пет години за ситуација во која ниту една сила нема да се осмели да крене рака против неа“, рече Туск.
„Голема сума пари (за европска безбедност) ќе ја оддалечи војната од европските граници долго време, можеби и трајно“, смета Туск, повторувајќи ја потребата од заеднички систем за противвоздушна одбрана.
„Мора да бидеме способни да го одбраниме нашето небо“, порача Туск.
Претседателката на Европската комисија, Урсула фон дер Лајен, исто така присутна на конгресот, се согласи дека Европа мора да троши повеќе за одбраната и вети дека доколку остане на чело на Комисијата, ќе предложи нови проекти во областа на одбраната. .
Таа претходно предложи назначување постојан европски комесар за одбрана.
Европа
Шпанските студенти планираат протести против Израел
Студентите во Шпанија во наредните денови би можеле да почнат протести против „геноцидот што го изврши Израел во Палестина“ по примерот на универзитетите во САД, Холандија и Белгија, изјавија нивните претставници за шпанските медиуми.
На Филозофскиот факултет во Валенсија, приморски град на југозападот на земјата, студентите веќе една недела спијат во шатори и секојдневно протестираат.
„Бараме од нашиот универзитет да ги прекине сите врски со институциите и компаниите што соработуваат со Израел“, изјави 20-годишната Естер Монге, студентка по политички науки и социологија за весникот „Ел Паис“.
Во моментот многу универзитети одржуваат состаноци, на кои студентите и професорите гласаат за блокадите на факултетите.
„Студентскиот совет ќе одлучи за активностите во наредните денови“, рече Марија Хозе Лера, координаторка на „Палестиниум“, група за солидарност со палестинските аспирации.
Лера, која има докторат по психологија на Универзитетот во Севилја, вели дека моменно се одржуваат состаноци на универзитетите во Мадрид, Сарагоса, Барселона, Жирона, Гранада и во други градови.
Во понеделникот стотици студенти се собраа пред Универзитетот во Барселона, каде што ги развиорија своите транспаренти.
„Сакаме нашите факултети да ги прекинат сите односи со Израел и компаниите што работат таму“, рече 24-годишниот Пабло Кастиља, дипломиран студент по јавна политика.
Во Мадрид сѐ уште нема протестно кампување, но има демонстрации. На автономниот универзитет во Мадрид планираното предавање за НАТО беше откажано под притисок на пропалестинските демонстранти.
Друг јавен универзитет, Universidad Complutense de Madrid, објави декларација со наслов „Со Палестина против геноцидот во Газа“.
„По влошувањето на насилството врз палестинскиот народ, ги повикуваме професорите, истражувачите и вработените во администрацијата да се спротивстават на колективното казнување на Палестинците што го спроведува Израел“, се вели во декларацијата усвоена од администрацијата на Факултетот за политички науки и социологија.
Сведоци сме на геноцидот врз палестинскиот народ, што е продолжение на децениското систематско насилство врз палестинскиот народ и неговата присилна емиграција“, се вели во декларацијата објавена на веб-страницата на Факултетот.
Европа
(Видео) Украинците објавија снимка: „Ова се руски агенти, сакаа да го убијат Зеленски“
Украинските разузнавачи соопштија дека спречиле руски заговор за атентат на претседателот Володимир Зеленски. Украинската служба за државна безбедност СБУ објави дека фатила руски агенти, кои биле вработени во украинската државна гарда. Разузнавачките претставници велат дека руски агенти планирале да ги убијат претседателот и други високи владини функционери.
Шефот на СБУ, Васил Маљук, изјави дека неуспешниот атентат требало да биде подарок за Владимир Путин пред неговата денешна инаугурација.
СБУ на својот канал на „Телеграм“ објави тврдење дека руски таен агент ги пренел координатите на безбедната куќа пред планираниот воздушен напад. Претставници на разузнавањето додадоа дека Русија планирала да ги уништи сите траги од дронот што би се користел за гаѓање на претседателот со друг проектил.
„Непријателот активно развиваше планови за да го тргне претседателот Володимир Зеленски. Една од задачите на руската разузнавачка мрежа ФСБ беше да бара џелати меѓу војниците блиски до службата што го штити претседателот, кои би можеле да го убијат шефот на државата“, соопштија од СБУ.
„Покрај Володимир Зеленски, непријателот планира да ги елиминира и шефот на Службата за безбедност на Украина, Васил Маљук, шефот на Воената разузнавачка служба на Украина, Кирил Буданов, и други високи функционери“, се вели во соопштението.
„Ограничен број луѓе знаеја за нашата специјална операција и јас лично го следев нејзиниот напредок. Терористичкиот напад, кој требаше да биде подарок за Путин пред инаугурацијата, всушност беше неуспех на руските специјални служби“, рече Маљук.
„Но, не смееме да заборавиме – непријателот е силен и искусен, не може да се потцени. Ќе продолжиме да планираме однапред и да си ја работиме работата секој предавник да ги добие заслужените судски казни“, заклучи тој.
СБУ наведува дека при претресот на просториите на уапсените руски агенти биле пронајдени „релевантни средства за уништување“ и други докази за криминални активности.