Регион
Турскиот парламент одобри минување на претседателски систем
Турскиот парламент со мнозинство гласови во раните утрински часови во саботата го усвои пакетот уставни измени со предлог закон од 18 членови кој вклучува премин кон претседателски систем, и со што се создава можноста референдумот за ова прашање да се одржи во април.
Пакетот уставни измени е усвоен со 339 гласови „за“ и 142 „против“, а за негово изгласување беа потребни најмалку 330 гласови. Уште треба да биде потврден на референдум, на кој за да мине е потребно просто мнозинство.
Се очекува дека претседателот Реџеп Тајип Ердоган во наредните денови, најмногу две седмици, ќе го потпише законот, по што тој ќе биде ставен на референдум, кој ќе се одржи најмалку 60 дена по објавувањето на текстот од законот во службениот весник.
Предлогот на измените и дополнувањата на уставните закони, кој подразбира воведување претседателски систем во Турција наместо парламентарниот, тенденции кои постојат од формирањето на Турската Република во 1923 година, во парламентот го предложи владејачката Партија на правдата и развојот (AKP).
Критичарите велат дека уставните амандмани ќе го ослабат системот на проверки и рамнотежа, како и улогата на парламентот, како и дека премногу овластувања ќе бидат концентрирани во претседателскиот кабинет. Загрижени се, исто така, и за нивното влијание врз независноста на судството.
Ердоган, кој е на чело на Турција од 2003 година, прво како премиер а до 2014 година како претседател, веќе се соочува и дома и во странство, во прв ред кај западните сојузници, со обвинувањата за зголемено авторитарно водство на земјата.
Но претседателот и неговите приврзаници тврдат дека претседателскиот систем на Турција ќе ѝ донесе стабилност, особено кога се соочува со безбедносни закани.
Владејачката AKP на Ердоган, има 316 од 550 мандати во парламентот. Уставните амандмани беа усвоени со помош на мнозинството пратеници од десната Партијана на националното движење (MHP).
„Ние ја направивме нашата работа. Сега го премесуваме тоа прашање… на нашиот народ“, изјави по гласањето во парламентот премиерот Бинали Јилдирим, пренесе агенцијата Anadolu.
Пакетот уставни реформи, меѓу другото, вклучува и укинување на премиерскиот кабинет, а претседателот ќе стане шеф на владата со овластувања да именува и сменува министри/ Ќе биде воведена и функцијата потпретседател на државата.
Народната републиканска партија (CHP), од левиот центар, гласаше против новите измени и ја осуди промената на системот, порачувајќи дека парламентот ќе ослаби. Кемал Киличдроглу, лидер на CHP, рече дека „парламентот ја изневерил својата историја“, додавајќи дека народот би можел да ја исправи оваа грешка на референдумот.
Левичарската прокурдска Народна демократска партија (HDP) го бојкотираше гласањето во парламентот, откако беа приведени поголемиот дел од првите луѓе на партијата.
Доколку уставните промени минат на референдум, Турција првпат во историјата ќе има формален претседателски систем.
Според новиот устав, претседателот на државата нема да мора да го откажува членството во својата политичка партија, како што е сега случајот иако Ердоган е основач на партијата AKP.
Претседателот, исто така, ќе има право на два петгодишни мандати, но турските аналитичари сметат дека во тоа најверојатно нема да се смета тековниот мандат на Ердоган, така што би можел да остане на власт до 2029 година./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Tлото на Балканот се тресе: По Хрватска, земјотреси и во Албанија и Грција
Два земјотреси, во растојание од една минута – во 19.19 и 19.20 часот – вечерва се регистрирани на територијата на Албанија.
Земјотресите се со интензитет од 2,1 степен според Рихеровата скала.
Епицентарот на првиот земјотрес бил на седум километри од Елбасан, додека вториот на 62 километри од Тирана.
Според информациите на ЕМСЦ, неколку минути претходно, земјотрес од 2,5 степени имало и во јужниот дел од Грција, а уште два од 2 и 2,3 степени се регистрирани предмалку на Крит.
