Австриската и босанската полиција минатата година разбија терористички центри поради кои сега им се заканува одмазда од страна на Исламска држава (ИД), пишува виенскиот дневник Kurier.
 

Австриската и босанската полиција минатата година разбија терористички центри поради кои сега им се заканува одмазда од страна на Исламска држава (ИД), пишува виенскиот дневник Kurier.

Австрискиот весник наведува дека во Босна и Херцеговина (БиХ) веќе нема салафистички села, кои претходно, пак, биле поврзани со терористичката организација. Весникот оценува дека убиството на двата војника во Сараево, извршено од Енес Омерагиќ, кој е повратник од војната во Сирија, е всушност одмазда за операцијата „Палмира“, во која австриската и босанската полиција разбија голема мрежа за регрутирање на борци за Исламска држава.

Акцијата започна во 2014-та година во Австрија, кога 900 полицајци во Виена, Грац и Линц учествуваа во апсењето на 29 лица осомничени во врска со Исламска држава. Оваа група, во која спаѓа и Мирсад Омеровиќ, осомничен за директна врска со калифот на ИД, Абу Бакар ал Багдади во Сирија, имала поврзаност со Босна.

Омеровиќ, кој делувал под исламското „борбено име“ Ебу Тејм, е осомничен за собирање на финансиски средства за Исламска држава и регрутирањето на млади џихадисти, а се смета и дека ниедно заминување на џихадистите од Европа во Сирија не поминало без негова вмешаност.

Потрагата потоа ја донела полицијата до босанското село Горна Маоча, каде имало лица поврзани со ИД, пренесува Kurier, додавајќи дека Исламска држава имала свои центри и во села близу Зеница, Бихаќ и Брчко. Џихадистичките села и центри на поддршка за Исламска дражва во Босна развиле и безбедносен ризик за цела Европа.

Австрискиот весник ја истражил и актуелната состојба во овие места и дошол до заклучок дека терористичките ќелии веќе не постојат, бидејќи биле разбиени од страна на босанските власти, со поддршка од Австрија. Во меѓувреме, пак, сите познати салафистички села биле ставени под контрола на полицијата, потврдиле австриските и германските дипломати, кои им асистирале на босанските власти во акциите.

Командот на ЕУФОР, генерал-мајот Јохан Луиф потврдил за весникот дека „сите екстремистички села“ се сега под контрола. Со ова било ставено крај на регрутирањето на борци за Исламска држава, како и пад на бројката на младите кои се подготвени да се приклучат кон „светата војна“.

По разбивањето на босанско-ориентираните структури, австриските власти го насочиле фокусот кон чеченската сцена во Австрија. Според информациите, половина од лицата кои од Австрија отпатувале во џихад, а идентификувани биле некаде 250, се од чеченско потекло. Нивната структура не била погодена од акцијата против босанската екстремистичка сцена.

Големата мрежа на Чечени во Турција и Австрија и натаму се користи за трансфер на џихадистите во Сирија, тврди Kurier, додавајќи дека спречувањето на регрутирањето на борци е најкорисното оружје во борбата против Исламска држава, бидејќи без борци од странство оваа терористичка организација не би можела да преживее во Сирија и Ирак./крај/мф/бс

Извор: Макфакс