Европа
Малите против големите во ЕУ: Или ремонт, или катастрофа
Шефот на полската дипломатија Витолд Вашиковски изјави дека неговата земја инсистира да се направи „ремонт“ на ЕУ преку измена на основниот договор, бидејќи не сака „катастрофа на Унијата“, до која би се дошло преку подлабока интеграција и посебни институции за Еврозоната, пренесуваат полските медиуми.
„Треба да се дојде до нов основен договор за да се спречи натамошната интеграција која е во спротивност со нашите интереси и очекувањата на поголем дел од европските граѓани“, рекол Вашиковски, додавајќи дека за време на неговата неодамнешна посета на Париз му било кажано дека целта на Франција е уште потесно поврзување со Германија и подлабока интеграција.
„Сериозно се размислува и за посебни институции за Еврозоната. Не сакаме катастрофа на ЕУ, затоа предлагаме ремонт на оваа институција“, рекол Вашиковски. Од доаѓањето на власт на конзервативната Партија на правото и правдата (PiS) на поранешниот полски премиер Јарослав Качински во есента 2015 година, Полска заедно со Унгарија се обидува во ЕУ да покрене ткн „контрареволуција“.
Обидите се насочени кон тоа да се промени Лисабонскиот договор, односно да се направи целосно нов договор кој интеграцијата би ја вратил на „послаб“ сојуз на силните национални држави собрани околу заедничкиот пазар и заедничката одбрана пред се од евентуалната агресија од Русија.
Качински на почетокот на февруари од германската канцеларка Ангела Меркел, која беше во посета на Варшава, побара откажување од идејата за Европа во „две брзини“, односно побрза интеграција на оние земји кои се подготвени да го направат тоа, бидејќи смета оти „тоа ќе биде разбивање и уништување на ЕУ“.
Меркел тогаш порача дека интеграцијата со различни брзини не е ништо ново бидејќи и сега некои земји се во Шенген зоната, додека други не се, некои се во Еврозоната а некои пак се уште плаќаат со своите национални валути, и дека не постои опасност по ЕУ со овој концепт, доколку не се создаде некој ексклузивен клуб во кои другите не би можеле да влезат.
Во Варшава неодамна непријатно одекна веста дека минатата недела Европскиот парламент предложил за Еврозоната да се усвојува посебен буџет. „ЕП го направи тоа поради потребите на Еврозоната, на која и е потребна подлабока интеграција. Очигледно е дека Европа во две брзини може да значи помалку пари за Полска. Сигурно од 2020-та година започнува новата финансиска перспектива и можеби не треба да ни биде чудно доколку после години на критикување кон главниот европски ток во еден момент да ни кажат „Не сакате? Добро, благодарам и довидување“, коментира пак поранешниот полски министер за финансии Јацек Ростовски./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Грузија сака да донесе закон за „странски агенти“, oфицијален претставник на ЕУ: Неприфатливо
Висок функционер на Европската унија денеска ја предупреди грузиската влада дека предложениот закон за „странски агенти“ е неприфатлив и ќе претставува пречка во напорите на земјата да се приклучи кон ЕУ, доколку биде усвоен во сегашната форма.
Грузискиот парламент вчера го усвои законот во второто читање, за кој опозицијата вели дека е инспириран од Кремљ, додека полицијата употреби солзавец и шок-бомби за да ги растера толпата демонстранти.
Владата смета дека законот е неопходен за да се гарантира транспарентно странско финансирање на невладините организации.
Секоја вечер, речиси еден месец, се поголем број демонстранти излегуваат на улиците. Вчера десет илјади демонстранти го блокираа центарот на Тбилиси на најголемиот антивладин митинг организиран досега.
Герт Јан Купман, директор на Управата за проширување на Европската комисија, за новинарите во главниот град на Грузија изјави дека Брисел ја следи ситуацијата и е загрижен за тоа што се случува.
