Македонија
Одбележан денот на првата механизирана пешадиска бригада

Припадниците на 1. механизирана пешадиска бригада (1.мпбр) од Армијата на Република Македонија на достоинствен начин со прикладна воена свеченост во касарната „Страшо Пинџур” во Петровец го одбележаа денот на бригадата.
Денот на единицата, определен со одлука на Претседателот на Република Македонија е потсетување на денот кога 1.мпбр со достигнувањето на оперативната готовност ги презеде задачите и одговорностите на двете поранешни бригади согласно новата организациско-формациска структура на АРМ, со седиште на командата во Петровец.
Долгиот и цврст маршевски чекор на ешалоните од сите единици од состав на бригадата го отслика значајот на оваа најголема борбена единица на АРМ препознатлива по добиените високи резултати од оценувањата, вежбовните активности, мировните мисии во Авганистан и Ирак, но и по пружената помош на граѓаните на Република Македонија, секогаш кога за тоа се укажала потреба.
Командантот на 1.мпбр, бригаден генерал Мирче Ѓоргоски во своето обраќање нагласи дека патриотизмот кој е движечка сила во сите нас, вложениот труд и посветеност во извршување на задачите претставуваат гарант за независноста и територијалниот интегритет на Република Македонија.
Пофалните зборови за успешниот ангажман на единицата не изостанаа и во говорот на командантот на здружено оперативната команда, бригаден генерал Зоран Милески, при што беше нагласена потребата од постојана посветеност во изградба на воен колектив подготвен решително да се избори со сите безбедносни предизвици.
Согласно програмата на воената свеченост за најдобра единица во бригадата е прогласена 4 минофрлачка батерија од 4 механизиран пешадиски баталјон, а се доделија стимулативни мерки и унапредувања. На крајот од свеченоста присутните го проследија тактичко техничкиот збор на орудија, оружје и опремата со кои располага бригадата збогатен со настап на на културно уметничкото друштво „Илинден“.
Во духот на одбележување на 25 години од постоењето на АРМ, поранешните команданти на првата и втората механизирана пешадиска бригада, генерали во пензија по завршување на свеченоста пред присутните потсетија на значајните моменти поврзани со историјата на бригадата.
На свеченоста покрај началникот на ГШ на АРМ генерал-потполковник Методија Величковски присуствуваа, генералите од АРМ, претставници од Кабинетот на претседателот на Република Македонија, МО и ГШ на АРМ, командантите на потчинетите команди и единици на ГШ на АРМ, поранешни команданти на бригадата, пензионирани генерали, претставници од локалната самоуправа и други високи гости./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски и Филипче утре ќе се сретнат во Владата

Премиерот Христијан Мицкоски и претседателот на СДСМ, Венко Филипче, утре ќе остварат средба во владината зграда.
Претходно денес, Мицкоски изјави дека е подготвен да го прими на средба лидерот на СДСМ, Венко Филипче, во кое било време.
„Стојам на располагање во секое време, ќе го прераспределам мојот распоред – ако треба на полноќ, или после полноќ за да го сослушам неговиот план и да видиме дали по тој план нешто може да се реши. Но ако планот опфаќа пристап каков што беше во минатото за време на ковидот, тогаш јас такви планови не можам да прифатам“, изјави Мицкоски одговарајќи на новинарски прашања.
Пред новинарите денес се обрати и Филипче, кој пак предложи нов концепт за политички и општествен дијалог. Тој очекува во фокусот на средбата да бидат бразованието, здравството, правосудството, заштитата на животната средина и партизацијата во институциите.
Македонија
Сиљановска-Давкова: Децата со аутизам се само поразлични, не се деца со маана

