Европа
УНИЦЕФ: Децата-бегалци и мигранти во ризик откако екстремно студеното време го зафати поголемиот дел од Европа
Без знаци на попуштање, во екстремен студ и невреме што беснеат низ Централна, Источна и Јужна Европа, на децата-бегалци и мигранти им се закануваат респираторни и други сериозни болести – па дури и смрт од хипотермија, соопштуваат во петокот од УНИЦЕФ.
Во Грција и на Балканот, околу 23.700 деца-бегалци и мигранти – вклучувајќи и бебиња и новороденчиња, главно од Сирија, Ирак и Авганистан – остануваат заглавени. Многу од нив се сместени во засолништа што се лошо опремени за зима, дури и кога температурите паѓаат под нулата, додаваат од УНИЦЕФ.
Некои делови од Грција, особено островите, каде што илјадници бегалци се засолнети во излитени шатори, за првпат по многу години имаа обилни снежни врнежи. УНИЦЕФ и натаму повикува бегалците и мигрантите кои во моментов живеат во преполни и неоспособени кампови на островите да се преселат во посоодветно и побезбедно сместување на копното.
„Без соодветно засолниште и топла облека, децата се во голема опасност од лошите временски услови“, изјави регионалниот здравствен советник на УНИЦЕФ за Централна и Источна Европа, Базил Родрикес. „Бебињата и многу малите деца обично имаат помалку телесно масно ткиво за да ги изолира од студот, што ги прави поподложни на проблеми со дишењето и на потенцијално фатални вирусни и бактериски инфекции, како што се пневмонија и грип“, додаде тој.
Претрупаноста и лошата изолација ги прават засолништата особено нездрави, и при налет на бранови од студ, овозможуваат брзо ширење на респираторните болести. Според СЗО, сезоната на грип во Европа веќе е во тек, посочуваат од УНИЦЕФ.
„Освен од студеното време, здравствените ризици со кои се соочуваат децата се последица од нивната тешка ситуација како бегалци и мигранти, жртви на неизвесност и застој во обработката на нивните барања за азил“, рече Родрикес. „Оваа состојба „ни на небо, ни на земја“ влијае врз здравјето на децата, уште повеќе зголемувајќи ја нивната мака“, порача тој.
Со тековните напори на УНИЦЕФ за зимска подготвеност низ Хрватска, Србија, Словенија и Македонија, им се помага на жените и децата да бидат на топло.
Во Бугарија, во прифатните центри, УНИЦЕФ им обезбеди целосни комплети зимска облека на 500 деца. Од крајот на 2015-2016 година, центрите за поддршка на децата и семејствата, просторите наменети за мајки и бебиња беа трансформирани од почетните лесни конструкции во зимски опремени и загреани монтажни градби, или беа преселени во цврсти/трајни градби. Исто така, УНИЦЕФ дели зимска облека и други основни производи за жените и децата, користејќи мобилни тимови во некои места./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Во Киев се урива споменик кој ја слави блискоста меѓу Русија и Украина
Властите на Киев во вторникот почнаа да го отстрануваат споменикот од советската ера што ја означува врската меѓу Русија и Украина, повеќе од две години откако Москва започна инвазија врз Украина.
Неколку дена ќе бидат потребни за целосно уривање на споменикот од црвен гранит, кој се состои од дваесетина поединечни елементи, соопшти градската управа.
Тоа е всушност група статуи кои прикажуваат украински Козаци кои го опкружуваат лидерот Богдан Хмелницки и московскиот амбасадор.
Статуите ќе бидат префрлени во воздухопловниот музеј.
Споменикот е изграден во 1982 година за да го одбележи „обединувањето на украинскиот народ со братскиот руски народ“ во 1654 година, кога Хмелницки склучил сојуз со рускиот император во борбата против полско-литванскиот сојуз.
Советските историски книги го романтизираа како почеток на нераскинливо пријателство меѓу Украина и Русија.
Европа
Белоруските спортисти одат на Олимписките игри, Лукашенко: Победете ги противниците
Белорускиот претседател Александар Лукашенко денеска им порача на белоруските спортисти кои учествуваат на Олимписките игри во Париз под неутрален статус „да ги победат своите противници“.
„Ако сте избрале и одите таму под неутрален статус, истепајте ги, покажете им дека сте вистински Белоруси“, рече Лукашенко во соопштението за печатот на претседателството.
За време на посетата на регионот Могилев во Белорусија, жителите го прашале Александар Лукашенко што мисли за ова учество под неутрален статус, се вели во извештајот објавен на веб-страницата на белоруското претседателство.
„Спортистот треба да избере. Доколку одлучи да учествува на Олимписките игри, ќе биде уште пожесток. Затоа што разбирате дека состојбата на умот и гневот не се од мала важност во спортот“, реагира Лукашенко. „Вие сте Белорусија и кога ќе излезете како победници, тоа е добар начин политички да ги удрите во лице“.
Лукашенко, кој е на власт од 1994 година, ги искорени сите форми на опозиција во неговата земја, потиснувајќи мирно масовно движење во 2020 година. Тој е навикнат и на широки изјави и испади, како на пример кога парадираше со калашников во раката пред демонстрантите кои се противат на неговото владеење, нарекувајќи ги „стаорци“. Во февруари 2022 година, тој ја отвори Белорусија за руската армија за да може да ја нападне Украина од север.
Белорусија беше исклучена како земја од Игрите поради нејзината поддршка за руската инвазија на Украина, а нејзините спортисти се натпреваруваат под неутрален статус, без химна, знаме или национални обележја.
Европа
(Видео) Полицијата го бркаше убиецот со меч низ Лондон, објавена е снимка
Би-би-си објави снимка на која се гледа лондонската полиција која го брка напаѓачот со нож, кој денеска уби 13-годишно момче и повреди неколку други.
На снимката се слушаат полицајците како им викаат на граѓаните: „Заклучете ги вратите“.
Полицијата смета дека не се работи за терористички напад.
Полицајците уапсија маж вооружен со меч по извештаите за сериозен инцидент со прободување во североисточен Лондон.
Со електрошокер бил совладан 36-годишниот маж кој мавтал со меч.
„Со голема тага можам да потврдам дека 13-годишното момче кое беше избодено, почина во болница набргу откако му биле нанесени убодите“, изјави началникот на лондонската полиција Стјуарт Бел.
Уште две лица и двајца полицајци се во болница поради убодни рани и се надвор од животна опасност.
„Не мислиме дека постои закана за пошироката заедница, полицијата не бара други осомничени и се чини дека овој инцидент не е поврзан со тероризам“, рече Бел.