Единиците на украинската армија повторно се повлекоа од новиот терминал на аеродромот во Донецк, што беше нивната главна позиција околу кој се водеа жестоки борби со рускојзаичните бунтовници, соопшти во четвртокот портпаролот на украинската воена операција на истокот од земјата, додека челникот на самопрогласената ткн Народна република во Донецк најави дека бунтовниците ќе ја „поместат“ предната линија на фронтот за да се отстранат гранатирањата и нападите врз градот.

„Поради нападот од сите страни изминатата ноќ одлучено е да го напуштиме новиот терминал“, објави портпаролот Владислав Селезнов на прес-конференцијата во Киев. Според него, борбите и натаму се водат околу аеродромот. Кажа, исто така, дека во последните 24 часа загинале десет украински војници, пренесува AFP.

Аеродромот Донец беше сцена на жестоки судири од април 2014 година кога со десант го заземаа специјалните сили на украинската армија. Рускојазичните бунтовници кои контролираат дела од авионот на 15-ти јануари покренаа офанзива за да ја преземат цел,осно контролата над последните позиции на украинската армија. Претходно соопштија дека оставиле коридор за повлекување на украинските војници од аеродромот, но дека властите во Киев, напротив, довеле свежи единици на боиштето.

Украинските сили во неделата успеале да отфрлат напад на бунтовниците благодарејќи на засилувањето во тенкови, пренесува AFP. Меѓутоа, подоцна се случија гранатирања врз станбени населби во Донецк, со десетици цивилни жртви.

„Аеродромот е и останува линија на фронтот. Не успеавме да ја задржиме контролата врз урнатините на новиот терминал. А момците во приземјето … пролеаја крв, ги дадоа и телото и душата. Пред два дена ја достигнаа својата граница“, напиша на својот профил на Facebook, Јуриј Бирјуков, советник на Петро Порошенко, пренесува Reuters. Андриј Билетски, командант на доброволечкиот баталјон „Азов“ потврди – „Го загубивме аеродромот“.

Во меѓувреме претседателот на самопрогласената Народна република Донецк, Александр Захарченко изјави дека бунтовниците имаат намера да ја преместат првата линија на фронтот за да се избегнат нападите врз градот кој е најголемото упориште на рускојзаичните бунтовници во источна Украина.

„Ќе ја поместиме првата линија на фронтот за да не можат да го гаѓаат Донецк“, изјави за РИА Новости во четвртокот Захарченко.

Претходно во четвртокот беше објавено дека во бомбардирање на градот Донецк, настрадала уште една цивилна цел – тролејбус, при што според последните информации животот го загубиле 15 луѓе, а десетици се ранети, и според градските власти сите се возрасни.

Украинскиот премиер изнесе Арсениј Јаценјук изнесе монструозно сценарио според кое проруските бунтовници самите го гаѓале тролејбусот. „Денеска руските терористи сторија ужасно злосторство против човечноста. Русија е договорна за тоа“, вели Јаценјук, пренесе Reuters.Во средата доцна ноќта во гранатирањето на станбена населба меѓу аеродромот и Донецк беше погоден автобус во кој загина најмалку едно лице.

Доцна ноќта кон четвртокот шефовите на дипломатиите на Украина, Русија, Германија и Франција во германската престолнина Берлин направија обид да ја намалат спиралата на жестоко насилство во источните украински региони. Германскиот министер Франк-Валтер Штајнмаер по средбата изјави дека е постигнат договор за воспоставување безбедносна зона меѓу украинската и проруските сили.

„Постигнавме договор околу демаркациската линија на раздвојување, во согласност со договорот од Минск, а од овој момент двете страни мора да ја повлечат тешката артилерија зад таа линија. Секако, целосниот прекин на огнот зависи од спроведувањето на овој договор“, изјави ноќта кон четвртокот шефот на германската дипломатија, Франк-Валтер Штајнмаер.

„Најважната одлука која беше донесена денеска, изразена во заедничката изјава одобрена како резултат од средбата, е моќната поддршка на задачата за итно отстранување на тешкото оружје од линијата на контактот, којашто е утврдена со Минските спогодби, особено од меморандумот од Минск од 19-ти септември“, изјави рускиот министер за надворешни работи Сергеј Лавров./крај/мф/сн

Извор: Макфакс