Македонија
(Видео) Заев: Груевски, Македонија расчисти со тебе
Премиерот Зоран Заев, по целодневната дискусија на седницата за интерпелација на Владата, од собраниската говорница ја повтори програмата на владејачката гарнитура, а се осврна на тоа што затекле сегашните функционери кога влегле да раководат со институциите. Според Заев, неточни и неосновани се укажувањата од опозицијата.
„Груевски, Македонија расчисти со тебе. Затекнавме општа катастрофална состојба, ограбена држава. Наследивме тотален колапс, блокирани институции. Се соочуваме со коруптивни договори, кои не можат да бидат прекинати поради тоа што ќе му нанесат штета на буџетот. За да се создадат услови за темелна промена, неопходна е вклученост на сите политички фактори. Системот мора да се регенерира во самите институции. Тоа мора сами да го направиме. Низ тешките премрежиња се создаде парламентарно мнозинство кое вети дека ќе донесе реформи. Без исклучок, чекориме кон тоа да ги оствариме стратешките интереси на граѓаните и државата, тоа се ЕУ и НАТО. Оваа можност беше прифатена од опозицијата“, рече Заев.
Тој додаде дека не му било лесно ниту на новиот лидер на ВМРО-ДПМНЕ, Христијан Мицкоски.
„Оваа постапка за изгласување доверба на Владата ја прифаќам како едно резиме. Да ги видам вашите аргументи, нешто да научам. Да бидам искрен, очекував повеќе. Велите планот 3-6-9 е во колапс, но немате аргумент. Со гласање на реформските закони, ќе имаме 100 проценти исполнување на договорот. Нема подобар доказ за исполнување на планот од тоа што го кажуваат ЕУ и НАТО, односно дека Македонија може да очекува одлука за почнување преговори. Постапката за носење на реформските закони требаше да започне од денес, ама опозицијата се реши за интерпелација“, тврди Заев.
Премиерот рече дека во идниот период ќе се намалува бројката на невработени и ќе има повеќе странски инвестиции.
„Оваа година ќе биде најважната за судските реформи. Јас сум среќен што градиме политички консензус за ваква реформа. Укинато е и владиното рекламирање, по 7-8 милиони евра се трошеле во изминатите години. Транспарентни сме, секоја недела имаме прес-конференции и објавуваме сè што е во интерес на граѓаните. Порано граѓаните бараа, власта криеше. Сега не е така. Наша цел е владеењето на правото, интензивирање на економскиот развој“, додава Заев.
Заев ги кажуваше и сумите што ги трошеле тој и функционерите на власт во споредба со ексфункционерите на ВМРО-ДПМНЕ. Тој вели дека разликата во сумата ќе заврши во продуктивни цели. Според премиерот Заев, се отвораат нови работни места и се креираат мерки за компаниите да отвораат нови работни места.
„По ова цунами, ја потрошивме зимата на планови и проекти. Пролетта ќе биде за остварување. Со контрибуцијата на опозицијата во парламентот, ќе биде поголема мотивацијата. Работиме за унапредување на патната инфраструктура. Кинеските провизии некој ги здипли во својот џеб, а домашните компании работат за 57 проценти помала сума од кинеските компании“, вели Заев.
Според него, парите се враќаат кај граѓаните со сите направени ревизии, мерки, субвенции добиените грантови.
„Можам да набројувам до утре наутро, сите мерки што ќе дадат напредок на државата. Кратиме од непродуктивните трошоци за да ја зголемиме социјалната помош, која во јануари в година ќе ја подигнеме на 11.500 денари“, рече Заев
Тој ги повика сите граѓани да го поддржат концептот на работа на СДСМ, а во последните секунди од собраниската говорница Заев го повика претседателот Ѓорге Иванов да го потпише законот за јазиците.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Силјановска: Како никој не се сети да им каже во ЕУ дека самите во член 4 гарантираат немешање во внатрешните работи и почитување на уставните структури
Како може некому да ветите дека ќе го смените Уставот, кога Уставот може да го сменат само пратениците во Уставот. Како знаете, дека вие можете однапред да ветите нешто што не е ваша надлежност?, му порача кандидатката за претседателка од ВМРО-ДПМНЕ, Гордана Силјановска-Давкова на нејзиниот опонент Стево Пендаровски во телевизиско соочување вечерва.
