Европа
Азилант во Германија со седум идентитети ја измамил државата за 22.000 евра

Суданец кој користел лажни идентитети за да ја измами германската држава за речиси 22.000 евра, е осуден во понеделникот на условна затворска казна од една година и девет месеци, што е првиот судски епилог по избувнувањето на овој скандал со кој за огромни суми е оштетена Германија.
Покрај тоа, на овој 25-годишен азилант од Судан му се досудени и 200 часови општествено полезна работа, од страна на окружниот суд во Хановер, откако е утврдено дека користел седум лажни идентитети за да дојде до социјална помош во различни германски општини.
Успеал да добие 21.700 евра едноставно регистрирајќи се под различни имиња. Пред судот преку адвокатот рекол дека парите му биле потребни за да им помогне на болните родители во Судан.
Пресудата од повеќе од една година вообичаено би била причина за депортација од Германија за младиот маж кому уште не му бил одобрен азилот. Но бидејќи доаѓа од Дарфур, кој е разорен од војната, веројатно депортацијата ќе биде одложена, дури и доколку неговото барање за азил биде одбиено.
Станува збор за првото судење од околу 300 случаи во сојузната германска земја Долна Саксонија во кои најчесто судански азиланти се обвинети за мамење на државата со користење на лажни идентитети.
На почетокот од февруари Државното обвинителство во Брауншвајг покрена истрага против службеници на Покраинското биро за прифаќање бегалци на покраината на Долна Саксонија (LAB) поради тоа што се обиделе да забошотат преку 300 случаи на измама од страна на подносителите на барања за азил во Германија.
Повеќето случаи се во врска со измамите на бегалци од Судан кои во Германија пристигнале со бегалскиот бран во летото 2015 година, на почетокот од јануари 2017 година изјави претседателот на комисијата во градот Брауншвајг, Јоерн Меменга. Тој штетата ја проценува на неколку милиони евра. Според него, постоеле сознанија дека бегалците неколкупати се регистрирале на различни места за повеќепати да добиваат социјална помош. Повеќето од нив се пријавувале со две или три различни имиња и презимиња, опишувајќи ги методите со кои се служеле. Понекогаш едноставно ќе пуштеле брада, ставале очила, ќе ја истрижеле косата.
Се сметаше дека за тоа не се виновни преоптоварените социјални работници кои во периодот на кулминацијата на бегалската криза регистрирале и до две илјади луѓе дневно. Секое лице ги измамило властите во просек за неколку илјади евра, а во еден случај исто лице користело дванаесет различни идентитети и така се стекнало со 45.000 евра.
Брауншвајг е град со 250.000 жители во сојузната покраина Долна Саксонија. Скандалот беше откриен откако службеничка на бирото за прифаќање и регистрација на бегалците (LAB) уште на почетокот од 2016 година открила над 300 случаи во кои подносителите на барање за азил користејќи се со лажни идентитети незаконски добивале парична помош за подносители на барање за азил. Откако тие случаи ги пријавила на управата на LAB, тие, како што тврди, ѝ наложила да ја забошоти целата ситуација, но таа случаите на измами ги пријавила во полицијата.
На службеничката којашто била вработена на одредено време и тоа во текот на најголемиот бегалски бран. во мај не ѝ бил продолжен договорот „породи непримерно однесување“, односно затоа што ги испратила документите во полицијата „на своја рака и без дозвола на претпоставените“.
Челниците на LAB потврдија дека сите пријавени случаи за користење двојни идентитети се однесувале на подносителите на барање за азил од Судан па директорот заклучил „дека не би било исправно да се свртува кон една етничка група“. Исто така, тврди дека доказниот материјал наводно „не бил доволно силен“.
Службеничката, којашто работела на шалтерот на кој на новодојдените бегалци им се делеле потврди со коишто можеле да подигнат храна, облека и пари, забележала дека повеќе мажи се појавуваат секогаш со нов идентитет. Во првиот бегалски бран на бегалците не им биле земани отпечатоци од прстите, а повеќето не пријавиле никакви лични документи.
„Постои сомневања дека LAB намерно ги криел случаите на незаконско примање социјална помош на основа на лажен идентитет“, соопшти обвинителството на Брауншвајг.
