Европа
Лавров: Турција ја мина границата, се суспендира безвизниот режим
Русија донесе одлука за суспендирање на безвизниот режим меѓу двете земји, од 1-ви јануари 2016 година, изјави рускиот министер за надворешни работи Сергеј Лавров во петокот на средбата со неговиот сириски колега Валид Муалем, оценувајќи дека Анкара ја „минала границата“, во атмосфера на зголемени тензии меѓу двете држави по турското соборување на рускиот воен авион во близина на сириско-турската граница.
„Сметаме дека турското раководство ја мина границата на прифатливото (однесување)’, нагласи шефот на руската дипломатија Сергеј Лавров. Анкара ризикува Турција да ја стави во многу тешка ситуација, додаде и предупреди дека соборувањето на рускиот авион во вторникот може сериозно да ги поткопа турските државни интересите. Лавров пред средбата со Муалем, порача и дека Москва сериозно преиспитува дали Турција навистина има намери да се бори против тероризмот.
„Имаме сé повеќе прашања за активностите на Анкара и нејзината посветеноста да се искорени тероризмот“, изјави Лавров на заедничката прес-конференција со Муалем
Додаде дека Русија ќе продолжи да ѝ ја дава сета неопходна помош на Сирија во борбата против тероризмот и изрази благодарност за учеството на сириските специјалци во операцијата за спасување на пилотот откако во вторникот беше соборен рускиот бомбардер од турски ловци, кој се спушти на територијата контролирана од туркменските сириски бунтовни кои се поддржувани од Турција.
Лавров појасни дека Русија е многу загрижена за зголемувањето на терористичките закани во Турција. „Тоа е директно поврзано со безбедноста на Руската Федерација. Преку Турција се одвива најголемиот проток на милитанти во сите насоки“, смета шефот на руската дипломатија.
„На наша огромна жал, турските власти крајно неволно, благо речено, соработуваат по ова прашање, кога станува збор за државјани на Руската Федерација“, истакна Лавров додавајќи неколку примери.
„Во текот на годинава ние 17 пати официјално со ноти побаравме од турските власти информации во врска со руски државјани кои беа уапсени под сомневање за учество во терористички активности… и баравме пристап до тие луѓе. Сите 17 обраќања остана без никаква реакција“, посочи Лавров.
Спомена и дека годинава повеќе од 200 руски државјани биле депортирани откако биле обвинети за нелегални активности, и оти и покрај меѓудржавниот договор само во седум такви случаи била навремено информирана руската страна. „Во повеќето случаи овие лица се депортирани без да бидат вратени во Русија, во трети земји, вклучително и држави кои спроведуваат непријателска политика кон Русија“, истакна Лавров оправдувајќи ја одлуката за суспендирање на безвизниот режим меѓу двете земји.
Објавувајќи го решението на Москва да го суспендира договорот со Анкара за безвизно патување, Лавров рече дека „не станува збор за вештачка закана“ и додаде „Напротив овие закани се многу реални и ние со сета одговорност информиравме за тоа“.
Во моментов Русите можат без виза да престојуваат на територијата на Турција 60 дена, а максималниот период на постојан престоја на руски државјани изнесува 90 дена во рок од шест месеци.
Покрај оваа мерка, којашто се очекува дека ќе се одрази врз турскиот туристички сектор, кој според некои процени само од руските туристи остварува околу 4 милијарди долари годишно, се подготвуваат и редица економски мерки. Министерот за економија Алескеј Улукаев, во петокот изјави дека не ја отфрла можноста за мерки кои ќе го погодат турски извоз на земјоделски производи во Русија, кој се проценува на милијарда долари годишно, а особено двата огромни енергетски проекта, гасоводот Турски тек и нуклеарната централа Акују, што може да ја погоди сиромашната со енергенси Турција. /крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Грузија сака да донесе закон за „странски агенти“, oфицијален претставник на ЕУ: Неприфатливо
Висок функционер на Европската унија денеска ја предупреди грузиската влада дека предложениот закон за „странски агенти“ е неприфатлив и ќе претставува пречка во напорите на земјата да се приклучи кон ЕУ, доколку биде усвоен во сегашната форма.
Грузискиот парламент вчера го усвои законот во второто читање, за кој опозицијата вели дека е инспириран од Кремљ, додека полицијата употреби солзавец и шок-бомби за да ги растера толпата демонстранти.
Владата смета дека законот е неопходен за да се гарантира транспарентно странско финансирање на невладините организации.
