Европа
Австрија бара изземање од европскиот систем за релокација на мигрантите
Австрија ќе бара да биде изземена од обврската да прими дополнителен број мигранти врз основа на системот за нивно префрлување на Европската унија и наведува дека веќе досега чесно го преземала својот удел во текот на европската мигрантска криза.
Станува збор за најава за нов удар врз релокацискиот систем на ЕУ кој ќе распореди само дел од мигрантите пристигнати на територијата на Европската унија и кој одвај се имплементира, благодарејќи на отпорот, во прв ред, на источноевропските земји, како Унгарија, Полска, Чешка и Словачка.
Оваа најава од Австрија доаѓа истовремено со јакнењето на безбедност и построгите правила врзани со имигрантите кои ги започна владејачката коалиција на конзервативците и социјалдемократите во обидот да го спречат подемот на крајната десница којашто го истакнува прашањето на имиграцијата, откако бранот бегалци од 2015 година ги поттикна канењето на опозициската Слободарска партија, која во анкетите и натаму е во водство.
„Мислиме дека изземањето за Австрија е потребно бидејќи таа веќе ги исполни своите обврски. Ќе разговараме за тоа со Европската Комисија. Ќе испратиме писмо за тоа што е поскоро можно веднаш ќе започнеме со расправата“, изјави за новинарите австрискиот канцелар Кристијан Керн по редовната седмична седница на владата и додаде дека треба да се провери дали Австрија веќе ги исполнила своите обврски.
Околу 14.500 баратели на азил се преместени од Грција и Италија, првите земји од ЕУ во кои пристигнуваат бројните бегалци и имигранти од Блискиот исток и северна Африка, врз основа на двегодишниот план кој предвидуваше распоредување на 160.000 луѓе а кој истекува во јуни.
Австрија примила околу 90.000 баратели на азил во 2015 годна, што е повеќе од 1 отсто од нејзиното вкупно население. Во Германија истата година дошле повеќе од милион мигранти, од кои многумина пристигнаа преку балканската рута а потоа преку Австрија.
Многу брзо по најавата на австрискиот канцелар пристигна одговорот од Брисел. Австрија мора да го почитува договорот на Европската унија за разместување на бегалците и ќе се соочи со последици доколку се повлече од него, порача од Брисел, портпаролката на Европската комисија, Наташа Берто.
„Се очекува Австрија да ги исполни своите правни обврски на основа на одлуката на Советот да започне со релокацијата“, изјави на прес-конференција Берто коментирајќи ги најавите за преиспитување на австриското разместување на бегалците.
Таа истакна дека ниедна земја нема право еднострано да се повлече од договорот потпишан во 2015 година, за распоредување на 160.000 мигранти од Италија и Грција во другите земји членки на ЕУ.
„Тие единствено може да изберат да дејствуваат незаконски, што ќе го констатираме со големо жалење, но не и без последици“, порача портпаролката./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Во Киев се урива споменик кој ја слави блискоста меѓу Русија и Украина
Властите на Киев во вторникот почнаа да го отстрануваат споменикот од советската ера што ја означува врската меѓу Русија и Украина, повеќе од две години откако Москва започна инвазија врз Украина.
Неколку дена ќе бидат потребни за целосно уривање на споменикот од црвен гранит, кој се состои од дваесетина поединечни елементи, соопшти градската управа.
Тоа е всушност група статуи кои прикажуваат украински Козаци кои го опкружуваат лидерот Богдан Хмелницки и московскиот амбасадор.
Статуите ќе бидат префрлени во воздухопловниот музеј.
Споменикот е изграден во 1982 година за да го одбележи „обединувањето на украинскиот народ со братскиот руски народ“ во 1654 година, кога Хмелницки склучил сојуз со рускиот император во борбата против полско-литванскиот сојуз.
Советските историски книги го романтизираа како почеток на нераскинливо пријателство меѓу Украина и Русија.
Европа
Белоруските спортисти одат на Олимписките игри, Лукашенко: Победете ги противниците
Белорускиот претседател Александар Лукашенко денеска им порача на белоруските спортисти кои учествуваат на Олимписките игри во Париз под неутрален статус „да ги победат своите противници“.
„Ако сте избрале и одите таму под неутрален статус, истепајте ги, покажете им дека сте вистински Белоруси“, рече Лукашенко во соопштението за печатот на претседателството.
За време на посетата на регионот Могилев во Белорусија, жителите го прашале Александар Лукашенко што мисли за ова учество под неутрален статус, се вели во извештајот објавен на веб-страницата на белоруското претседателство.
„Спортистот треба да избере. Доколку одлучи да учествува на Олимписките игри, ќе биде уште пожесток. Затоа што разбирате дека состојбата на умот и гневот не се од мала важност во спортот“, реагира Лукашенко. „Вие сте Белорусија и кога ќе излезете како победници, тоа е добар начин политички да ги удрите во лице“.
Лукашенко, кој е на власт од 1994 година, ги искорени сите форми на опозиција во неговата земја, потиснувајќи мирно масовно движење во 2020 година. Тој е навикнат и на широки изјави и испади, како на пример кога парадираше со калашников во раката пред демонстрантите кои се противат на неговото владеење, нарекувајќи ги „стаорци“. Во февруари 2022 година, тој ја отвори Белорусија за руската армија за да може да ја нападне Украина од север.
Белорусија беше исклучена како земја од Игрите поради нејзината поддршка за руската инвазија на Украина, а нејзините спортисти се натпреваруваат под неутрален статус, без химна, знаме или национални обележја.
Европа
(Видео) Полицијата го бркаше убиецот со меч низ Лондон, објавена е снимка
Би-би-си објави снимка на која се гледа лондонската полиција која го брка напаѓачот со нож, кој денеска уби 13-годишно момче и повреди неколку други.
На снимката се слушаат полицајците како им викаат на граѓаните: „Заклучете ги вратите“.
Полицијата смета дека не се работи за терористички напад.
Полицајците уапсија маж вооружен со меч по извештаите за сериозен инцидент со прободување во североисточен Лондон.
Со електрошокер бил совладан 36-годишниот маж кој мавтал со меч.
„Со голема тага можам да потврдам дека 13-годишното момче кое беше избодено, почина во болница набргу откако му биле нанесени убодите“, изјави началникот на лондонската полиција Стјуарт Бел.
Уште две лица и двајца полицајци се во болница поради убодни рани и се надвор од животна опасност.
„Не мислиме дека постои закана за пошироката заедница, полицијата не бара други осомничени и се чини дека овој инцидент не е поврзан со тероризам“, рече Бел.