Министерот за внатрешни работи на Долна Саксонија, Борис Писториус, изрази жалење поради тоа што на службеничката не ѝ бил продолжен договорот, но рече дека во LAB „и вака и онака“ имале намера да ги испратат документите во полицијата. „Тоа се нормални постапки, ние до крајот на минатата година знаевме за овие случаи“, рече Писториус.
Но демохристијанската опозиција во Долна Саксонија бара формирање истражна комисија којашто би ја утврдила вистинската заднината на овој случај со забошотување на измамите. Конечната сума за којашто оваа сојузна држава е оштетена со измамите не е познат досега.
Германија минатата 2016 година бегалците ја чинеле 22 милијарди евра, соопшти мината седмица министерството за финансии./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Полска гласа за доверба на владата: „Судбината на Туск е веќе запечатена“

Полските пратеници денес гласаат за предлог за недоверба на владата на премиерот Доналд Туск, додека тој настојува повторно да ја преземе иницијативата за неговата проевропска централно-левичарска коалиција по шокантниот пораз на нивниот кандидат на претседателските избори.
Туск во телевизиско обраќање на 2 јуни изјави дека ќе побара гласање за недоверба на владата откако неговиот претседателски кандидат, градоначалникот на Варшава, Рафал Тржасковски, тесно ги загуби изборите претходниот ден.
Тржасковски, од Граѓанската коалиција на Туск, беше поразен од националистот Карол Навроцки.
Иако владејачкото мнозинство е речиси загарантирано дека ќе победи на парламентарните избори, анкетата спроведена за дневниот весник „Жечпосполита“ покажа дека околу една третина од Полјаците не веруваат дека владата на Туск ќе преживее до крајот на својот мандат во 2027 година. Туск денес ќе го презентира акциониот план на владата пред парламентот, по што ќе следи дебата, пред да се одржи гласање за доверба попладне.
Аналитичарите велат дека многу гласачи се разочарани од неуспехот на владата да ги исполни своите ветувања за либерализација на законите за абортус, реформирање на судството и зголемување на прагот за даночни ослободувања.
Претседателот Анджеј Дуда, сојузник на националистичката партија Право и правда (ПиС) која го поддржа Навроцки, блокираше елементи од програмата на владата на Туск со кои се бараше поништување на реформите на ПиС, кои ЕУ ги смета за поткопување на независноста на судството.
Владата се надеваше дека победата на Тржасковски ќе им овозможи целосно да ја спроведат својата агенда.
Критичарите на владата на Туск обвинуваат дека прави премалку за спроведување на промените и дека предолго ги држи некои иницијативи „на мраз“ во очекување на претседател кој им е наклонет, поради што гласовите на помалите коалициски партнери и бројни медиуми го доведоа во прашање лидерството на Туск.
Во оваа атмосфера, Туск повика на гласање за доверба на владата.
„Гласањето за доверба не е обид да се продолжи со сè што правиме, бидејќи по година и пол многу добро знаеме дека некои работи можат да се направат подобро и побрзо, а гласањето за доверба треба да биде нов почеток“, рече Туск на состанокот на владата.
„Би сакал да знаете дека ова е ден на нов импулс за целата коалиција и уверен сум дека ќе ја исполните оваа задача“, рече тој.
По гласањето за доверба, Туск објави реконструкција на кабинетот во јули. Во меѓувреме, членовите на кабинетот велат дека договорот за коалиција треба да се преговара повторно, што би можело да доведе до конфликт.
Сето ова, секако, оди во прилог на ПиС, според Ројтерс.
Лидерот на ПиС, Јарослав Качински, ги нарече резултатите од претседателските избори „црвен картон“ за владата и повика на создавање „аполитична и техничка влада“ составена од експерти.
Поранешниот министер за правда, Збигњев Зиобро, архитектот на судската реформа на ПиС што владата на Туск сака да ја ревидира, беше уште поотворен.
„Изгубените претседателски избори се крајот на Доналд Туск. Неговата судбина е веќе запечатена“, рече Зиобро.
Европа
Шефот на германската разузнавачка служба: Имаме докази, Русија планира напад врз НАТО

Шефот на германската служба за надворешно разузнавање, Бруно Кал, предупреди дека Германија има „конкретни“ разузнавачки докази дека Русија планира напад врз територијата на НАТО за да ја тестира клучната клаузула во алијансата – Член 5, кој гарантира заемна одбрана.