Секоја вечер, речиси еден месец, се поголем број демонстранти излегуваат на улиците. Вчера десет илјади демонстранти го блокираа центарот на Тбилиси на најголемиот антивладин митинг организиран досега.
Герт Јан Купман, директор на Управата за проширување на Европската комисија, за новинарите во главниот град на Грузија изјави дека Брисел ја следи ситуацијата и е загрижен за тоа што се случува.
„Гледаме загрижувачки случувања кога станува збор за законодавството. Законот за транспарентност, кој беше усвоен во второ читање, е неприфатлив во сегашната форма и ќе создаде сериозни пречки на патот кон пристапување во ЕУ“, рече Купман.
„Но, има уште време. Во септември ќе излеземе со препораки дали да ги започнеме пристапните преговори со Грузија и да објавиме извештај во октомври и ноември, така што има уште време. Но, сега топката кај владата“, додаде тој.
Грузискиот парламент се очекува да го разгледа законот во третото читање за околу две недели.
Европа
Русија: Не ја гледаме поентата на мировната конференција во Швајцарија
Русија објави дека не ја гледа поентата на конференцијата за прекин на огнот во Украина што Швајцарија ја планира за средината на јуни и на која Москва не беше поканета. Швајцарската влада соопшти дека Русија „во овој момент“ не е меѓу десетиците поканети земји, додавајќи дека е отворена за нејзино учество, но дека Москва не е заинтересирана. Берн го најави собирот во јануари, велејќи дека го организирал на барање на украинскиот претседател Володимир Зеленски.
Портпаролот на Кремљ, Дмитриј Песков, нагласи дека Москва не ја смета за веродостојна иницијатива.
„Не разбираме каква пресвртница би била таа мировна конференција“, им рече тој на новинарите. „За каква конференција зборуваме, за каква сериозна конференција со сериозни очекувања дека ќе има некакви резултати, без учество на Русија?
„Тоа е целосно невозможно и јасно е дека тоа е некаква иницијатива која не е фокусирана на резултати“, заклучи тој.
Швајцарската влада соопшти дека „мировниот процес не е можен без Русија. Украина, од друга страна, ги доведува во прашање придобивките од руското учество на состанокот што ќе се одржи во близина на градот Луцерн.
„Знаеме дека нема смисла да ја имаме Русија на маса ако не можете да се осигурате дека таа ќе дејствува со добра волја“, рече шефот на украинската дипломатија Дмитро Кулеба минатата недела во интервју за магазинот „Форин полиси“.
Кулеба смета дека создавањето дополнителен притисок врз Русија на бојното поле и обединувањето на земјите „кои ги делат принципите“ ќе помогнат Русија да биде подготвена да учествува во дијалогот.
Европа
Макрон не ја исклучува можноста за испраќање војници во Украина доколку Русија „ја пробие линијата на фронтот“
Францускиот претседател Емануел Макрон во интервју за Економист изјави дека не ја исклучува можноста за испраќање војници во Украина доколку Русија „ја пробие линијата на фронтот“ и ако Киев тоа го побара од Париз, пренесува BFMTV.
„Доколку Русите ги пробија првите линии на фронтот и ако има украинско барање – што не е случај денес – би било легитимно да се постави тоа прашање“, рече Макрон.
Веќе во февруари, Макрон ја покрена можноста за испраќање западни трупи на украинска територија, потсетува БФМ.
„Како што кажав, не исклучувам ништо бидејќи има некој од другата страна кој не исклучува ништо. Без сомнение, бевме премногу сомнителни кога ги дефиниравме границите на нашата акција”, рече францускиот претседател.
Макрон рече дека „априори отфрлањето“ на можноста за испраќање војници би значело дека „не се научени лекциите од последните две години“, бидејќи во летото 2022 година биле против испраќање тенкови, ракети со долг дострел и авиони. и сега сето ова го испорачуваат во Украина.
„Имам јасна стратешка задача: Русија не смее да победи во Украина. Ако Русија победи во Украина, нема да има безбедност во Европа“, додаде тој.
„Кој може да тврди дека Русија ќе застане таму? Каква безбедност има за другите соседни земји, Молдавија, Романија, Полска, Литванија и толку многу други? И тогаш, каков кредибилитет има за Европејците кои би потрошиле милијарди, велејќи дека тоа е опстанокот на континентот и не би обезбедиле средства за запирање на Русија. Така да, не треба ништо да исклучуваме“, истакна Макрон.