Ветувањето пред изборите дека ќе ги укине извршителите, премиерот Зоран Заев по денешниот протест против извршителите, го сведе само на измени на Законот за извршување со намалување на бројот на тарифите во извршителските служби од 42 на десетина. Најави дека ќе се заложи дел од институциите да се откажат од каматите на долговите, но не кажа ништо за главното барање на денешниот протест – одблокирање на сметките на физичките лица.
Ана Глигорова од иницијативата „Стоп за извршителите“, по изјавата на премиерот, вели дека нема компромис околу барањето за одблокирање на сметките и најавува дека протестите ќе се интензивираат.

„Геноцидот е направен токму со блокирање на сметките. Кога на луѓето им е одземена последната можност да го прехранат семејството. Ние нема да се откажеме се до конечно одблокирање на сметките. Очекуваме премиерот да закаже седница на Влада со единствена точка на дневен ред – одблокирање на сметките на физичките лица. Простестите ќе се интензивираат. Планираме еднаш неделно да ги организираме и најверојатно ќе одбереме некој попладневен термин се до исполнување на трите барања“, изјави за „Макфакс“ Глигорова.

Барањата на граѓаните на денешниот протест беа итно одблокирање на сметките, измени на Законот за извршување кои нема да бидат само шминка и враќање на извршителите во рамки на судовите.

Глигорова нагласи дека попладнево добила голем број повици од луѓе од различни градови во Македонија кои и дале поддршка и најавиле дека се подготвени да дојдат на протести.