Свет
Сенатот го направи првиот чекор кон укинувањето на Обамакер
Американскиот Сенат во четвртокот го презема првиот конкретен чекор кон укинувањето на законот на претседателот на заминување Барак Обама за достапно здравствено осигурување познат како „Обамакер“, изгласувајќи резолуција со којашто ресорните парламентарни комисии се упатуваат на изработка на законска рамка за поништување на клучната здравствена реформа.
Сенатот одлуката ја изгласа со 51 гласа „за“ и 48 „против“. Се очекува дека оваа седмица истата одлука ќе ја донесе Претставничкиот дом. Укинувањето на Обамакер е приоритет за републиканското мнозинство во двата дома на Конгресот и избраниот претседател Доналд Трамп.
Републиканците досега неколкупати покренуваа правни и законодавни иницијативи за да го урнат овој закон, но сега првпат ќе бидат во можност за тоа бидејќи истовремено имаат мнозинство во двата дома на Конгресот и свој претседател во Белата куќа.
Републиканците велат дека процесот на укинување на Обамакер би можел да потрае со месеци, а изработката на програмата што би ја заменила програмата и подолго, но се под притисок на Доналд Трамп кој веќе со седмици зборува, а го повтори и на првата прес-конференција откако беше избран во средата во Њујорк, дејка во процесот на демонтирање на Обамакер мора да се тргне веднаш. Во Републиканската партија, меѓутоа, има и загриженост дека не е умно да се укинува Обамакер без подготвена алтернатива.
Одлуката усвоена во Сенатот во четвртокот на ресорните комисии им дава рок до 27-ми јануари за изработка на нацрт-закон кој ќе го поништи Обамакер. Притоа имаат намера да ги користат специјалните буџетски процедури со кои им се овозможува да ги отфрлат реформите на Обама со просто мнозинство, што значи дека не им се потребни гласовите на демократите. Во Сенатот републиканците имаат 52 пратеници од 100, а еден –сенаторот Ренд Пол гласаше против партиското мнозинство.
Демократите, пак, најавија дека ќе се борат против тоа со сето она што им е на располагање. „Сакаат да го убијат Обамакер, а истовремено немаат поим каква алтернатива на понудата“, изјави демократскиот сенатор Берни Сандерс.
Што е Обамакер?
Законот за заштитата на пациентите и пристапната нега (АСА), како што официјално се нарекува законот, е усвоен во 2010 година за значително намалување на бројот на неосигурените Американци и истовремено да го забави рапиден раст за потрошувачката во здравство. Неговото усвојување имаше драматично влијание врз американскиот здравствен систем.
Обамакер не е јавна програма за здравствено осигурување. Тоа е законската рамка којашто на приватните осигурители им наметна обврски со намера подобро да се регулира пазарот и ширењето на услугите кои се покриваат со осигурувањето.
Во САД постојат само две јавно здравствен осигурувања на сојузно ниво: Медикејд, наменет за сиромашните семејства и поединци, и Медикер, за оние кои се повозрасни од 65 години. Повеќето американци се осигурени се во приватниот сектор, најчесто преку работодавачите.
Според Обамакер, осигурителните куќи не смеат да ги одредуваат премиите за осигурувањето врз основа на историјата на болестите или полот, како што работеле претходно. Не смеат ниту да одбијат да осигурат пациенти кои се „прескапи“ или да наметната годишно финансиско ограничување на здравствените услуги, што е практика која некои тешко болни Американци ги довела до питачки стап.
Обамакер, исто така, бара осигурителот да ги плати трошоците за болничко лекување, посети на итна помош или некои превентивни прегледи, како тестирања на дијабетес или вакцинација.
За возврат, законот Обамакер бара сите Американци да бидат осигурени или да платат казна. За 2017 година казната изнесува 695 долари за возрасни лица.
Бидејќи неколку милиони луѓе повеќе придонесуваат на здравствениот систем, велат поборниците на Обамакер, премиите кои ги плаќаат здравите Американци ги намалуваат трошоците на лекувањето на најболните.
Републиканците, пак, велат дека присилното учество во системот ги крши основните слободи гарантирани во уставот на САД и остро го осудуваат.
За лицата за коишто работодавачот не плаќа осигурување, администрацијата на Обама воспостави интернет „пазар“ на кој поединците може да се пријават за ACA приватниот осигурител. Тој, пак, за возврат зависно од приходот на тоа лица, има право на даночни олеснувања што ја намалува цената на премијата.
Проблемот е во тоа што сé помалку осигурители учествуваат на тие „пазари“, бидејќи се покажа дека им се помалку профитабилни од очекуваното. Резултат на тоа е што премиите постојано поскапуваат, а за републиканците тоа е доказот дека реформата пропаднала.
Откако Обамакер законот стапи на сила, здравствениот систем се проширил на 20 милиони нови осигуреници, тврди администрацијата на заминува, а бројот на лица без осигурување паднал од 16 отсто во 2009 на 8,9 отсто во минатата 2016 година, што е најниското ниво во историјата. Демократската администрација, исто така, истакнува дека расот на трошоците во здравствениот сектор никогаш не бил побавен./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Продолжуваат преговорите за прекин на огнот: Делегација на Хамас наскоро во Египет
Делегација на палестинското движење Хамас наскоро ќе го посети Египет за понатамошни преговори за прекин на огнот со Израел, се вели во денешното соопштение на милитантната група.
Во соопштението се додава дека лидерот на Хамас, Исмаил Ханије го потврдил „позитивниот дух на групата во проучувањето на предлогот за прекин на огнот“ во телефонски разговор со шефот на египетската разузнавачка служба Абас Камел, пренесе Ројтерс.