„Гледаме загрижувачки случувања кога станува збор за законодавството. Законот за транспарентност, кој беше усвоен во второ читање, е неприфатлив во сегашната форма и ќе создаде сериозни пречки на патот кон пристапување во ЕУ“, рече Купман.
„Но, има уште време. Во септември ќе излеземе со препораки дали да ги започнеме пристапните преговори со Грузија и да објавиме извештај во октомври и ноември, така што има уште време. Но, сега топката кај владата“, додаде тој.
Грузискиот парламент се очекува да го разгледа законот во третото читање за околу две недели.
Европа
Русија: Не ја гледаме поентата на мировната конференција во Швајцарија
Русија објави дека не ја гледа поентата на конференцијата за прекин на огнот во Украина што Швајцарија ја планира за средината на јуни и на која Москва не беше поканета. Швајцарската влада соопшти дека Русија „во овој момент“ не е меѓу десетиците поканети земји, додавајќи дека е отворена за нејзино учество, но дека Москва не е заинтересирана. Берн го најави собирот во јануари, велејќи дека го организирал на барање на украинскиот претседател Володимир Зеленски.
Портпаролот на Кремљ, Дмитриј Песков, нагласи дека Москва не ја смета за веродостојна иницијатива.
„Не разбираме каква пресвртница би била таа мировна конференција“, им рече тој на новинарите. „За каква конференција зборуваме, за каква сериозна конференција со сериозни очекувања дека ќе има некакви резултати, без учество на Русија?
„Тоа е целосно невозможно и јасно е дека тоа е некаква иницијатива која не е фокусирана на резултати“, заклучи тој.
Швајцарската влада соопшти дека „мировниот процес не е можен без Русија. Украина, од друга страна, ги доведува во прашање придобивките од руското учество на состанокот што ќе се одржи во близина на градот Луцерн.
„Знаеме дека нема смисла да ја имаме Русија на маса ако не можете да се осигурате дека таа ќе дејствува со добра волја“, рече шефот на украинската дипломатија Дмитро Кулеба минатата недела во интервју за магазинот „Форин полиси“.
Кулеба смета дека создавањето дополнителен притисок врз Русија на бојното поле и обединувањето на земјите „кои ги делат принципите“ ќе помогнат Русија да биде подготвена да учествува во дијалогот.
Европа
Макрон не ја исклучува можноста за испраќање војници во Украина доколку Русија „ја пробие линијата на фронтот“
Францускиот претседател Емануел Макрон во интервју за Економист изјави дека не ја исклучува можноста за испраќање војници во Украина доколку Русија „ја пробие линијата на фронтот“ и ако Киев тоа го побара од Париз, пренесува BFMTV.
„Доколку Русите ги пробија првите линии на фронтот и ако има украинско барање – што не е случај денес – би било легитимно да се постави тоа прашање“, рече Макрон.
Веќе во февруари, Макрон ја покрена можноста за испраќање западни трупи на украинска територија, потсетува БФМ.
„Како што кажав, не исклучувам ништо бидејќи има некој од другата страна кој не исклучува ништо. Без сомнение, бевме премногу сомнителни кога ги дефиниравме границите на нашата акција”, рече францускиот претседател.
Макрон рече дека „априори отфрлањето“ на можноста за испраќање војници би значело дека „не се научени лекциите од последните две години“, бидејќи во летото 2022 година биле против испраќање тенкови, ракети со долг дострел и авиони. и сега сето ова го испорачуваат во Украина.
„Имам јасна стратешка задача: Русија не смее да победи во Украина. Ако Русија победи во Украина, нема да има безбедност во Европа“, додаде тој.
„Кој може да тврди дека Русија ќе застане таму? Каква безбедност има за другите соседни земји, Молдавија, Романија, Полска, Литванија и толку многу други? И тогаш, каков кредибилитет има за Европејците кои би потрошиле милијарди, велејќи дека тоа е опстанокот на континентот и не би обезбедиле средства за запирање на Русија. Така да, не треба ништо да исклучуваме“, истакна Макрон.