Разбојник кој во септември се обиде да ограби менувачница со автоматска пушка се спогодил со Основното јавно обвинителство – Велес да биде осуден на 15 години затвор без судски процес.

„Надлежниот јавен обвинител од Основното јавно обвинителство Велес постигна спогодба со обвинетиот Е.И. за кривичното дело – Разбојништво од член 237 ст.4 во врска ст.1 вв член 19 ст.1 од Кривичниот законик да му се изрече казна затвор во траење од 10 години и шест месеци, за кривичното дело – Предизвикување на општа опасност од член 288 ст.3 вв ст.1 од Кривичниот законик да му се изрече казна затвор во траење од 3 години и за кривичното дело – Недозволено изработување, држење и тргување со оружје и распрскувачки материи од член 396 ст.2 вв ст.1 од Кривичниот законик да му се изрече казна затвор во траење од 9 години и шест месеци, односно како единствена казна да му се изрече казна затвор во траење од 15 години“, соопштуваат од Обвинителството.Обидот за кражба се случи на 7-ми септември оваа година во Трговскиот центар во Велес, кога крадецот со закана со автоматска пушка се обидел да ограби менувачница.Обвинетиот маскиран со капа „фантомка“ влегол во менувачницата и пушката ја вперил кон оштетениот, заканувајќи му се по живот доколку не му ги даде сите пари. Вработениот при меѓусебна турканица во која биле испукани два куршума, успеал да го истурка обвинетиот надвор од менувачницата и започнал да бара помош, по што обвинетиот испукал уште два куршума.Обвинетиот успеал да се истргне од оштетениот, но набргу бил совладан од случајни минувачи и предаден на полицијата.На денешното рочиште во Основниот суд во Велес е донесена пресуда со која се прифати Предлог-спогодбата и притворот на обвинетиот ќе продолжи до започнување со издржување на казната затвор./крај/мф/