Хамас во саботата соопшти дека ја добил најновата позиција на Израел и дека ќе ја проучи пред да одговори на неа. „Ал Кахера њуз“, кој е поврзан со египетската држава, пренесе изјава од неименуван висок египетски функционер кој рече дека делегација на Хамас ќе пристигне во Каиро во следните два дена.
Договорот предвидува 500 камиони, вклучително и 50 камиони со гориво, да влегуваат во Појасот Газа секој ден со залихи кои треба да донесат обновување на енклавата. Израел ќе го прекине воздушниот надзор на Појасот Газа за осум часа секој ден и за 10 часа во деновите кога ќе бидат ослободени заложниците.
Хамас во првата фаза ќе ослободи најмалку 33 затвореници – цивили и војници, деца до 19 години, постари, болни и ранети. За секоја ослободена жена и дете, Израел би ослободил 20 малолетници и палестински затвореници.
За секој ослободен постар, болен и повреден заложник, Израел би ослободил 20 затвореници на возраст над 50 години, кои исто така се болни и повредени и кои не отслужуваат казна подолга од 10 години.
За секоја ослободена жена војник, Израел би ослободил 20 затвореници кои отслужуваат доживотна затворска казна и уште 20 кои отслужуваат до 10 години затвор, кои можат да бидат ослободени во Газа или во странство. Хамас ќе поднесе листа на затвореници што сака да бидат ослободени, со најмногу 20 имиња, додека Израел ќе го задржи правото на вето на имињата што ги дава Хамас.
Од 16-тиот ден од примирјето, страните ќе започнат индиректни преговори за аранжман за враќање на одржливиот мир во Газа, се наведува во извештајот.
Втората фаза од договорот, која би траела 42 дена, би вклучувала комплетирање на договорите за одржлив мир. Во таа фаза, преостанатите израелски машки цивили и војници ќе бидат ослободени, во замена за одреден број палестински затвореници и целосно повлекување на ИДФ од Газа, пренесува медиумот.
Третата фаза, која би траела 42 дена, би вклучувала размена на тела од двете страни и имплементација на петгодишен план за рехабилитација на Газа, вклучувајќи и одредба дека Хамас не смее да ја обнови својата воена инфраструктура.
Свет
Драма на Крит: 18-годишно момче го обвини својот кум дека го силувал од 9-годишна возраст
18-годишно момче од Ираклион на Крит го пријавил својот кум (50) во полиција дека го силувал од девет до дванаесет години.
Полицијата извесно време го истражувала овој случај, а по прибирање докази уапсила 50-годишен маж.
Според сомнежите на полицијата, кумот под изговор дека „го учи музика“ успеал да остане сам со момчето.
Неименуваниот млад човек се пожалил во полиција дека неговиот кум, кој го познава цел живот, неверојатно го мачел кога имал неполни девет години.
Тинејџерот со години верувал дека тој предизвикал такво однесување, поради што му била дадена психолошка поддршка за да ги надмине бариерите и да стане посилен.
Кога нашол сила да признае се, го пријавил кумот во полиција.
Родителите на 18-годишното момче останале во шок откако слушнале дека нивниот син бил малтретиран од човек на кој слепо му верувале.
Свет
Ердоган: „Тие имаат само една цел – да не замолчат“
За западните демократии е срамно и скандалозно што екстремно десничарските движења во некои европски земји добиваат државна поддршка, изјави денеска турскиот претседател Реџеп Таип Ердоган.
„Фактот што во некои европски земји екстремно десничарските движења се поддржани од самата држава е трагедија, срамна и скандалозна за западните демократии“, рече Ердоган, пренесуваат тамошните медиуми.
Тој нагласи дека Турција не може да молчи пред „гнасните“ акти на расистички тероризам и укажа на убиството на десетици турски граѓани во странство.
„Како земја чии граѓани беа жртви на расистички терористички напади, не можеме да молчиме за таквите настани“, рече Ердоган.
Нагласувајќи дека светот не реагира на случаите на исламофобични и расистички напади на ист начин како и на антисемитските дејствија, Ердоган рече дека „оние кои мавтаат лево-десно со извештаи за човековите права тивко ја гледале смртта на 35.000 Палестинци, од кои 15.000 биле деца“. Тој рече дека речиси ниту еден западен лидер не одговорил на оваа бруталност, освен „неколку совесни државници“, додавајќи дека „ниту една храбра душа не се појавила да му каже на Израел: „Доста е“.
„Згрозени сме од лицемерната политика на западните лидери пред масакрот во Газа. Тие со години ни држат лекции за демократијата и слободата“, рече Ердоган.
Потврдувајќи ја посветеноста на Турција да го задржи фокусот на израелскиот геноцид врз народот во Газа и покрај притисокот од „глобалното ционистичко лоби“, тој рече дека „не случајно во последно време има зголемени кампањи насочени кон нив и нивната земја“.
„Овие кампањи имаат само една цел: да не замолчат“, додаде тој.
„Сметам дека е корисно да ги потсетам оние кои нè таргетираат дека не можат да стигнат никаде со претворање на Турција во непријател. Не можеме да бидеме етикетирани како антисемитисти. Ние го отфрламе антисемитизмот на ист начин како што се спротивставуваме на исламофобијата, ксенофобијата и сите форми на културниот расизам“, рече Ердоган.
„Израелските интереси ги исцртуваат границите на западната демократија. Сè што влијае на интересите на Израел е антидемократско и антисемитско во нивните очи“, заклучи Ердоган.