Европа
Британската влада мисли дека на Шкотска не ѝ е потребен нов референдум за независност
Заканите за одржување нов шкотски референдум за независност создале непотребна несигурност и поделби, изјави портпаролот на британската влада во понеделникот, одговарајќи на медиумските извештаи дека во Шкотска владејачката парти се подготвува да бара референдум.
„Прашањето не е дали може да се одржи нови референдум, туку дали треба да се одржи, а едноставниот одговор на тоа е – не. Заканите со референдум создадоа непотребна несигурност и поделби“, се вели во изјавата на портпаролот на владата во Лондон којашто ја цитираат медиумите.
Притоа истакнал дека „одлуката за останувањето во Обединетото Кралство која шкотскиот народ ја донесе во 2014 година и сите докази укажуваат дека народот во Шкотска не сака нов референдум“.
Шкотската премиерка Никола Старџен ѝ постави на британската колешка по должност Тереза Меј на 31-ви јануари ултиматум од два месеца да го договори излегувањето на Велика Британија од Европската унија, и навести нов референдум за независност на Шкотска. Многу наскоро потоа британската влада соопшти дека не мисли оти би требало повторно да се организира референдум за независност на Шкотска.
Според медиумите на Островот, до крајот на март, кога треба да биде активиран членот 50 од Лисабонскиот договор со кој се регулира истапувањето на земја членка од ЕУ, можно е да биде одржан конгрес на Шкотската национална партија (SNP) чиј лидер е Старџен, и која доминира во парламентот на овој британски ентитет. Се претпоставува, исто така, дека на конгресот може да биде објавено одржување на нов референдум за независност на Шкотска од Обединетото Кралство.
Исто така, SNP има намера активно да биде вклучена во процесот на дискусијата за условите за излегувањето од ЕУ, предложувајќи во договорот околу 50 амандмани.
Како челник на Шкотската национална партија (SNP), Старџен пред референдумот од 23-ти јуни 2016 година водеше кампања за останувањето на Обединетото Кралство во ЕУ и шкотските избирачи се изјаснија за зачувување на членството во Унијата, како и гласачите во Северна Ирска, додека Англија и Велс со своите повеќе гласачи го одредија излегувањето.
„Ќе сториме сé за волјата на граѓаните на Шкотска да биде земена предвид“, изјави претставничката на SNP за правни прашања, Џоана Чери. Таа истакнува дека планот на владата мора да добие одобрување од новиот министерски совет, во кој влегуваат и челниците на автономните региони на Обединетото Кралство, односно Англија, Велс, Северна Ирска и Шкотска.
На контроверзниот референдум за независност во 2014 година мнозинството, со 55 наспроти 45 отсто, гласаше Шкотска да остане во составот на Обединетото Кралство. Меѓутоа, откако на британскиот референдум беше изгласано излегувањето од ЕУ, според Старџен „тоа не е повеќе земјата во којашто Шкотите тогаш одлучија да останат“./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Се огласи болницата во Банска Бистрица: Ова се последните информации за состојбата на Роберт Фицо
Состојбата на словачкиот премиер Роберт Фицо, кој беше ранет во обид за атентат минатата недела, е стабилна, соопштија од болницата во Банска Бистрица.
„Клинички се подобрува, комуницира, воспалителните параметри полека се намалуваат. Премиерот останува под наша грижа“, соопштија од болницата во Банска Бистрица по денешната седница на Советот.
Фицо беше тешко ранет минатата среда по состанокот на кабинетот кога се приближи до насобраните луѓе.
Тој со хеликоптер беше префрлен во болницата во Банска Бистрица каде итно беше опериран и оттогаш е таму.
Претходните денови се зборуваше за префрлање на премиерот во друга институција, но како што може да се заклучи од денешното соопштение на болницата, тој засега останува во Банска Бистрица.
Европа
Украина со дронови нападна руска рафинерија: „Има штета, престана да работи“
Руска нафтена рафинерија во Славјанск, во Краснодарската област, беше оштетена по напад со беспилотно летало кон крајот на минатата недела, објави денеска државната новинска агенција Тасс, цитирајќи претставник на компанијата за безбедност.
Шест беспилотни летала погодија област на нафтена рафинерија во Славјанск во јужниот дел на Русија Краснодар во раните утрински часови, според локалните власти.
Новинската агенција Интерфакс објави дека рафинеријата престанала да работи по нападот.
„Причинета е штета. Ќе се утврдат нејзината големина и опсег“, ја цитира Тасс изјавата на безбедносниот претставник Едуард Труднев во понеделникот.
Рафинеријата во Славјанск е приватна постројка со капацитет од околу 100.000 барели дневно. Произведува гориво за домашни потреби и за извоз.
Европа
Ердоган: Раиси беше вреден колега и брат
Турскиот претседател Реџеп Таип Ердоган денеска изрази сочувство за смртта на иранскиот претседател Ебрахим Раиси и иранскиот министер за надворешни работи Хосеин Амир Абдолахиан, нагласувајќи дека Турција стои во солидарност со Иран.
Ердоган на платформата Х напиша дека се сеќава на Раиси со почит и благодарност, наведувајќи дека иранскиот претседател вложил напори за мир во Иран и регионот.
„Турција стои покрај Иран во ова тешко време“, рече Ердоган, нарекувајќи го Раиси „вреден колега и брат“.
Покрај Раиси и иранскиот министер за надворешни работи Хосеин Амир Абдолахиан, идентификувани се уште три лица кои загинаа во хеликоптерска несреќа во северозападен Иран, објави иранската државна новинска агенција ИРНА.
Убиени се имамот во градот Табриз, ајатолахот Мохамад Али Ал-е Хашем, началникот на иранската провинција Источен Азербејџан, генерал Малек Рахмати и командантот на единицата за заштита на претседателот, Сардар Сејед Мехди Мусави.
Загинаа и одреден број телохранители и екипаж на хеликоптер кои се уште не се идентификувани.