Во ноќниот клуб „Станица 26“, утревечер, со почеток во 21 часот, концерт ќе одржи македонската група „Темпера“ . Овој скопски бенд е познат по својата енергична и урбана музика и музичари кои зад себе имаат сериозен професионален багаж, како Мите Димовски на тапани, Ѓоле Максимовски на бас, Драган Гиновски на гитара и вокалистката со разорен глас, Тања Тас. Концертот е во организација на „3 гонга“.

Тие ветуваат одлична свирка на која ќе ги отсвират песните од својот албум „Играј“, премиерно ќе ја изведат во живо новата песна „Не застанувај“ за која неодамна направија и видеозапис, како и песни од нивниот нов албум, кој е во подготовка.

„’Темпера’ создава музика полна со енергија и емоции. Песните се создаваат постепено со секој тон, збор, со секој риф, идеја. Тие се дефинираат, вообличуваат од нас како глината под прстите на вајарот. Звукот на нашата музика е рефлексија, сублимат на нашите личности, кои некако се поврзуваат низ неа, прават целина. Целина што е составена од нашата експресија, збир на нашите искуства, интереси“, велат членовите на бендот.

Својата музика ја опишуваат како пропорционално измешани стилови со уникатна целина.

„Од латински ‘темпераре’ – значи да се измеша, да се добие нешто од елементи во одредена пропорција или вистинска мерка како вистински сооднос на квалитети што образуваат, создаваат уникатна целина со сопствен живот, мирис, пулс, како детето, како билките, како ние самите, како светов околу нас, како и сè што произлегува од секој од нас. По „Тивка река“ и „Ѕвер“, сега ја промовираме песната „Не застанувај“. Првиот албум е карактеристичен по различноста на стиловите на песните. Такви се и песните што ќе се најдат на вториот. Тивки сме како „Тивка река“, а енергични како „Ѕвер“. Сите се обоени со нашиот препознатлив звук. Нашиот нов албум е во подготовка и голем дел од него ќе биде отсвирен на нашиот концерт утревечер“, велат членовите на бендот.

Гитаристот и композитор Драган Гиновски – Гино од 1998 година, па сè до 2011 година беше дел од култниот бенд „Архангел“ и многу музички критичари го прогласија за еден од најдобрите рок-гитаристи во земјата. Ѓоле Максимовски е музички активен од средината на 90-тите, тој е басист и композитор на албумите на „Тилт“, „Сет“, „Беневентан трио“, „Мозаик“ и „Кабадајас“. Од 1998 до 2005 година беше член и на „Архангел“. Учесник во снимањето на албумите на „Алшар“, „Мугер фугер“ и 18 години е дел од „Влатко Стефановски трио“ со кого заедно има остварено успешни соработки со неколку светски реномирани музичари како Јан Акерман, Теодосиј Спасов и Стефан Миленковиќ.

Мите Димовски е тапанар, композитор, аранжер и продуцент. Својата музичка кариера ја започнува на 12 години во групата „Цилиндер“ како најмлад тапанар во поранешните југословенски простори. Најголемиот дел од својот музички пат го има поминато во групата „Архангел“. Низ својата досегашна 20-годишна кариера има учествувано на над 400 проекти како продуцент, а покрај многуте музички имиња, соработувал и со „Мизар“, „Анастасија“, „Фолтин“, Кирил Џајковски, Влатко Стефановски… Вокалистката и текстописец Тања Тас е ликовна уметница по вокација, а својата музичка кариера ја започнала на 16 години како вокал на македонскиот блуз бенд Wild Bunch. Континуирано од тогаш учествува во многу музички проекти заедно со „Кисмет“, „Лилит“, Горан Трајкоски Готра, „Аутмајнд“, Игор Атанасовски -Харе, „Мугер фугер“ и проектот „Фем фатал“ со Александар Ристовски – Принц.