Претседателката Гордана Сиљановска-Давкова денеска прими родители од Здружението на граѓани за третман на лица со аутизам, АДХД и Аспергерог синдром „Во мојот свет“, по повод 2 април – светскиот ден за подигање на свеста за аутизмот.
На средбата, родителите истакнаа дека сè уште се сами во борбата за подобрување на животот на своите чеда. Отсуствува системско решавање на проблемите. Родителот, велат тие, нема никаква поддршка. Има многу малку лични асистенти кои им помагаат, тешкиот товар паѓа на нив и затоа дел од нив не работат. Истовремено, поради отсуство на емпатија, секојдневно се соочуваат со чудни погледи и стигматизација на нивните деца. Најболно и најстрашно за нив, истакнуваат, е кога ќе помислат кој ќе се грижи за детето по нивната смрт.
Слушајќи ги проблемите со кои се соочуваат родителите, претседателката потенцираше дека децата треба да ни се најважни, бидејќи, како што рече, „убедена сум дека секое дете може да дојде до израз ако му се даде шанса“.
Таа, во волонтерството препознава едно од можните решенија на проблемот. По примерот на САД и многу други држави, учениците, средношколци и студентите, како волонтери би добивале поени што ќе се земаат предвид при евалуацијата. „Да дадеш нешто, без да бараш ништо за возврат, тоа е едноставно љубов“, смета таа.
Уште еден голем проблем на којшто посочија родителите е отсуството на разбирање и прифаќање, за жал, не се разговара ниту во семејството. Децата уште од градинка треба да учат дека некои нивни врсници се поразлични од нив и да ги прифатат како такви. Само на тој начин ќе се развие инклузивната свесност, велат родителите.
Во оваа насока претседателката се заложи за креирање интегрално решение, коешто ќе вклучи измени не само во законите за основно и за средно образование, туку и во други закони каде посебен дел ќе им биде посветен на децата со попреченост. „На тие деца им е потребно да учествуваат во социјалниот живот, а не да бидат оставени на маргините на општеството“, заклучи таа. Час поскоро треба да се обезбеди простор за Центарот за аутизам во Тетово, со оглед на веќе пристигнатата бугарска донација.
Од здружението „Во мојот свет“ укажаа дека забрзано расте бројот на лица со аутизам, од 2000 година до сега, пораснал за 317%. Поради недостиг на национален регистар, според статистиката на ЕУ и на СЗО, се претпоставува дека во земјава има од 15 до 20 000 лица со аутистичен спектар на нарушување кои нестрпливо очекуваат разбирање и помош.
Македонија
Муцунски во работна посета на Брисел: Проширувањето мора да биде врвен политички приоритет со јасна и предвидлива траекторија

Министерот за надворешни работи и надворешна трговија, Тимчо Муцунски, од денеска до петок престојува во работна посета на Брисел, Кралството Белгија.
Во рамки на посетата, министерот Муцунски одржа одделни обраќања пред претставници на неколку бриселски тинк-тенкови, како и пред Центарот за европски политики (EPC), каде говореше за стратешката определба на државата – членството во Европската Унија.
Министерот изрази искрена благодарност до Европската Унија и земјите членки за покажаната солидарност и брзата реакција по трагичната несреќа во Кочани, оценувајќи ја како автентичен пример за европски вредности на дело.
Говорејќи за евроинтегративниот процес на државата, Муцунски ја нагласи целосната усогласеност на земјата со Заедничката надворешна и безбедносна политика на ЕУ, како и посветеноста на Владата на реформската агенда. Тој истакна дека државата е технички подготвена за отворање на првиот кластер од пристапните преговори и очекува јасен, предвидлив и кредибилен пат напред – без нови одлагања и блокади.
Министерот подвлече дека членството во ЕУ е стратешка определба на државата, а процесот на проширување не смее да се третира само како техничко прашање, туку како прашање поврзано со економски раст, стабилност и заеднички европски вредности.
Муцунски порача дека Европската Унија мора да го задржи проширувањето како врвен политички приоритет, со јасна и предвидлива траекторија, предупредувајќи дека евентуално одложување на процесот би имало сериозни последици за кредибилитетот на политиката на проширување во регионот на Западен Балкан.