Во ретко интервју за германскиот подкаст „Table Briefings“, Кал рече дека руското раководство повеќе не верува дека НАТО ќе застане на страната на своите членки и дека Москва би можела да се обиде да провери дали таа обврска всушност се почитува.
„Многу сме сигурни, а имаме и разузнавачки докази за ова, дека [руската инвазија на] Украина не е крај, туку само чекор на патот на Русија кон Западот“, рече Кал.
Тој додаде дека ова не значи дека Германија очекува „големи тенковски единици да се движат од исток кон запад“, туку дека има луѓе во Москва кои сериозно се сомневаат во ефикасноста на Член 5.
Неговите изјави се надоврзуваат на претходните предупредувања на германскиот министер за одбрана Борис Писториус, кој постојано нагласуваше дека Германија „мора да биде подготвена за војна“ до крајот на оваа деценија. „Во моментов не верувам дека е веројатен руски напад“, изјави Писториус за „Тагесшпигел“ минатата година. „Нашите експерти проценуваат дека ова би можело да стане можно во рок од пет до осум години“.
Слична проценка даде данското воено разузнавање во извештај објавен во февруари. Според нив, ако војната во Украина заврши, Кремљ би можел да ослободи значајни воени капацитети и да започне нов конфликт во соседната земја во рок од шест месеци.
Кал, кој наскоро ќе ја преземе својата нова функција како амбасадор на Германија во Светата столица, рече дека Москва сака да го врати НАТО на границите од 1990-тите, да ги истисне САД од Европа и да го прошири своето влијание со сите расположиви средства. „Мора да го спречиме ова додека сè уште можеме“, предупреди тој.
Тој истакна дека соработката со Соединетите Американски Држави останува стабилна и покрај повремените тензии. „Американците го сфаќаат Член 5 многу сериозно“, рече Кал, „но тие со право инсистираат дека Европа мора да го преземе својот дел од одговорноста“.
Иако војната е сè уште ограничена на украинска територија, германската агенција за внатрешна безбедност, Федералната канцеларија за заштита на уставниот поредок (BfV), предупредува дека Русија сè повеќе го шири конфликтот на Запад преку кибернапади и шпионажа.
Според годишниот извештај на BfV, презентиран во Берлин, Москва користи таканаречени агенти со низок профил за извршување саботажи. Овие агенти се осомничени за испраќање запаливи направи во пратки, што предизвика серија пожари во логистичките центри низ Европа минатата година.
„Забележуваме дека агресијата на Русија против Украина сè повеќе ги тестира нашите одбранбени способности во областите на кибер и разузнавачки операции“, рече Синан Селим, заменик-претседател на BfV.
Европа
Словачка се заканува дека ќе ги блокира новите санкции кон Русија

Словачка би можела да го блокира новиот пакет санкции на Европската Унија кон Русија доколку Европската комисија не понуди решение за загриженоста на земјата-членка во врска со снабдувањето со енергија, изјави вчера премиерот Роберт Фицо.
„Словачката Република нема да го поддржи предложениот 18-ти пакет санкции против Руската Федерација доколку Европската комисија не понуди вистинско решение за кризата што ќе ја зафати Словачка по целосното прекинување на снабдувањето со гас, нафта и нуклеарно гориво од Русија“, напиша Фицо на Фејсбук.
Словачка, која граничи со Украина и е членка на ЕУ и НАТО, е во голема мера зависна од руската енергија. Прекинот на протокот на руски гас низ Украина влијаеше на снабдувањето, предизвикувајќи спорови со Киев и загриженост во Братислава.
Словачкиот парламент минатата недела со тесно мнозинство одобри необврзувачка резолуција со која се повикуваат владините претставници да се спротивстават на какви било идни санкции што се сметаат за штетни за економијата на земјата.
Фицо, левичарски националист, постојано јавно ги критикуваше поединечните санкции на ЕУ, тврдејќи дека тие ќе ѝ наштетат на Словачка повеќе отколку на Русија. Но, за разлика од конзервативниот премиер на Унгарија, Виктор Орбан, Фицо и други словачки владини претставници на крајот ги поддржаа сите санкции против Русија без исклучок.