Европа
Илјадници приврзаници на Pegida протестираа низ Европа
Илјадници приврзаници на граѓанското движење Pegidа (Родољубиви Европејци против исламизацијата на Западот), кое беше покренато пред повеќе од една година излегоа попладнето во саботата во Дрезден, во источна Германија, од каде што и започна движењето, како и во десетина градови ширум Европа во рамките на европскиот ден против имигрантите организиран под паролата „Крепоста (Тврдината) Европа“.
Луц Бахман, основач на движењето, не учествуваше на собирот поради болест, соопштија организаторите за AFP.
Полицијата во Дрезден, каде што Pegida собираше и по десетици илјади приврзаници, распореди повеќе од илјада свои припадници и неколку водени топови за да ја гарантира безбедноста очекувајќи 15.000 демонстранти. Според процените во саботата се собрале 8.000, според оналјн групата Durchgezaehl којашто истражува јавни собири, пренесува агенцијата DPA. Сепак, полицијата и организаторите сé уште не излегоа со своите процени за бројноста на приврзаниците на анти-доселеничката кауза на движењето во Дрезден.
Претходно неколку стотина луѓе во саботата рано попладнето одржаа поворка против Pegida во Дрезден, повикувајќи на толерантност во градот во кој инаку има малку странци, но стана симбол за противењето на доселениците особено од муслиманските земји. Германските медиуми, пак, кои се противници на Pegida објавија многу повисоки бројки од дрезденската полиција – 2.000 до 2.500, што сепак е многу помалку од 10-те илјади колку што најавуваа организаторите на левичарските движење и невладините организации.
Движењето Pegidа (Родољубиви Европејци против исламизацијата на Западот), на коешто, и покрај несогласувањето со таквите оцени на неговите водачи, му се става етикетата на крајно десничарско, кое настана во Германија во есента 2014 година, повика на 23-ти јануари на протести кои се одржуваат во саботата во 14 европски земји како револт од попустливоста на властите кон незапаметениот мигрантски прилив на европскиот континент, кој во минатата 2015 година прими над милион баратели на азил, главно од муслиманските земји.
„Независно од Европската унија и етаблираните елитистички кругови, ќе се развие мрежата на патриоти во Европа – Тврдината Европа“, изјави челничката на Pegida, Татјана Фестерлингм пред да го претстави концептот на движењето во Дрезден кој го опиша како „престолнина на германскиот отпор“.
Собирот во Дрезден го добележаа постојаните повици „Меркел мора да си замине“, обвинувајќи ја германската канцеларка Ангела Меркел за нејзината политика во бегалската криза дозволувајќи во земјата да влезат 1,1 милион доселеници
Серијата протести за поддршка на Pegida започна во австралиската престолнина Канбера каде пред парламентот се собраа 400 луѓе, кои не се согласуваат со политиката на толеранција на властите кон муслиманите да не се асимилираат во австралиското општество. Тие извикуваа пароли како „Сакаме сланина“ и „По ѓаволите, кој е тој Алах“.
Во Европа, според агенциските извештаи, најброен бил собирот на „Тврдината Европа“ во чешката престолнина Прага, каде се собрале повеќе од 1.500 приврзаници на Pegida, носејќи транспаренти со натписите „Не за имиграцијата – запрете ја Меркелизацијата“. Во „Прашката декларација“ на движењето Тврдина Европа се предупредува дека „повеќе од илјадагодишната западна култура наскоро би можела да биде загубена пред исламското освојување на Европа“.
Наспроти нив 400 лица изразуваа солидарност со бегалците, а повеќе стотици полицајци спречуваа да дојде до близок контакт меѓу двете групи кои се гаѓаа со петарди и шишиња.
Собири за поддршка на Pegida со различна масовност се одржаа во саботата и во Варшава, Талин, Братислава, Амстердам, Даблин, Бирмингем, Монпелје, Кале, Копенхаген….
Претходно во полската престолнина отпатува челничката на движењето Фестерлинг каде одржа говор пред неколку стотици приврзаници за отпорот во XVII век која „Полјаците и Литванците, Саксонците и Австријците застанаа едни крај други“ за да го спречат падот на Виена пред турската армија. „Ајде сите заедно да ја водиме борбата против исламизацијата“ на Европа, повика./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Грузија сака да донесе закон за „странски агенти“, oфицијален претставник на ЕУ: Неприфатливо
Висок функционер на Европската унија денеска ја предупреди грузиската влада дека предложениот закон за „странски агенти“ е неприфатлив и ќе претставува пречка во напорите на земјата да се приклучи кон ЕУ, доколку биде усвоен во сегашната форма.
