Уште едно момче од Босна и Херцеговина кое се борело на страната на радикалните сунитски исламистички групи во Сирија загинал на тамошното боиште, а според информациите на безбедносните служби на Федерацијата БиХ станува збор за 26-ти ваков случај на загинување на босански државјани, пишува во средата сараевскиот дневен весник Dnevni Avaz.

Семејството на Суад Шабиќ од местото Босанка Бојна во општината Велика Кладуша добила информација дека тој пред три дена загинал во Сирија, а веста ја пренело момче од Сански Мост кое заедно со Шабиќ заминало на сириското боиште. Според сознанијата на босанскохерцеговските безбедносни служби, двете момчиња во Сирија отпатувале кон крајот на 2013 година, а семејствата наводно ништо не знаеле за нивните намери.

Таткото на Суад, Рифет Шабиќ претходно потврдил дека неговиот син дури отпосле му се јавил од Сирија велејќи дека таму се наоѓа во еден воен камп на обука. Рифет тогаш укажал и на поврзаност на целиот случај со Билал Босниќ, неформалниот челник на радикалната салафитска вехабиска заедница во БиХ кој во септември 2014 година беше уапсен поради поттикнување на тероризам. Против ткн имам Босниќ е подигнато и обвинение и во затвор го очекува почнувањето на судскиот процес.

Повикувајќи се на извори од Државната агенција за истраги и заштита на БиХ (SIPA), дневникот Dnevni Avaz пишува дека службата и натаму оперира со бројка од 150 државјани на БиХ кои заминале да се борат на страната на исламистичките терористички организации во Сирија. Собраните оперативни сознанија, исто така, говорат и за 26 загинати босански државјани на сириското боиште.

Во БиХ во 2014 година стапија на сила измените на кривичниот законик според кој придружувањето на паравоени единици и регрутирањето и учеството во воени судири во странство станува кривично дело, па наводно затоа и бил намален бројот на заминувањето на сириското боиште. „Од стапување на сила на овој закон евидентирано е заминување на околу 30 лица од различен пол и возраст и доби на странските боишта како и враќањето од боиштата на две лица“, навеле од SIPA со појаснување дека тие две лица биле приведени во рамки на акцијата во која е уапсени и Билал Босниќ./крај/мф/сн

Извор: Макфакс