Македонија
Дисперзирани студии имало, студенти не

На огласите за дисперзираните студии на УКИМ, воведени од ВМРО-ДПМНЕ, или никој не се јавувал или малкуте пријавени биле префрлани на матичните факултети, соопштија од Министерството за образование денес, по нападите од опозициската ВМРО-ДПМНЕ дека укинале благороден проект само затоа што го вовела претходната влада.
„Наспроти тврдењата на ВМРО-ДПМНЕ, бројките покажуваат дека изминативе години не се реализирале дисперзирани студии на УКИМ. Напротив, биле распишувани конкурси за упис од Владата, на кои или никој не се пријавувал или малкутемина средношколци кои се пријавувале не добивале шанса да студираат на дисперзираните студии туку заради неможноста да се формира група, биле префрлани на матичните факултети.
Така на пример, на Технолошко-металуршкиот факултет во Скопје во последните три учебни години, и покрај тоа што постоеле дисперзирани студии, немало пријавено кандидати. Иста е ситуацијата и на Земјоделскиот факултет од Скопје. На Правниот факултет „Јустинијан Први“ за учебната 2014/2015 година се пријавиле 17 кандидати за дисперзираните студии во Тетово, а за наредната година тројца кандидати, од кои еден се запишал. За учебната 2016/2017 година се пријавиле шест кандидати за дисперзираните студии во Тетово, но во ниту една од овие години не се одвивала настава на дисперзирани студии бидејќи бројот на пријавените не бил доволен за формирање група студенти, па студентите биле запишани на студии во Скопје.
На Економскиот факултет од Скопје за учебната 2014/2015 година ниеден студент не се пријавил на дисперзираните студии во Тетово, а 16 студенти се пријавиле на дисперзираните студии во Велес. За учебната 2015/2016 година шест студенти се запишале на дисперзираните студии во Тетово, а 13 се запишале на дисперзираните студии во Велес, додека за учебната 2016/2017 година 10 студенти се запишале на дисперзираните студии во Тетово, а девет студенти се запишале на дисперзираните студии во Велес. И на овој факултет во ниедна од овие студиски години не се одвивала настава на дисперзирани студии бидејќи бројот на пријавени не бил доволен за формирање група студенти, па студентите биле запишани на студии во Скопје.
На Машинскиот факултет од Скопје, за учебната 2014/2015 година еден студент се запишал на дисперзираните студии во Струга, а двајца студенти се запишале на дисперзираните студии во Кавадарци. За учебната 2015/2016 година ниеден студент не се запишал на дисперзираните студии во Струга, тројца се пријавиле на дисперзираните студии во Кавадарци, со тоа што едниот од нив имал некомплетна документација, а останатите двајца воопшто не дошле да ги поднесат документите за упис. За учебната 2016/2017 година ниеден студент не се запишал на дисперзираните студии во Струга и во Кавадарци. Со тоа ни на овој факултет немало настава на дисперзирани студии“, стои во објаснувањето на Министерството.
Според реакцијата, ова е потврда за лажната паника што ја шири ВМРО-ДПМНЕ, но и доказ за фиктивните проекти кои ги воведуваше претходната влада.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Уапсени се полицајци и полициски функционери кои биле на смена кобната вечер“: СДСМ ја поздрави акцијата на ОЈО ГОК за Кочани

„Ја поздравуваме вечерашната акција на Обвинителството за организиран криминал и корупција во која се лишени од слобода полицајци и полициски функционери кои биле на смена кобната вечер на 16 март во т.н. дискотека Пулс во Кочани“, соопшти СДСМ.
„Фактот што четири месеци ВМРО-ДПМНЕ се обидуваше да ја сокрие одговорноста на полицајците и полициските функционери, фактот што нивната вина беше негирана од страна на Панче Тошковски и Христијан Мицкоски укажува на тоа дека сите биле вмешани или на некој начин знаеле за нелегалното работење на Пулс и тоа го одобрувале.
Само поради обидите да се сокрие одговорноста од страна на Тошковски и Мицкоски на лицата кои тие ги поставија за полицајци, командири и началници би требало веднаш да си поднесат оставки.
Одговорност мора да има и за Александар Јанев, директорот на БЈБ. Тошковски и Јанев не смеат повеќе да ја попречуваат истрагата ниту да влијаат некој да не сноси одговорност.
Вистината за Кочани која цела недела ја објавуваше СДСМ е точна. Се покажа дека без силен притисок на јавноста, на дел од медиумите и на СДСМ нема да има правда за Кочани. Време е за одговорност, време е за оставки“, се додава во соопштението на СДСМ.
Македонија
Приведени уште 13 полициски службеници за пожарот во „Пулс“