Грузискиот парламент вчера го усвои законот во второто читање, за кој опозицијата вели дека е инспириран од Кремљ, додека полицијата употреби солзавец и шок-бомби за да ги растера толпата демонстранти.
Владата смета дека законот е неопходен за да се гарантира транспарентно странско финансирање на невладините организации.
Секоја вечер, речиси еден месец, се поголем број демонстранти излегуваат на улиците. Вчера десет илјади демонстранти го блокираа центарот на Тбилиси на најголемиот антивладин митинг организиран досега.
Герт Јан Купман, директор на Управата за проширување на Европската комисија, за новинарите во главниот град на Грузија изјави дека Брисел ја следи ситуацијата и е загрижен за тоа што се случува.
„Гледаме загрижувачки случувања кога станува збор за законодавството. Законот за транспарентност, кој беше усвоен во второ читање, е неприфатлив во сегашната форма и ќе создаде сериозни пречки на патот кон пристапување во ЕУ“, рече Купман.
„Но, има уште време. Во септември ќе излеземе со препораки дали да ги започнеме пристапните преговори со Грузија и да објавиме извештај во октомври и ноември, така што има уште време. Но, сега топката кај владата“, додаде тој.
Грузискиот парламент се очекува да го разгледа законот во третото читање за околу две недели.
Европа
Русија: Не ја гледаме поентата на мировната конференција во Швајцарија
Русија објави дека не ја гледа поентата на конференцијата за прекин на огнот во Украина што Швајцарија ја планира за средината на јуни и на која Москва не беше поканета. Швајцарската влада соопшти дека Русија „во овој момент“ не е меѓу десетиците поканети земји, додавајќи дека е отворена за нејзино учество, но дека Москва не е заинтересирана. Берн го најави собирот во јануари, велејќи дека го организирал на барање на украинскиот претседател Володимир Зеленски.
Портпаролот на Кремљ, Дмитриј Песков, нагласи дека Москва не ја смета за веродостојна иницијатива.
„Не разбираме каква пресвртница би била таа мировна конференција“, им рече тој на новинарите. „За каква конференција зборуваме, за каква сериозна конференција со сериозни очекувања дека ќе има некакви резултати, без учество на Русија?
„Тоа е целосно невозможно и јасно е дека тоа е некаква иницијатива која не е фокусирана на резултати“, заклучи тој.
Швајцарската влада соопшти дека „мировниот процес не е можен без Русија. Украина, од друга страна, ги доведува во прашање придобивките од руското учество на состанокот што ќе се одржи во близина на градот Луцерн.
„Знаеме дека нема смисла да ја имаме Русија на маса ако не можете да се осигурате дека таа ќе дејствува со добра волја“, рече шефот на украинската дипломатија Дмитро Кулеба минатата недела во интервју за магазинот „Форин полиси“.
Кулеба смета дека создавањето дополнителен притисок врз Русија на бојното поле и обединувањето на земјите „кои ги делат принципите“ ќе помогнат Русија да биде подготвена да учествува во дијалогот.
Европа
Макрон не ја исклучува можноста за испраќање војници во Украина доколку Русија „ја пробие линијата на фронтот“
Францускиот претседател Емануел Макрон во интервју за Економист изјави дека не ја исклучува можноста за испраќање војници во Украина доколку Русија „ја пробие линијата на фронтот“ и ако Киев тоа го побара од Париз, пренесува BFMTV.
„Доколку Русите ги пробија првите линии на фронтот и ако има украинско барање – што не е случај денес – би било легитимно да се постави тоа прашање“, рече Макрон.
Веќе во февруари, Макрон ја покрена можноста за испраќање западни трупи на украинска територија, потсетува БФМ.
„Како што кажав, не исклучувам ништо бидејќи има некој од другата страна кој не исклучува ништо. Без сомнение, бевме премногу сомнителни кога ги дефиниравме границите на нашата акција”, рече францускиот претседател.
Макрон рече дека „априори отфрлањето“ на можноста за испраќање војници би значело дека „не се научени лекциите од последните две години“, бидејќи во летото 2022 година биле против испраќање тенкови, ракети со долг дострел и авиони. и сега сето ова го испорачуваат во Украина.
„Имам јасна стратешка задача: Русија не смее да победи во Украина. Ако Русија победи во Украина, нема да има безбедност во Европа“, додаде тој.
„Кој може да тврди дека Русија ќе застане таму? Каква безбедност има за другите соседни земји, Молдавија, Романија, Полска, Литванија и толку многу други? И тогаш, каков кредибилитет има за Европејците кои би потрошиле милијарди, велејќи дека тоа е опстанокот на континентот и не би обезбедиле средства за запирање на Русија. Така да, не треба ништо да исклучуваме“, истакна Макрон.