„Деновиве Макрон даде изјава дека ЕУ не е само територија, туку е концепција на човештвото и правото. Е, од тоа тргнувам и јас кога размилувам за ЕУ. За нејзините темелни вредности и принципи без кои таа не е политине заедница туку е само машинерија. Значи таа не е догма. Што ќе направам јас? Најпрво ќе направам регионални чекори. Штом ќе завршат изборите јас сакам да разговарам со моите соседи и заради регионалната политика и заради очекуваната поддршка од нив. Сакам да објаснам дека и кога има една преговарачка рамка не е логична заканата со вето. И дека може, дури и кога преговарачката рамка е ваква, низ интерпретација поинаква да се примени. Од типот, ако вие речете дека нема да употребувате вето за идентитески прашања, за историските дилеми и слично, протоколите, туку за Копенхагенските критериуми, јас ќе бидам сосема согласна. Значи, мислам дека е време кога ќе се смени власта, да чуе што мислиме и ние. Оти тоа е дијалогот што е нужен за добрососедски односи. Ако некој не го кажувал и ова досега, веројатно и тогаш било се во нивни раце“, рече Силјановска-Давкова.
Понатаму, како што додаде, како никој не се сетил да им каже на оние од Советот и од Европската комисија и сите останати со тоа се рушат темелните вредности на ЕУ? Бидејќи ЕУ гарантира во членот 4 почитување на уставните и политичките структури, немешање во внатрешните работи, почитување на дигнитет и интегритет, различности, неставање на билатерални спорови во рамката. Ако тоа не го кажете, вие ќе останете на прагматичните решенија.
Доаде и дека ниту еден од темелите на кои почивала програмата на Пендаровски во 2019 година не останале. Сите се урнале и ништо не е остварено.
Македонија
СДСМ за Димитриевски: Ароганција е кога човек-партија одработува против своите довчерашни сопартијци
Ароганција е кога човек-партија одработува против своите довчерашни сопартијци и во тоа нема ништо социјалдемократски ниту вредносно туку единствено и само личен интерес, реагира СДСМ по обвинувањата кои ги упати Максим Димитриевски од ЗНАМ, дека дозволиле отварање на бугарски клубови во Македонија и нивната ароганција е ненадминлива.
„За тоа кој ги отвораше клубовите со имиња како Ванчо Михајлов адресата е Белиот дворец на ДПМНЕ. Многу позната адреса каде ЗНАМ ги договара идните чекори за соработка заедно со поддршката на Гордана Силјановска Давкова.
Освен сликите на Ванчо Михајлов по штабовите на ДПМНЕ доволно говорат сликите на Мицкоски со основачите на тие клубови по манастирите низ државава за кои не слушнавме ниту збор од ЗНАМ.
Дали е тоа поради враќање на стари долгови за локалните избори 2021 година во Куманово или нови долгови јавноста ќе види многу скоро“, се вели во реакцијата на СДСМ.
Македонија
Утревечер и во петок нестабилно време со пороен дожд и грмежи
Времето утре ќе биде променливо облачно.
Од пладневните часови на повеќе места ќе биде нестабилно со пороен дожд и грмежи, локално во форма на краткотрајно невреме со засилен ветер и услови за изолирана појава на град. Услови за пороен дожд ќе има во текот на ноќта. Минималната температура ќе биде во интервал од 6 до 12, а максималната ќе достигне од 18 до 25 степени.
Во Скопје променливо облачно. Од пладневните часови во делови од котлината ќе биде нестабилно со пороен дожд, грмежи, засилен ветер и услови за изолирана појава на краткотрајно невреме. Минималната температура ќе се спушти до 12, а максималната ќе достигне до 23 степени, јавува УХМР.
Во наредните денови, следува период на променливо облачно време со повремени локални врнежи од дожд. Утре, во ноќта кон петок и во петок на повеќе места ќе има развој на нестабилна облачност проследена со пороен дожд и грмежи, локално во форма на краткотрајно невреме со засилен ветер и услови за изолирана појава на град.
Дневната температура од утре до сабота ќе биде во постепено опаѓање, а во недела ќе се покачи за 2 до 4 степени..