Македонија
Намалена цената за паркирање на моторни возила за време на „Пивофест 2018“

На денешната 15 седница на општинскиот Совет, советниците расправаа по 10 точки од дневниот ред. Советниците донесоа Одлука за измена на распоредот на средства на буџетот за 2018 година. Станува збор за неискористени средства од блок дотации за 2017 година, кои се пренасочуваат за реконструкција и санација на основните и средните училишта во градот.
„Средствата кои не биле искористени во тој временски период, се прераспределуваат за основните и средните училишта во градот, со цел да се реализираат проектите со кои локалната самоуправа ги задолжи директорите на училиштата, во најбрз временски рок да извршат санација на училишните згради. На денешната седница донесовме одлука со која цената за паркирање на моторните возила за време на „Пивофест 2018“, се намалува од 100 на 50 денари. Жалам што советничката група на ВМРО-ДПМНЕ не ја поддржа Одлуката за намалување на цената“, изјави претседателот на Совет на Општина Прилеп, Миле Талевски.
Во духот на транспарентното функционирање на локалната самоуправа, прилепските советници изгласаа Одлука за официјализирање на соработката, односно потпишување на меморандум за соработка помеѓу Општина Прилеп и организаторот на „Пивофест 2018“, „Ентфинити“. Членовите на општинскиот Совет изгласаа Одлука за утврдување на критериуми и стандарди за поставување на урбана опрема, со која опфатот на користење на јавна површина пред деловните објекти на градскиот плоштад, се прошири од 4.5 на 6 метри.
Советниците им дадоа „зелено светло“ на предлог одлуките за подигање, чување, одржување, заштита и користење на спомен-обележјето во чест на Ненад Серафимоски и за ослободување од плаќање надомест за уредување на градежно земјиште за изградба на црковна трпезарија со административен дел, во состав на храмот „Св.преподобна маченица Параскева“ во населбата „Точила“. Исто така, беше изгласана Одлука за пренесување на правото на користење и управување со недвижен имот, со која поранешните простории на ЈКП „Водовод и канализација“ кои се наоѓаат зад старата општинска зграда, му се доделуваат на користење на ЈКП „Комуналец“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За три дена, 109 повредени од Кочани доставиле барања и предлози на телефонската линија на Владата

109 граѓани за три дена од пуштање на телефонската линија за повредените лица и нивните семејства, која е во директна комуникација со Канцеларијата на Ппретседателот на Владата, ја искористиле можноста и доставиле свои барања и предлози, соопштија од Владата.
Од таму велат дека тоа покажува дека оваа телефонска линија дава резултат и дека Владата е отворена за секаква сугестија и идеја.
„Како Влада преку низа на мерки помагаме за помош на повредените и нивните семејства. Ова е заедничка борба и нема да отстапиме од неа, бидејќи секој граѓанин има право на соодветна здравствена заштита и медицинска нега, токму поради тоа како Влада донесовме одлука за рехабилитација во Пониква на повредените лица кои се во стабилна здравствена состојба, но им е потребна дополнителна медицинска услуга. Тим на лекари од 10 јуни до 20 август во рехабилитацискиот центар Пониква на сите лица ќе им пружат дополнителна медицинска грижа, но и психолошка поддршка“, велат од Владата.
Од таму ги повикуваат и ги охрабруваат сите повредени лица кои се засегнати да се јават на телефонскиот број 070/355-526 и да ги изразат своите барања и потреби.
Македонија
Сончево време, попладне локален дожд

Времето денеска ќе биде сончево со мала до умерена облачност. Попладне ќе има услови за локален развој на нестабилна облачност со пороен дожд и грмежи. Ќе дува слаб ветер од променлив правец. Минималната температура ќе биде во интервал од 12 до 20, а максималната ќе достигне од 26 до 35 степени.
Во Скопје, сончево со мала до умерена облачност. Ќе дува слаб ветер од северен правец. Минималната температура ќе се спушти до 17, а максималната ќе достигне до 34 степени.
Од денеска следува период на стабилно и сончево време со мала до умерена локална облачност. Дневните температури ќе бидат без значителни промени.
Македонија
Мурал од балкански рис исцртан на фасадата на Театар Комедија

Со мурал од балкански рис и мала прослава, Македонското еколошко друштво вчера го прослави Светскиот ден на рисот.
„Конечно најдовме дом за муралот, најдовме и артист кој го нацрта, и најдовме човек кој има визија и кој е отворен за соработка, а тоа е директорот на Театар Комедија – Дарко Спасов. Целта ни е со овој мурал да ја подигнеме јавната свест, не само на рурално туку и на урбано ниво. Кога работите ќе згуснат ни треба секаква поддршка, од секоја популација“, изјави раководителот на Програмата за закрепнување на балканскиот рис, Диме Меловски.
Тој се заблагодари на поддршката од Театар Комедија и директорот Дарко Спасов.
„Велат исти птици во исто јато летаат“, вели директорот Спасов, кој го изрази своето задоволство од соработката со Македонското еколошко друштво.
Освен муралот на фасадата на Театар Комедија, пред објектот поставена е и инфо табла со основните податоци за рисот, како и QR код кој води до новата интернет страница посветена на балканскиот рис: balkanlynx.com.
По поздравните обраќања, присутните членови и соработници на МЕД, се упатија кон Бистро Комедија каде што во неформална атмосфера имаа прилика да поразговараат за досегашните постигнувања, но и да разменат идеи и предлози за идни активности.