Скопје
Општина Илинден градежен рај или запуштена населба?
Во Општина Илинден, во четрток беше пуштен во употреба пат, а беа поставеи и камен-темелници на фирми, по повод денот на општината 2-ри Август – Илинден, но од друга страна, пак, опозициската СДСМ обвини дека во населеното место нема канализација, септичките јами се потенцијална зараза, училиштето е со азбестен покрив…
Во последните неколку години, општината како да доживеа невиден подем, беа определени повеќе парцели за градење индивидуални куќи, планирани со придружни објекти, како трговски центри, градинки, училишта, и друго, а беше отворена и индустриска зона, но сепак, се чини дека основните прашања, како постоење амбуланта, соодветна инфраструктура и друго, да не се решени.Во четврток, беше пуштен во употреба комплетно реновираниот локален пат Илинден – Марино од улицата „8” и дел од улицата „500”, во вкупна должина од 2.100 метри. Од општината информираа дека покрај новиот асфалт на оваа делница од патот изведена е атмосферска канализација за прифаќање и одведување на атмосферските води, ископани се нови канали и поставени цевкасти пропусти, а поставена е и хоризонтална и вертикална сообраќајна сигнализација.Вкупната вредност на овој проект е 22 милиони денари од кои 14,5 милиони денари се од Агенцијата за финансиска поддршка во земјоделството и руралниот развој, а 7,5 милиони денари се средства од буџетот на Општина Илинден.Во рамките на реализацијата на овој проект извршена е и санација на мостот што ја поврзува улица „8” со автопатот Скопје-Куманово и локалните економски зони.На пуштањето во употреба покрај градоначалникот на Општина Илинден, Жика Стојановски, присуствуваше и претседателот на ВМРО-ДПМНЕ Никола Груевски, кој ја искористи можноста за средби со граѓаните.Сепак, од опозициската СДСМ велат дека Никола Груевски прво што треба да им одговори на граѓаните на Општина Илинден е каде е бомбастично најавуваната Пречистителна станица, на којашто од 2.500 куќи во селото, приклучени се само 90.Централното подрачје во општина Илинден се уште нема канализација, а септичките јами се вистинска темпирана “бомба“ за можни зарази, додаваат од партијата.Во рамките на одбележувањето патрониот празник „Илинден 2-ри Август“ во Општина Илинден се поставија четири нови камен темелници, четири нови инвестиции во вредност од 17 милиони евра, кои, според инвеститорите, ќе овозможат отворање на нови 230 слободни работни места. Во локалната економска зона „Стопански компекс Илинден“ почнаа да се градат два нови стопански објекта. Компанијата „Г.Р.А.Д. Екологија“ како странска директна инвестиција од Германија почна со изградба на објект – Постројка за производство на дизел гориво добиено преку каталитичка деполимеризација, односно трансформација на отпадот. Според најавите на инвеститорот вкупната инвестиција ќе изнесува 12 милиони евра, со овозможување на 40 нови вработувања.За време на поставувањето на камен темелникот градоначалникот на Општина Илинден, Жика Стојановски рече дека во Општина Илинден во локалните економски зони има 181 инвестиција, од кои 32 се странски директни инвестиции.Во истата локална економска зона е поставен камен темелник на транспортно-логистички центар со шпедиција и администрација на домашната компанија „ЈЦС бард логистик“. Вкупната инвестиција, според инвеститорот, изнесува 2 милиони евра со што ќе се овозможи отворање на 150 нови слободни работни места.Во локалната економска зона Марино-Кадино компанијата „Два брата градители“ почна со изградба на објект за пакување на плочки со административно деловен и изложбен простор. Вкупна инвестиција, како што велат во оваа компанија, ќе изнесува 2 милиони евра, што ќе овозможи 20 нови вработувања.Во оваа локална економска зона е поставен и камен темелник на административно деловен и магацински простор на домашната компанија „Велмар“. Вкупна инвестиција, според најавите на инвеститорот, ќе изнесува 1 милиони евра со што ќе се овозможи отворање на 20 нови слободни работни места, информираат од општината.Но, од опозициската СДСМ прашуваат зошто на Груевски му е поважен раскош и луксуз за Скопје 2014 тежок над 27 милиони евра само за оваа година, а во населба Илинден во 21-от век се уште нема амбуланта?„Зошто за Груевски е поважно 27 милиони евра да се употребат за камен, за фасади, наместо да се реновираат руинираните училишта во општината и да изградат нови, за децата да не учат во две смени?! Покривот во основното училиште во Илинден е со азбест! Поради сите овие состојби луѓето кои живеат во Илинден се жалат на масовни иселувања од општината“, додаваат од СДСМ./крај/мф/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Муцунски: Аеродром го заслужува најдоброто, започнува реализацијата на голем капитален проект
Градоначалникот на Општина Аеродром, заедно со претседателот на советот, Дејан Митески и директорката на основното училиште „Блаже Конески“ утрово на работен состанок ја утврдија динамиката по која до крајот на оваа школска година треба да започне реконструкцијата и доградбата на основното училиште „Блаже Конески“.
