Владејачката Социјалистичка партија (PS) на претседателот Франсоа Оланд пред вториот круг од француските регионални избори, ќе ги повлече изборните листи во северниот и јужниот регион, за да спречи крајната десница Национален фронт (FN) да победи, откако во првиот круг нејзините листи се во убедливо водство, објави ноќта кон понеделникот генералниот секретар на социјалистите, Жан-Кристоф Камбаделис. 

Во минатото десниот центар, сега Републиканци, и социјалистичката партија, често на изборите на сите нивоа постигнуваа договори за да го оневозможат кандидатот на Националниот фронт, кој го нарекуваат „нерепубликанска“ сила, да победи. Овојпат пред одржувањето на првиот изборен круг од регионалните избори во неделата, челникот на Републиканците, поранешниот француски претседател Николас Саркози, изјави дека нема да преговара за такво сојузување со социјалистите.

„Во регионите каде што има опасност да победи Националниот фронт, и каде левицата е инфериорна во однос на десницата, Социјалистичката партија реши да создаде републиканска опструкција, особено во регионите Нор-Па-де-Кале-Покарди и Прованса-Алпи-Азурен брег… Во следните пет години социјалистите нема да имаат мандати во регионалните совети на тие региони“, изјави Камбаделис.

Тој, исто така, ги повика Зелените и претставниците на другите партии од левиот спектар да се обединат со Социјалистичката партија во тие региони, каде тие имаат шанси во вториот круг.

Камбаделис ја критикуваше и одлуката на челникот на најголемата опозициска партија – Републиканци – Николас Саркози, кој го отфрли правењето сојуз и повлекување на кандидатските лиси во другите региони.

Според прелиминарните резултати, по првиот круг Националниот фронт е во водство во 6 региони, Републиканците во 4, а социјалистите само во 2. На Корзика во водство е коалицијата на левите сили. Тоа претставува нов уште еден пораз на социјалистите на претседателот Оланд.

Во регионите од кои се повлекува Социјалистичката партија во водство значителна предност се токму челничката на Националниот фронт, Марин Лепен, и нејзината внука Марион Марешал-Лепен

Марин во северниот регион Нор-Па-де-Кале-Пикарди освојува 40 до 41 отсто од гласовите, пред кандидатот на Републиканците (24-15 проценти) и на социјалистите (18-18,5 отсто). Марешал-Лепен, пак, во јужниот регион Прованса-Алпи-Азурен брег, е во водство со 40,9 до 41,9 отсто до гласовите, Републиканците освојуваат 24,5 до 25 отсто, додека социјалистите во овој регион имаат 18 отсто од гласовите.

Во неделата во Франција се одржа првиот круг од регионалните избори, за кои кампањата се водеше во атмосфера на терористичките напади во Париз, а дали партијата од крајната десница Национален фронт (FN) првпат во историјата ќе успее да ја освои власта во еден од регионите, е главното прашање на овие избори кои се последните пред претседателските и парламентарни кои ќе се одржат во 2017 година./крај/мф/сн

Извор: Макфакс