Европа
Во Рим голем протест против легализацијата на еднополовите заедници
Повеќе стотици илјади Италијанци се собраа на староримскиот стадион Циркус Максимус барајќи од владата да се откаже од законот со кој би се легализирале хомосексуалните партнерства и со кој би им биле овозможени и ограничени права за посвојување деца.
Италија е една од ретките држави во Европа којашто истополовите врски во ниту една форма ги нема во своето законодавство.
Оспоруваниот предлог закон беше претставен минатата седмица во парламентот и за него треба да се гласа во февруари, меѓутоа и самата италијанска влада е длабоко поделена околу ова прашање. Противниците на предлог законот изразуваат надеж дека ќе го спречат неговото усвојување, како што успеаја во неколку претходни наврати.
Од цела Италија во Рим во саботата пристигнуваа бројни возови и автобуси со луѓе кои се придружија на собирот на славниот хиподром од периодот на древниот Рим.
„Сакаме да биде повлечен целиот предлог закон, без бројните ‘ако’ и ‘доколку’“, изјави Симон Пилон, еден од организаторите на собирот. Тој особено ја критикува одредбата од законот која на хомосексуалните двојки би им овозможила усвојување на биолошките деца на нивните партнери. Критичарите, имено тврдат дека тоа би го поттикнало сурогат мајчинството, коешто во Италија е забрането. „Не можеме да дозволиме децата да плаќаат поради желбите или хировите на возрасните. Децата имаат потреба од мајка и од татко“, вели Пилон за Reuters.
Колку Италија е поделена, покажува и фактот дека пред една седмица повеќе илјади луѓе излегоа на улиците барајќи усвојување на законот за ткн „цивилно партнерство“ за хомосексуалните и хетеросексуалните двојки.
Организаторите на собирот во саботата претходно соопштија дека очекуваат околу половина милион луѓе на протестот, но засега не е познато за колкав број луѓе точно станува збор.
Агенцијата DPA наведува дека некои од организаторите изјавиле дека во Рим пристигнале повеќе од два милиона луѓе од целата земја. „Има многу повеќе отколку што очекувавме… Сакам да ве известам дека нé има повеќе од два милиона“, изјави Масимо Гандолфини, портпаролот на манифестацијата наречена Ден на семејството.
Италија е последната од големите држави во западна Европа која не нуди никакви права или признавање на истополовите двојки, па е често критикувана од Европскиот суд за човекови права.
Премиерот Мате Ренци го вети носењето на контроверзниот закон до крајот на 2015 година, меѓутоа наиде на остро спротиставување и во коалицијата.
„Целосно се согласувам со целите на овој собир“, изјави министерот за внатрешни работи Анџелино Алфано, водач на помалата партија во власта Нов десен центар.
Иако влијанието на Католичката црква во Италија со годините слабее, таа сé уште претставува значајна сила во тамошното општество. Италијанската бискупска конференција решително се изјасни против предлог законот, а пред една седмица папата Франциск објави силен потсетник на противењето на Црквата на еднополовите бракови, порачувајќи дека традиционалното семејство е „семејство кое Господ го сака“.
Според некои од последните истражувања на јавното мнение, 70 отсто од Италијанците сметаат дека истополовите двојки заслужуваат правна заштита, како што е првото на наследување, но само 24 отсто сметаат дека би требало да им се овозможи и правото да посвојуваат деца./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Ги убил двајцата внуци, па си пресудил самиот на себе: пензионер се забарикадирал во куќа во Шпанија
Трагедија се случи во мал шпански град кога пензионер ги уби своите двајца внуци на возраст од 10 и 13 години пред да се самоубие – два месеца откако сопруга и ќерката му загинаа во сообраќајна несреќа додека тој возел.
Полицијата ја опколила куќата на 72-годишниот маж откако тој синоќа се забарикадирал во имотот со момчињата.
Нивните три тела беа пронајдени околу 8.30 часот утринава во разни простории од куќата во Хуетор Тајар – град со околу 10.000 жители, во близина на градот Гранада во јужна Шпанија – кога насилно влегле вооружени полицајци.
Едното дете е убиено со огнено оружје, а другото се удавило.
Извори блиски до истрагата велат дека едно од децата имало прострелни рани, а другото се верува дека се удавило.
Истражителите на Цивилната гарда велат дека пензионерот се застрелал со истото огнено оружје што го користел за да го убие својот внук.
Неговата сопруга и ќерката, мајка на две деца, ја загубија борбата за живот кога беа исечени од остатоците од автомобилот што го управуваше 72-годишникот.
Европа
Се огласи болницата во Банска Бистрица: Ова се последните информации за состојбата на Роберт Фицо
Состојбата на словачкиот премиер Роберт Фицо, кој беше ранет во обид за атентат минатата недела, е стабилна, соопштија од болницата во Банска Бистрица.
„Клинички се подобрува, комуницира, воспалителните параметри полека се намалуваат. Премиерот останува под наша грижа“, соопштија од болницата во Банска Бистрица по денешната седница на советот.
Фицо беше тешко ранет минатата среда по состанокот на кабинетот кога се приближи до насобраните луѓе.
Тој со хеликоптер беше префрлен во болницата во Банска Бистрица, каде што итно беше опериран и оттогаш е таму.
Претходните денови се зборуваше за префрлање на премиерот во друга институција, но како што може да се заклучи од денешното соопштение на болницата, тој засега останува во Банска Бистрица.
Европа
Украина со дронови нападна руска рафинерија: „Има штета, престана да работи“
Руска нафтена рафинерија во Славјанск, во Краснодарската област, беше оштетена по напад со беспилотно летало кон крајот на минатата недела, објави денеска државната новинска агенција „Тасс“ цитирајќи претставник на компанијата за безбедност.
Шест беспилотни летала погодија област на нафтена рафинерија во Славјанск во јужниот дел на Русија Краснодар во раните утрински часови, според локалните власти.
Новинската агенција „Интерфакс“ објави дека рафинеријата престанала да работи по нападот.
„Причинета е штета. Ќе се утврдат нејзината големина и опсегот“, ја цитира „Тасс“ изјавата на безбедносниот претставник Едуард Труднев во понеделникот.
Рафинеријата во Славјанск е приватна постројка со капацитет од речиси 100.000 барели дневно. Произведува гориво за домашни потреби и за извоз.