Во тек е акција под раководство на обвинител од Специјализираното одделение за полициски службеници, соопштија од Обвинителство за гонење на организиран криминал и корупција.
Уште 13 полициски службеници и началници се приведени во рамки на истрагата за пожарот во дискотеката „Пулс“ во Кочани.
Од Обвинителството најавија дека соопштение ќе има во текот на утрешниот ден.
Македонија
МОН: Стручното образование е силна страна на македонскиот образовен систем, креира квалитетен и побаруван кадар на пазарот на трудот

„Во средните стручни училишта во Македонија успешно функционира концептот на дуално образование во чија реализација е вклучена и бизнис заедницата. Училиштата и компаниите заедно содаваат квалитетен кадар кој полесно може да се снајде на пазарот на трудот. Затоа, развојот и проширувањето на овој концепт ќе биде наш приоритет и во следниот период“.
Ова го истакна државниот секретар во Министерството за образование и наука, Елена Ивановска на панел дискусија „Достапност на квалификувана работна сила: предизвик и стратешки фактор за инвестициски одлуки и економски раст“, организирана во рамки на Првиот македонско – германско бизнис самит, со кој АХК германската стопанска комора во Македонија одбележува 25 години постоење.
Ивановска рече дека од самиот почеток на мандатот, новото раководство во МОН се заложи за унапредување на законската регулатива, бидејќи таа е основ за спроведување на образовните политики, новите мерки и активности со кои ќе се остварат целите од владината програма за градење на поквалитетен образовен систем.
„Во новиот Закон за стручно образование и обука системски се уреди концептот на дуално образование, се прецизираа обврските на сите учесници во реализацијата. На пример се дефинираше кој и како може да стане ментор на учениците, компаниите да им исплаќаат месечен надомест на практикантите, да им овозможат заштита и безбедност при работа и така натаму. Со Законот за средно образование пак, се предвиде поголема поддршка за талентираните ученици, се воведуваат кариерни советници што ќе ги насочуваат учениците и сето ова е во интерес на создавање на потребната квалификувана работна сила“, рече Ивановска.
Осврнувајќи се на регионалните центри за стручно образование и обука рече дека тоа се всушност средни стручни училишта кои се трансформираат во образовни установи со поголема вредност и повеќе функции, обврски и одговорност.
„Таму не само што се реализира средно стручно образование за ученици, туку идејата е да се реализира и образование и обука на повозрасни кои имаат потреба од доквалификација, преквалификација и слично, за да станат конкурентни на пазарот на трудот. Фреквентноста на луѓе ќе биде многу поголема. Центрите ќе прават и анализи на пазарот на трудот, ќе креираат програми за настава и обука и така натаму“, рече Ивановска, додавајќи дека во моментов се формирани 7 регионални центри, а до 2028 година ќе се формира осмиот и последен, што како обврска е предвидено во Реформската агенда.
Државниот секретар информираше дека во регионалните центри се вложуваат големи износи на средства за да има добри училници, опремени кабинети, работилници и соодветни сместувачки капацитети. Средствата во најголем дел ги обезбедува Европската унија, а Ивановска ја повика и бизнис заедицата да помогне во модернизацијата на инфраструктурата, затоа што, како што рече, училиштата се инкубатори на човечки капитал кој и нив им е потребен.
На панел дискусијата модерирана од Дејан Чуповски, раководител на програмата за дуално образование при АХК германската комора, се обратија и програмската директорка на Источниот комитет на германското стопанство, директорот на средно стручно училиште „Св. Наум Охридски“ во Охрид, Сашо Недески, раководителката на одделот за глобална техничка и комерцијална обука во компанијата Дрекслмаер, Барбара Гербер и управниот директор на компанијата Унија Груп, Бранислав Серафимоски.