Домашен
Планинарот Александар Кирковски постави нов брзински рекорд на највисокиот врв во Европа
Македонскиот планинар и планински тркач Александар Кирковски денеска постави нов македонски брзински рекорд на највисокиот врв во Европа, Елбрус, на 5642 метри надморска височина.
„Стартував од подножјето на планината (Азау 2350 мнв) во 6 часот и движејќи се соло без никаква логистика го искачив врвот за 5 часа и 18 минути подобрувајќи го своето минатогодишно остварување за 17 минути (5 часа 35 минути). Рутата е долга околу 13 километри со близу 3300 висински метри во сурови услови и ниски температури, а дополнителна потешкотија е пореткиот воздух, кој на врвот Елбрус го има за околу 50% помалку во однос на морското ниво. Соло искачувањето е потешко, но на ваков чекор се решив бидејќи трката до врвот на која треба да учествуваме на 7.5.2018 можно е да се промени поради влошување на времето“, изјави Кирковски.
Врвот Елбрус се наоѓа на масивот Кавказ во Русија и годишно го искачуваат голем број планинари, но вообичаеното потребно време за класично искачување е два до три дена притоа користејќи и жичница до одредена точка. Брзинското искачување на високите планински врвови во светот е релативно понов тренд, се јавува во последните 20-тина години.
Александар минатото лето постави македонски брзински рекорд и на највисокиот алпски врв, Мон Блан 4810 мнв, за 6 часа 26 минути до врвот и назад.
Акцијата е дел од програмата на Федерацијата на планинарски спортови на Македонија, а во тимот се уште Дејан Тодевски, Димитар Тодоровски и Петар Ивановски. Кирковски потфатот го посветува на пријателите планинари кои трагично настрадаа на Кајмакчалан, Калина Велевска и Александар Миновски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.