Во организација на Институтот за геостратешки истражувања и надворешна политика – ИГИНП, во четвртокот се оддржува меѓународната конференција на тема „Европската интеграција преку регионалната соработка – перспективите на европските макрорегионални стратегии“,во рамките на македонското претседавање со Централно-Европската Иницијатива (ЦЕИ), во соработка со „Институтот за надворешни работи и трговија“ на Унгарија и „Институтот за меѓународни односи“ од Република Чешка, со партнерска поддршка на Вишеградскиот Фонд, а во координација и со поддршка на Секретаријатот на ЦЕИ.

На Конференцијата,поздравно обраќање имаше Директорот на Инситутот Абдулкадар Мемеди, кој ја истакна важноста на настанот од аспект на македонското претседавање со ЦЕИ, како и од аспект на регионалното поврзување. Мемеди се осврна на потребата од вклученост на земјите во макрорегионалните стратегии како предуслов за успех, а го напомена и главниот надворешнополитички приоритет на Македонија, а тоа е зачленувањето на земјата во НАТО и Европската унија.

Свое воведно обраќање имаше заменик-министерот за надворешни работи Драгана Кипријановска која истакна дека со одржувањето на оваа меѓународна Конференција, се реафирмира стратешката определба на Македонија за континуирано и активно промовирање на политиката за развивање на добрососедски односи и афирмација на Македонија како полноправен чинител во креирањето на регионалната политика. Воедно, Кипријановска истакна дека ЦЕИ има клучна улога во премостување на разликите помеѓу макро-регионите, со цел да се постигне обединета Европа.

Во воведниот дел, свое обраќање  имаше ротирачкиот генерален секретар на Централно-Европската Иницијатива, Марго Клестил – Лофер, која напомена дека регионалната соработка буди голем интерес во последните години, особено макро-регионалните стратегии преку кои се развива политички дијалог и мултиратерална дипломатија, што овозможува развој на нови институционални структури, а Секретаријатот на ЦЕИ претставува клучниот актер во имплементацијата на макро-регионалните стратегии.

Во првиот панел се дискутираат и анализираат перспективите на европските макрорегионални стратегии, во рамките на европските интегративни процеси за земјите-кандидати во Европската унија. Претседавач со првиот панел е Роланд Арбтер, претставник на австриската федерална канцеларија. Свои обраќања во улога на панелисти имаат Андреа Маирате од Европската комисија, Курт Пушингер, координатор за дунавскиот регион, Мартон Шоберл, генерален директор на унгарскиот Институт за надворешни работи и трговија, како и Петр Кратошвил, директор на чешкиот Институт за меѓународни односи.

Вториот панел е посветен на анализа на специфични прашања поврзани со имплементацијата на европските макрорегионални стратегии и нивниот придонес за развој и јакнење на регионалната соработка. Претседавач е амбасадорот Јован Теговски, додека панелисти се г.  Јиржи Сикора, претставник на Вишеградскиот фонд, Љубомир Кекеновски, професор на Економскиот Факултет- Скопје, Лидија Топиќ, претставник на регионалниот Совет за соработка во Брисел и Анка Ионеску, претставник на ЕБРД во Република Македонија.

Заклучоците од оваа меѓународна конференција, даваат значаен придонес во градењето на регионалната соработка и европските макрорегионални стратегии. Истите ќе бидат нотирани на Министерскиот состанок на Министрите за надворешни работи на ЦЕИ, кој ќе се оддржи на 15-ти јуни 2015 во Охрид./крај/мф/бс