Државниот јавен обвинител, Љубомир Јовески, ја осуди постапката на четворицата обвинители што денеска јавно реагираа со соопштение за случајот со 4-годишниот Алмир Алиу. Според него, таквото обраќање е непрофесионално и се прекршил етичкиот кодекс на јавните обвинители во Република Македонија.

– Нивната постапка става сериозно сомневање врз независноста, непристрасноста, лојалноста и достоинството на јавниот обвинител бидејќи нивниот настап е предизвикан од други цели што не се поврзани со извршување на јавнообвинителската функција. Нема да допуштам влијание од кого и да доаѓа, а кое ги попречува напорите за средување на состојбите во јавното обвинителство во насока на професионално, стручно, непристрасно, совесно и законито извршување на јавнообвинителската функција – потенцира јавниот обвинител Јовески во соопштение до јавноста.

Јовески вели дека за нивната постапка ќе се расправа на колегиум на ЈОРМ и ќе побара нивното однесување да го преиспита Етичкиот совет на јавните обвинители.

– Со соопштението од јавните обвинители директно е нарушена функцијата јавен обвинител и се настојува да се влијае во одлуките по предметот бидејќи тие конкретно не постапуваат по тој предмет и не можат во јавност да изнесуваат ставови што не добиле верификација на колегиум – додава Јовески.

Џелал Бајрами, Ферат Елези, Башким Бесими и Исмаил Дардишта се четворицата обвинители што денеска испратија писмо до јавноста, со кое реагираат дека се против одлуката на кумановското обвинителство и кумановскиот суд на обвинетиот Бобан Илиќ да му се суди за тешко дело против безбедноста на луѓето и имотот во сообраќајот наместо за убиство на малиот Алмир. Нивната реакција велат дека следува бидејќи со преквалификацијата имало повреда на основните начела на Законот за јавното обвинителство.