Претходно денес, Хрватска ја погоди силен земјотрес од 4,7 степени, а беше почувствуван и во Босна и Херцеговина. По овој потрес, следеа неколку помали.
Регион
Не ги навредив Бугарите, туку ја критикував нашата влада, објасни хрватскиот претседател по изјавата на која реагираше Софија
Хрватскиот претседател Зоран Милановиќ изјави дека со изјавата дека Хрватска е „на дното на ЕУ по повлекувањето на европските пари, а само Бугарија е полоша“, не ги навредил Бугарите, туку ја исмејува хрватската влада која прави „будали и социјални случаи“ од нејзините граѓани.
Милановиќ претходно рече дека „Хрватска е дното на Европската унија и дека само Бугарија е полоша“, па секој ден се молат на Бога, Бугарија да остане последна и ништо да не и се случи, бидејќи во спротивно би била Хрватска“. По изјавата, според хрватските медиуми, Бугарите ја повикале хрватската амбасадорка во Софија, Јасна Огњеновац и изразиле незадоволство, пренесува порталот „Индекс“.
Бугарското Министерство за надворешни работи на хрватскиот амбасадор му пренело „длабоко разочарување од изјавата на претседателот Милановиќ“, каде што истакнале „дека изјавата е неприфатлива за Бугарија и не е во согласност со одличните билатерални односи меѓу Хрватска и Бугарија“.
Тие истакнаа и дека се надеваат дека „хрватската влада ќе се огради од таа изјава“.
„Не ги навредив Бугарите, туку исмевав некои елементи на хрватската влада кои не’ прават будали и социјален случај“, рече шефот на хрватската држава и додаде дека претходно ја критикувал земјата на тема повлекување европски пари.
„Дали можеме да кажеме дека Хрватска се моли Сингапур последен да подигне пари? Дали тоа звучи подобро? Но, Сингапур не е европска земја. Значи некој мора да биде последен. Тоа е Бугарија, а Хрватска е претпоследна“, рече Милановиќ и потсети дека тоа се статистички податоци и дека тоа досега го кажал десет пати.
„Тоа е потсмев, за жал, на сметка на некои во Хрватска кои не прават социјален случај, кои не можат да земат доволно европски средства, па затоа сме претпоследни. Нормално, гледаш кој е последен. Бугарија е последна, секогаш е последна (…) Хрватска е претпоследна“, рече Милановиќ.
„И тоа е факт за кој зборував десет пати. Алелуја (…) Тоа се факти за кои мора да се разговара во политиката бидејќи се многу релевантни податоци. Зошто Хрватска е претпоследна? Зошто не е петата одоздола, или петта одозгора. Зошто не е? Веројатно некој е одговорен за тоа“, додаде тој.
На крајот, како што додаде, никој не се моли Бугарија да пропадне, туку дека неговата изјава е верзија на американската шега за сојузната држава Арканзас, која „се моли на Бога Мисисипи, кој е најсиромашниот, да биде здрав и добро“, бидејќи во спротивно тоа би бил Арканзас.
„За да го знаете тоа, треба да прочитате нешто во животот, а не да се занимавате со селски скандали“, рече Милановиќ.
Регион
Земјотрес со јачина од 4,7 степени во Хрватска, почувствуван и во БиХ
Земјотрес со јачина од 4,7 степени според Рихтеровата скала утрово во 05:38 часот е регистриран во Хрватска, објави Европскиот медитерански сеизмолошки центар (ЕМСЦ).
Според информациите од Европскиот медитерански сеизмолошки центар, земјотресот бил на 92 километри јужно од главниот град Загреб и на 14 километри од границата со Босна и Херцеговина, кај Тржачка Раштела.
Земјотресот бил на длабочина од 10 километри.
Земјотресот најмногу бил почувствуван во централна Хрватска и во дел од Босна и Херцеговина со интензитет од V-VI степени според Европската макросеизмичка скала.
Засега нема извештаи за повредени лица или за предизвикана материјална штета.