„Станува збор за важен инфраструктурен проект, онаков каков што заслужуваат граѓаните на Аеродром. По неговото финализирање, Аеродром ќе добие модерно и современо училиште, направено согласно сите европски стандарди, училиште кое ќе биде пример за квалитетна градба, одржливост и енергетска ефикасност“, истакна градоначалникот Муцунски во својата објавата на Фејсбук.
Тој додаде дека најважно од се е што реконструкцијата и доградбата нема да го наруши нормалното функционирање на училишните активности, а нивната организација ќе биде направена во консултација и согласно барањата на родителите, со кои утрово Муцунски одржа состанок.
Скопје
Герасимовски: Со видео надзор, општината ќе ја зголеми безбедноста на граѓаните и ќе ги заштити јавните добра
Советот на Општина Центар на 35. Седница на советот го прифати предлогот на градоначалникот Горан Герасимовски во општина Центар да се постави видео надзор.
Станува збор за видео надзор поради обезбедување заштита на имотoт и имотните права на општината односно Заштита на урбаната опрема (автобуски постојки, опрема во функција на туристички и културни и спортски настани, самостоечки рекламни паноа, детски игралишта, фонтани, чешми, клупи, корпи за отпадоци и други согласно законите), Заштита на инфраструктурните објекти (улици, плоштади и други инфраструктурни објекти во надлежност на Општината), Заштита на сообраќајни знаци и семафори и друга вертикална и хоризонтална сигнализација, Заштита на улична јавна осветлување, броење и евиденција на возила за статистички мерења.
Герасимовски во образложението за дополнувањето на дневниот ред истакна дека одлуката е преземена и модифицирана од други општини во кои веќе неколку години има поставен видео надзор и каде по поставувањето има намалување на штетите во општината.
„Се обидовме да ја заштитиме урбаната опрема особено детските игралишта но по сите напори не успеваме да го направиме тоа. Тие не ни траат ниту два месеци, се кршат детските реквизити, обрачите на спортските игралишта, се крши се. Затоа овие снимки може да служат како доказ за нечие дивеење. Но Министерството за внатрешни работи или Јавното обвинителство, исто така ќе може да ги користат при евентуално сторено кривично дело, нарушување на јавен ред и мир, или кршење на друга урбана опрема. Верувам дека снимките ќе ја зголемат и безбедноста во општината. Суштината е снимката да се користи како доказ за евентуална судска кривична или прекршочна постапка со цел да имаме намалување на девијантните појави во општината“, рече Герасимовски на седницата.
Скопје
Градоначалникот Георгиевски на увид во реконструкцијата на игралиштето за мал фудбал во Текија, општина Илинден
Увид во работните активности за реконструкција на игралиштето за мал фудбал во рамки на подрачното општинското основно училиште во населено место Текија направи градоначалникот на општина Илинден, Александар Георгиевски.
Како што истакна градоначалникот Георгиевски и на ова фудбалско игралиште целосно ќе биде обновен асфалтниот слој, проширување на теренот, ќе биде поставено лед осветлување, обновување на заштитната ограда, а ќе бидат поставени нови голови, клупи, корпи за отпадоци, просторот ќе биде партерно уреден. Со обновувањето на игралиштето ќе се создадат услови за реализација на часовите по физичко образование како и комплетно реконструиран, убаво уреден простор каде младите во спортски дух ќе го поминуваат слободното време, соопшти општина Илинден.
Покрај реконструкцијата на игралиштето за фудбал ќе се обнови и детското игралиште во рамки на училиштето, односно оштетените реквизити ќе бидат заменети со нови.
Со цел уредување на секое населено место како и создавање квалитетни и безбедни услови за жителите, општина Илинден продолжува со реконструкција на постоечките и изградба на нови спортски терени и во останатите населени места, се наведува во соопштението.