Регион
Додик: Ако не ни ги вратат овластувањата од Дејтон, нема да останеме во БиХ
Претседателот на Република Српска Милорад Додик изјавил дека ентитетот нема да остане во рамките на Босна и Херцеговина (БиХ) доколку не му бидат вратени изворните овластувања од Дејтонскиот договор, пренесуваат српските медиуми.
Според Додик, Република Српска е „примарно заинтересирана“ за враќање на овие надлежности. „Бидејќи тие овластувања беа укинати со одлуките на високите претставници, и покрај договорот кој беше прекршен преку одлуките на странски судии, Српска е одлучна да ги афирмира своите изворни Дејтонски овластувања“, рекол Додик во својот говор по повод 25 години од формирањето на Република Српска.
„Денес, 25 години потоа, Република Српска е одлучна да го живее својот живот како држава и е одлучна во согласност со Дејтонскиот договор да ги уважи своите изворни права“, порачал Додик, додавајќи дека тоа е меѓународно право на Република Српска, со што делувањето на меѓународните претставници и странските судии во Уставниот суд на БиХ не може да биде „мерка на слободата“ на овој ентитет во БиХ.
„Тоа се мерки на неслобода за нас и затоа ние одлучно ќе го отфрлиме секој обид за наметнување на квази одлуки донесени во Уставниот суд на БиХ“, рекол претседателот на Република Српска. Уставниот суд во ноември 2015-та ги оспори одредбите на Законот за празници, сметајќи дека одбележувањето на Денот на Републиката, 9-ти јануари, е неуставно и дискриминаторско за сите граѓани на овој ентитет, кои не се Срби.
Истиот ден во Република Српска се празнува и христијанската слава, Свети Стефан, а самиот 9-ти јануари е спорен бидејќи на тој ден во 1992-та година тогашните српски пратеници во парламентот на БиХ донесоа одлука за формирање на Српската Република Босна и Херцеговина, подоцна преименувана во Република Српска.
Властите на Република Српска во септември минатата година одржаа референдум на кој поголем дел од граѓаните поддржаа 9-ти јануари и натаму да се одбележува како Ден на Републиката. Бидејќи од законот за празници на Република Српска се отфрлени одредбите кои се однесуваат на 9-ти јануари како Ден на Републиката, ентитетскиот парламент го усвои новиот закон за Денот на Република Српска со кој 9-ти јануари и натаму останува Ден на Републиката, со тоа што овој празник е од секуларен карактер и неговата прослава не е обврзувачка./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Сијарто: Фокусот на унгарското претседателство со ЕУ ќе биде проширувањето на Унијата на Западен Балкан
За време на претстојното претседавање со ЕУ, Унгарија планира да се фокусира на прашања кои се важни за централна Европа, како што се борбата против илегалната миграција, проширувањето на Унијата кон Западен Балкан и енергетската безбедност, изјави денеска унгарскиот министер за надворешни работи, Петер Сијарто.
Кога станува збор за проширувањето на ЕУ, Сијарто на прес-конференција со својот чешки колега Јан Липевски рече дека регионот на Западен Балкан не заслужува да чека 14 години и 11 месеци за членство, што, како што вели, го поткопува кредибилитетот на политиката на Унијата, објави унгарската агенција МТИ.
„Тоа е ситуација што треба да се реши, така што унгарското претседателство (со Унијата) има јасна агенда да им помогне на земјите од Западен Балкан да го забрзаат пристапниот процес“, рече Сијарто.
Посочи дека ефектите од миграцијата директно се чувствуваат во Централна Европа од 2015 година и неопходна е сериозна регионална соработка за да се запре мигрантскиот прилив.
„Чешката, словачката и полската полиција ни помогнаа и ни помагаат на јужните граници на Унгарија да ги задржиме илегалните мигранти кои и се закануваат на Европа надвор од границите. Потребни се континуирани заеднички напори на четворицата централноевропски премиери за да се држи под контрола прашањето за квотите и да не се дозволи илјадници или десетици илјади илегални мигранти да се шетаат неконтролирано“, додаде Сијарто.
Шефот на унгарската дипломатија нагласи дека централна Европа „ќе продолжи да се спротивставува на притисоците поврзани со квотите“. Сијарто се осврна и на енергетската безбедност, наведувајќи дека Унгарија и Чешка планираат нуклеарен развој и затоа ќе продолжат да се борат против негативната дискриминација поврзана со нуклеарната енергија во Брисел.
Нуклеарната енергија е одржлив начин за производство на енергија, тоа е безбеден, еколошки и евтин метод за производство на големи количини електрична енергија“, заклучува Сијарто.
Регион
Ана Брнабиќ за 2 јуни распиша локални избори во 66 единици на локалната самоуправа
Претседателката на српското собрание Ана Брнабиќ распиша избори за 2 јуни во 66 единици на локалната самоуправа, бидејќи Националното собрание неодамна со две третини ги усвои измените на Законот за локални избори.
Изборите во овие локални самоуправи ќе се одржат на ист ден со изборите за советници во Градското собрание на Белград, односно на 2 јуни годинава.
„Среќна сум што испративме силна порака од парламентот до сите наши граѓани дека како нивни избрани сме способни да разговараме и да постигнеме договор и покрај сите наши разлики“, рече Брнабиќ по објавата.
Регион
(Видео) Уапсени Срби во Атина, поранешни членови на „Пинк Пантер“: осомничени се за украден накит вреден 315.000 евра
Двајца Срби, кои во минатото биле членови на организацијата „Пинк Пантер“, се уапсени во Атина под сомнение дека ограбиле две познати златарници во центарот на грчката престолнина, соопшти атинската полиција.
Според соопштението на грчката полиција, уапсените оперираат најмалку од минатиот декември, а се претпоставува дека имале соодветна мрежа за канализирање на украдени предмети, бидејќи оствариле добивка од над 315.000 евра.
По претресот во нивните домови, меѓу другото, пронајден е алат користен при кражбата, три рачни часовници, накит, 190 евра, лажна возачка дозвола, три мобилни телефони, лични предмети, како и дополнителен мотоцикл и автомобил што служеле за превоз.