Имамот од Исламската заедница во Босна и Херцеговина, познат по своето спротиставување на регрутирањето на момчиња од БиХ за војување на страна на сунитската џихадистичка организација Исламска држава (IS), e нападнат и тешко повреден со нож, а полицијата спроведува истрага за откривање на напаѓачот, објави во вторникот сараевскиот весник Dnevni avaz на својата интернет страница.

Селведин Бегановиќ, имам од селото Трнови крај Велика Кладуша во северозападна Босна, бил нападнат во понеделникот навечер. Тој во исказот посведочил дека бил нападнат од маскирано лице коешто со нож го повредило во левото раме и во дланката.

„Кога тргна да ме забоде во стомакот, успеав да се одбранам и му зададов еден одбранбен удар со шаката, по што се затетерави и побегна“, изјавил Бегановиќ. Потврдил дека полицијата брзо реагирала на неговиот повик, а во локалниот здравствен дом му ја пружиле сета потребна помош.

Багановиќ претходно во отворено писмо објавено во медиумите ги осуди повиците на Билал Босниќ, имам од блискот село Бужиме, упатени до муслиманските момчиња во БиХ да и’ се придружат на Исламската држава и да се вклучат во воените судири во Сирија и во Ирак.

Весникот потсетува дека Бегановиќ уште тогаш станал цел на постојани вербални напади од страна на радикалните исламисти, коишто му го запалиле автомобилот и му упатуваа закани дека ќе му ги убијат децата.

Бегановиќ изјави дека е убеден оти токму таквите личности стојат и зад последниот напад врз него. „Се сомневам и кој ме нападна, но полицијата нека си ја работи својата работа, а јас продолжувам да си ја извршувам својата должност“, рекол.

Имамот Билал Босниќ во моментов е во притвор откако во септември беше уапсен во рамките на приведување поголема група негови приврзаници под сомнение дека поттикнувале терористички активности. Од Обвинителството на БиХ најавија дека наскоро може да се очекува подигнување обвинение за овој случај./крај/мф/сн

Извор: Макфакс