Австралискиот пратеник Лук Симпкинс, претседател на Комисијата за соработка меѓу Австралија и Македонија, во понеделникот во Парламентот на Австралија реагираше остро по најавата на шефицата на австралиската дипломатија, Џулија Бишоп дека Австралија нема да го смени начинот на именување на Република Македонија.

Бишоп пред десетина дена негативно одговори на писмо упатено од претставници на македонската заедница во Австралија, кои побараа Австралија конечно да престане да ја употребува времената референца во комуникацијата со Република Македонија. Писмото на Бишоп предизвика гнев во македонската заедница, кој го изрази пратеникот Симпкинс, влијателен член на владејачката Либерална партија кој застапува изборна единица во градот Перт во која има значителна македонска заедница, пренесува МИА.

„Во секој случај кога зборуваме за прашањето за „спорот за името“, Австралијците со македонско потекло кои ги има околу 100 илјади, се чувствуваат навредени од тоа што продолжуваме да го употребуваме изразот “поранешна југословенска Република Македонија“. Југославија престана да постои пред 20 години, и Австралија треба да престане да биде заглавена во минатото. Зошто не го правиме тоа? Јасно е дека двете наши партии се плашат дека ова прашање ќе ја обедини австралиската грчка заедница во гласачки блок против партијата која ќе се реши да го признае името на Република Македонија. Трагично е што им дозволуваме буквално на една дузина грчки националисти да имаат толку големо влијание и да ја контролираат надворешната политика на нашата држава”, изјавил Симпкинс во своето обраќање пред Парламентот.

Повод за ова обраќање било писмото кое министерката Бишоп го упати до Крис Ангелков, потпретседател на здружението на македонската заедница во Западна Австралија. Во писмото на министерката Бишоп се вели дека Австралија ќе продолжи да ја употребува референцата договорена со Времената спогодба.

„Став на Владата останува да продолжиме да ја користиме номенклатурата на Обединетите нации како времена мерка, додека прашањето не биде разрешено меѓу Скопје и Атина, под мандатот на Обединетите нации, Европската унија, или некоја регионална иницијатива. Свесни сме дека остануваат големи предизвици за да се изнајде заемно прифатливо решение, но јас сум охрабрена од обновениот интерес кај лидерите на Европската Унија, за потребата ЕУ, заедно со ОН, да работат посилно за да се изнајде решение. Владата е свесна дека ова прашање останува тешко за австралиско­македонската заедница, како и за другите заедници во Австралија. Разбирам дека вие и понатаму веројатно ќе продолжите да не се согласувате со ставот на Владата околу ова прашање“, му напишала шефицата на австралиската дипломатија на Ангелков, од македонската заедница од Западна Австралија.

Во писмото на Бишоп се додава дека австралиската Влада ќе продолжи да го следи прашањето за спорот за името, во рамките на регионалните и меѓународните случувања. Таа додава дека австралиската Влада смета дека настаните во 2014 година во источна Европа, вклучително во Украина и на Балканот, покажуваат дека оставањето на неразрешени прашања во регионот претставува ризик за европската и меѓународната безбедност./крај/мф/бс