Владејачката турска Партија на правдата и развојот (AKP) во вторникот ја објави кандидатурата на актуелниот премиер Реџеп Тајип Ердоган за претседател на државата, на првите непосредни претседателски избори, закажани за август, објавиле турските медиуми.

Доколку победи на тие избори, Ердоган, кој повеќе од една деценија е доминантна фигура на турската политичка сцена, би можел да остане на чело на државата уште најмалку пет години, пренесува AP.

Ердоган е на власт од 2003-та година, но внатрешните партиски прописи не му дозволуваат повторно да се кандидира за премиер. Веќе некое време во земјата се шпекулира дека Ердоган, кој го предводеше економскиот развој на Турција, но исто така предизика многу критики поради своето авторитарно владеење со земјата, има амбиции да биде претседател на државата.

Претседателската функција во Турција е главно симболична, но актуелниот премиер изјавил дека се залага за тоа, претседателот на државата да добие повеќе овластувања.

За времето на својот премиерски мандат, Ердоган сепак не успеа да собере доволно поддршка за уставни измени кои на претседателот би му дале многу поголеми овластувања, отколку оние што ги има во моментов.

Меѓутоа, Ердоган навел дека доколку биде избран на оваа функција, тој докрај би ги користел овластувањата кои досега воопшто не биле кроситени, како што е правото на свикување состанок на кабинетот. Во тој случај, Ердоган би имал еднаква моќ со онаа на премиерската функција, наведува AP.

Актуелниот турски претседател Абдула Ѓул, чиј мандат истекува на 28-ми август, изјави дека нема да се кандидира повторно за оваа функција. Првиот круг од претседателските избори, на кои Турците првпат директно ќе гласаат за шеф на државата, ќе биде одржан на 10-ти август, а вториот круг на 24-ти август. Досега претседателот на државата беше избиран од турскиот парламент./крај/мф/бс