Економија
Кучи: Мерките за енергетски заштеди со цел да го подобрат квалитетот на животот

Министерот за економија Дритон Кучи ги промовираше мерките за енергетски заштеди во домаќинствата кои се во рамки на годинешнава Програма за надоместување на дел од трошоците за купени и вградени сончеви термални колекторски системи во домаќинствата и за надоместување на дел од трошоците за купени и вградени ПВЦ или алуминиумски прозорци во домаќинствата.
„Подобрување на квалитетот на живот на граѓаните е еден од нашите приоритети, кој се применува и во енергетскиот сектор, преку политики кои овозможуваат промоција на обновливите извори на енергија, како и унапредување на енергетската ефикасност. Со тоа придонесуваме и кон остварување на глобалната заложба за заштита на човековата околина, како и одговор на потребата за поголема сигурност во снабдувањето со енергија. Затоа годинава воведовме нова стимулативна мерка, која се однесува на надоместување на 50% од трошоците за купени и вградени ПВЦ и алуминиумски прозорци. За оваа намена обезбедивме 20 милиони денари буџетски средства“, истакна министерот Кучи.
Доделувањето на надоместокот ќе се врши по принципот „прв дојден, прв услужен’’, а максималниот износ на субвенцијата по домаќинство може да достигне до 500 евра.
Министерот за економија се осврна и на веќе познатата, но сѐ уште актуелна стимулативна мерка во врска со надоместување на трошоците за купени и вградени сончеви термални колекторски системи во домаќинствата, која години наназад, започнувајќи од 2007 година, па до денес успешно се реализира.
„За оваа намена во Буџетот на Министерството за економија за 2017 година, согласно интересот, обезбедени се повеќе средства, односно дури 16 милиони денари. Со оваа стимулативна мерка се надоместуваат дел од трошоците во износ од 30% од вкупната инвестиција, но не повеќе од 300 евра по домаќинство. Остварувањето на правото на надомест за оваа мерка е по пат на јавно извлекување кое ќе се одржи на 22 септември 2017 година“, објасни Кучи.
Со реализација на овие стимулативни мерки, за кои пред една недела беа објавени и јавни огласи со условите кои треба да бидат исполнети од страна на апликантите, се промовира поголемо учество на обновливите извори на енергија, унапредување на енергетската ефикасност и заштита на животната средина, земајќи ги предвид сите обврски кои ги има преземено Република Македонија како земја која претендира да стане дел од Европската Унија.
Но, како што потенцираше Кучи, овие мерки истовремено имаат за цел да го подобрат и квалитетот на живот на граѓаните на Република Македонија и подигање на јавната свест за придобивките од искористувањето на обновливите извори на енергија и примената на мерките за заштеда на енергија во домот. Граѓаните веќе покажуваат голем интерес за овие две мерки, а во Министерството за економија почнаа да пристигнуваат и првите апликации./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
„Соработка за економски напредок“: средба меѓу гувернерот на Народната банка и претседателот на Стопанската комора

Во духот на заедничката определба за поттикнување на економскиот развој и за зајакнување на институционалната соработка, во Народната банка денес се одржа средба меѓу гувернерот Трајко Славески и претседателот на Стопанската комора на Северна Македонија, Бранко Азески.
На средбата беше нагласена важноста на постојаниот дијалог помеѓу носителите на економската политика и бизнис-заедницата, особено во контекст на актуелните светски и регионални економски предизвици. Претседателот Азески истакна дека Комората е подготвена за понатамошна активна соработка со Народната банка, изразувајќи поддршка за професионалноста и кредибилитетот што гувернерот Славески ги носи на оваа позиција, известува Народната банка.
Во разговорот беа отворени теми поврзани со монетарната политика, финансиската стабилност, пристапот до финансии за стопанството, како и улогата на Народната банка во создавањето поволно деловно опкружување. Двете страни се согласија дека со заемна отвореност и координација може да се придонесе за поефикасно исполнување на стратегиските економски цели на земјата.
Гувернерот Славески ја истакна заложбата на Народната банка за транспарентност, предвидливост и поддршка на стабилноста, како предуслов за одржлив раст. Тој упати благодарност за поддршката и изрази задоволство од иницијативите на Комората за продлабочување на комуникацијата со институциите од финансискиот сектор.
Средбата заврши во конструктивен дух, со договор за засилување на соработката преку редовни консултации и размена на анализи и мислења од заеднички интерес, се наведува во соопштението од Народната банка.
Економија
Се зголемува цената на дизелот

Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе Одлука со која се врши зголемување на малопродажните цени на нафтените деривати во просек за 0,93 % во однос на одлуката од 2.06.2025 година.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините за 1,833%, кај дизелот за 3,057%, кај екстра лесното масло за 3,388% и кај мазутот зголемувањето е за 3,088%.
Курсот на денарот во однос на доларот во изминатиот период по кој беа формирани цените со претходната пресметка е понизок за 0,5243%.
Малопродажните цени на бензините ЕУРОСУПЕР БС-95 и ЕУРОСУПЕР БС-98 не се менуваат.
Малопродажните цени на ЕУРОДИЗЕЛ (Д-Е V) и на Екстра лесното масло за домаќинство на (ЕЛ-1) се зголемуваат за 1,00 ден/лит.
Малопродажната цена на Мазутот М-1 НС се зголемува за 0,624 ден/кг и сега ќе изнесува 38,486 ден/кг.
„Напоменуваме дека ова се максималните цени на нафтените деривати од 00:01 часот на 10.6.2025 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени“, велат од РКЕ.
Економија
Објавени повици за самовработување, за млади до 29 години грант до 10.000 евра, а за невработени над 29 години грант до 7.000 евра

Министерот за економија и труд, Бесар Дурмиши, заедно со директорот на Агенцијата за вработување на Република Северна Македонија, Селајдин Белули, денеска официјално го објавија отворањето на јавниот повик за Мерка 1.1 и Мерката 1.2 во рамки на Оперативниот план за вработување за 2025 година, кои имаат за цел поддршка на самовработувањето на невработените граѓани регистрирани во Агенцијата за вработување.
Мерката 1.1 е наменета за лица над 29 години и обезбедува финансиска поддршка од 430.500 денари односно 7.000 евра за основање на нов бизнис, а Мерката 1.2 се однесува за млади до 29 години, кои имаат можност да добијат поддршка до 615.000 денари или 10.000 евра за основање сопствен бизнис.
Двете мерки, исто така, вклучуваат обука за претприемништво, подготовка на бизнис план и менторство за 6-месечен период за целните групи, вклучувајќи ги и лицата со попреченост, припадниците на ромската заедница и жените од руралните средини.
„Овие мерки не се само финансиска помош, туку се директна инвестиција во потенцијалот на граѓаните и во развојот на локалната економија“, истакна министерот Дурмиши на прес-конференцијата.