Регион
Германски пратеник смета дека Србија ќе стане дел од ЕУ само ако го признае Косово
Германскиот пратеник од редовите на социјалдемократите и член на надворешнополитичката комисија на Бундестагот (парламентот), Дитмар Нитан изјави дека патот на Србија до Европската унија (ЕУ), сепак, оди преку Косово, и оти барањето од Брисел за Белград да го признае Косово е само прашање на време.
Во интервју за Deutsche Welle, Нитан порачува дека Србија би можела да биде подготвена за членство во ЕУ за најмалку пет години, а кога пристапните преговори ќе го достигнат крајот, Белград ќе биде ставен пред неминовноста дека членството во Унијата е можно само преку признавањето на Косово.
„Да, тоа барање мора да дојде, но дури на крајот“, изјави Нитан, потенцирајќи дека и покрај одредени слухови во Унијата и Германија, кои сакаат целосно признавање по итна постапка, сепак, тоа не е вистинскиот пат.
„Нормализацијата и приближувањето до модус вивенди не може и не смее да биде пребрзо. Треба да се оди чекор по чекор, и домашните задачи да бидат извршувани и од двете страни. Кога пристапните преговори ќе го достигнат својот крај, од Србија ќе се побара тој чекор, кој и да владее за пет или шест години во Белград, ќе биде ставен пред неминовноста дека членството во ЕУ е можно само преку признавањето на Косово“, потенцира германскиот пратеник.
На прашањето дали земја кандидат за членство во Унијата, би била казнета преку кочење на преговорите, доколку не ја спроведува надворешната политика на Брисел во однос на Русија, Нитан одговора дека тоа би било „арогантна политика кон една независна држава како Србија“.
„Можеби е добро тоа што Србија има добри односи со Русија. Би можело да се размислува и од спротивната перспектива, односно каде Србија може да помогне да се отворат канали на комуниција меѓу ЕУ и Русија. Посебниот однос меѓу Белград и Москва може да биде и европска предност“, рекол Нитан./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
(Видео) Избрана е новата Влада на Србија
Собранието на Србија со 152 гласа ја изгласа новата Влада на премиерот Милош Вучевиќ. Два дена траеше расправата за составот на Владата и нејзиниот план за работа, при што опозицијата го оспори кредибилитетот на Вучевиќ, посочувајќи дека, како и досега, за секоја одлука ќе биде прашан претседателот на државата Александар Вучиќ.
Новата Влада на Србија брои 31 член, од кои една третина се нови имиња во споредба со претходната Влада на чело со Ана Брнабиќ.
Премиерот Вучевиќ претходно изјави дека длабоко верува во историскиот договор меѓу Србите и Бошњаците и рече дека сака добри односи и со Хрватите. Истовремено, тој рече дека нема да ги гради овие односи на штета на сопствените интереси и дека Србија нема да се откаже од традиционалните пријатели.
Посебно внимание предизвикаа двајцата министри кои се под санкции на САД: Александар Вулин ќе биде вицепремиер, а Ненад Поповиќ ќе биде министер без ресор.
Регион
Договорен текстoт на резолуцијата за Сребреница
Предлогот за резолуција за комеморација на геноцид врз Бошњаците од Сребреница, извршен во јули 1995 година, е договорен, а за него треба да се расправа на седницата на Генералното собрание на Обединетите нации, потврди амбасадорот на БиХ во ОН, Златко Лагумџија.
Лагумџија на социјалната мрежа „Икс“ објави дека процесот на усогласување на резолуцијата, чии формални предлагачи се Германија и Руанда, е завршен и испратен до претседателот на Генералното собрание на ОН, Денис Френсис, па нејзиниот текст ќе биде претставен до земјите членки. на светската организација, од која се очекува поддршка.
Резолуцијата повикува да се воспостави 11 јули како меѓународен ден на сеќавање на жртвите на геноцидот во Сребреница, уште еднаш се осудуваат сите дејствија со кои се величат сторителите на воени злосторства, злосторства против човештвото и геноцид утврдени со пресудите на меѓународните судови. Ја нагласува важноста од завршување на потрагата по останките на преостанатите жртви кои досега не се пронајдени и повикува на продолжување на гонењето на сторителите на геноцидот кои се уште се на слобода.
Резолуцијата има намера да ги повика сите држави целосно да ги почитуваат своите обврски од Конвенцијата за спречување и казнување на злосторството геноцид, да го почитуваат меѓународното обичајно право за спречување и казнување на геноцид и да ги почитуваат релевантните одлуки на Меѓународниот суд на Правдата (МСП).
Од генералниот секретар на ОН се бара да воспостави информативна програма наречена „Геноцид во Сребреница и Обединетите нации“, која треба да се спроведе пред следната година, кога се одбележува 30-годишнината од тоа злосторство.
Сите земји-членки на ОН, како и невладините организации и граѓанското општество, предлагачи на резолуцијата истовремено повикуваат на соодветни активности за комеморација и чест на жртвите на геноцидот во Сребреница во 1995 година.
Македонија е коспонзор на оваа резолуција.
Српскиот претседател Александар Вучиќ и лидерот на босанските Срби Милорад Додик инсистираат дека оваа резолуција е обид да се наметне колективна вина врз српскиот народ.
Регион
Tлото на Балканот се тресе: По Хрватска, земјотреси и во Албанија и Грција
Два земјотреси, во растојание од една минута – во 19.19 и 19.20 часот – вечерва се регистрирани на територијата на Албанија.
Земјотресите се со интензитет од 2,1 степен според Рихеровата скала.
Епицентарот на првиот земјотрес бил на седум километри од Елбасан, додека вториот на 62 километри од Тирана.
Според информациите на ЕМСЦ, неколку минути претходно, земјотрес од 2,5 степени имало и во јужниот дел од Грција, а уште два од 2 и 2,3 степени се регистрирани предмалку на Крит.
Претходно денес, Хрватска ја погоди силен земјотрес од 4,7 степени, а беше почувствуван и во Босна и Херцеговина. По овој потрес, следеа неколку помали.